سؤال بخصوص تقديم تظلم لالغاء مخالفة سيارة

**aboalmaty** · 12-05-2013 10:23 PM

رحت اطلع براءة الذمة قالوا هات ورقة من عند بتاع التصوير وروح شباك 9
جبت الورقة ورحت شباك 9 الموظف قال لواحد تاني هات لي ملف العربية دي
كتب في الورقة تاريخ اخذ اللوحات بتاعت العربية وقال امضيها واختمها من الضابط وروح شباك 5
عملت اللى قال عليه وعلى ما مضيتها من الضباط وروحت على الشباك لقيتهم قفلوا والناس اللى على الشباك بيقولوا ده لسه قافل دلوقتي لان الخزنة قفلت الساعة 12
حاولت ادخل للبيه وكيل النيابة عشان استسمحه ياخد الورق لاني من محافظة تانية بعيده والشباك قفل الساعة 12 وانا وصلت الشباك الساعة 12 وكم ثانية
الباشا قال الخزنة قفلت وفوت علينا بكره
المهم روحت وانا زعلان على المشوار اللى طخيته بدون ما اخلص براءة الذمة حتى
والحمدلله على كل حال
انا متابع موقع المخالفات بتاع المرور وكل شوية بدخل عليه مكنش علي اي مخالفات خالص
حتى قبل ما اروح لهم بيوم مفيش اي مخالفات
دلوقتي لسه داخل على موقع خدمات المرور الالكترونية وبشوف المخالفات اللى عليه
لاقيت فيه مخالفة بتاريخ قبل شرائي للعربية اصلا
وانا معايا براءة ذمة من اللى اشتيت منه العربية بتاريخ احدث من تاريهخ المخالفة
يعني مثلا براءة الذمة بتاريخ 12/12/2012
والمخالفة بتاريخ 8/10/2012
فهل لو عملت تظلم يقبلوه ولا لأ ؟
وايه اللى مطلوب عشان اعمل التظلم ده ؟

**mo7a_mo7a** · 12-05-2013 10:27 PM

بتقدم صورة العقد المسجل وصورة براءة الزمة اللي نقلت بيها الملكية وورقة صرف اللوحات وبتكتب طلب نقل مخالفات علي المالك القديم وبينقلهالك عادي
الفيصل تاريخ تسجيل العربية باسمك

تقبل تحياتي

**khaabas** · 13-05-2013 12:10 AM

التوكيل لا ينقل ملكية وبالتالى ملكية السيارة ما زالت بيد مالكها الأصلى فلا يعتبر التوكيل بمثابة عقد يعنى هتدفع المخالفة لكن الامر يختلف لو معاك عقد مسجل كنت هتقدر تنقل اى مخالفة قبل تاريخ الشراء لكن بالتوكيل دى انتا لا تعتبر اشتريت اى حاجة

**aboalmaty** · 13-05-2013 12:42 AM

المشاركة الأصلية كتبت بواسطة khaabas

التوكيل لا ينقل ملكية وبالتالى ملكية السيارة ما زالت بيد مالكها الأصلى فلا يعتبر التوكيل بمثابة عقد يعنى هتدفع المخالفة لكن الامر يختلف لو معاك عقد مسجل كنت هتقدر تنقل اى مخالفة قبل تاريخ الشراء لكن بالتوكيل دى انتا لا تعتبر اشتريت اى حاجة

انا كل استغرابي ان شهادة براءة الذمة اللى طلعت من النيابة العامة للمرور بالدراسة فيها لا يوجد احكام
وفيها لا توجد مخالفات حتى تاريخه والشهادة دي بتاريخ 9-12-2012
اليست هذه الشهادة تثبت عدم وجود مخالفات وقعت قبل هذا التاريخ ؟
كيف أجد انا الان ان هناك مخالفة بتاريخ 10-11-2012 ؟!

**aboalmaty** · 13-05-2013 12:43 AM

فما فائدة شهادة براءة الذمة اذا ؟

**khaabas** · 13-05-2013 10:34 AM

المشاركة الأصلية كتبت بواسطة aboalmaty

انا كل استغرابي ان شهادة براءة الذمة اللى طلعت من النيابة العامة للمرور بالدراسة فيها لا يوجد احكام
وفيها لا توجد مخالفات حتى تاريخه والشهادة دي بتاريخ 9-12-2012
اليست هذه الشهادة تثبت عدم وجود مخالفات وقعت قبل هذا التاريخ ؟
كيف أجد انا الان ان هناك مخالفة بتاريخ 10-11-2012 ؟!

اقولك انا يا كبير ازاى ممكن تكون المخالفة اتخدت فى محافظة تانية بمعنى ممكن يكون صاحبها كان مسافر اسكندرية مثلا واتاخد هناك مخالفة وادارة المرور التابعة ليها العربية من القاهرة فعقبال لما مخالفة اسكندرية تكون راحت على ملف العربية اللى فى القاهرة بتكون اخدت وقت طويل وانتا عارف الروتين المصرى الله يباركله
لكن شهادة براءة الذمة اللى معاك طالما بتاريخ لاحق خلاص اقدمها وهينتهى الموضوع ان شاء الله

**aboalmaty** · 13-05-2013 09:00 PM

المشاركة الأصلية كتبت بواسطة khaabas

لكن شهادة براءة الذمة اللى معاك طالما بتاريخ لاحق خلاص اقدمها وهينتهى الموضوع ان شاء الله :s_thum1[1]:

هو ده المطلوب اثباته
شكرا ياباشا ربنا يطمنك

**limo** · 13-05-2013 09:19 PM

سجل العربيه باسمك فى الشهر العقارى وخد العقد والتوكيل وبراءه الذمه وادخل على وكيل النيابه قوله انا عايز اعمل مالك سابق يومين والمخالفه هترحل على المالك القديم وتاخد انت براءه ذمه بس اهم حاجه فى الموضوع ان براءه الذمه تكون معاصره لتاريخ التوكيل بتاعك

**ahmedhilmy** · 13-05-2013 10:22 PM

المشاركة الأصلية كتبت بواسطة limo

سجل العربيه باسمك فى الشهر العقارى وخد العقد والتوكيل وبراءه الذمه وادخل على وكيل النيابه قوله انا عايز اعمل مالك سابق يومين والمخالفه هترحل على المالك القديم وتاخد انت براءه ذمه بس اهم حاجه فى الموضوع ان براءه الذمه تكون معاصره لتاريخ التوكيل بتاعك

معلش وضح النقطه دي بتفصيل اكتر