تجربتي مع صيانه 20 ألف للكارينز 2012

**Ahmed_Adham** · 14-05-2013 03:46 PM

النهارده عملت صيانه 20 ألف للكارينز 2012 في التوكيل فرع أبو رواش والعربيه عمرها معايا دلوقتي سنه ونص. التكلفه الاجماليه 1017 جنيه شامله الضريبه والمصنعيه وتفاصيلها كالأتي:-

زيت شيل هيلكس الترا 272 جنيه
فلتر زيت 30 جنيه
فلتر هواء 85 جنيه
بوجيهات عدد أربعه سعر الواحد 36 جنيه = 144 جنيه
فلتر تكييف (أنا طلبت تغييره) 165 جنيه.
مصنعيه 228 جنيه
ضريبه 93 جنيه

وقت الصيانه كان 3 ساعات بالظبط من لحظه تسليم العربيه حتى استلامها مع ان الصيانه بتاعت 10 اللي فيها تغيير زيت وفلتر بس بتبقى ساعه ونص او ساعتين بس يمكن موضوع تغيير البوجيهات مع الزحمه اللي كانت موجوده النهارده هيه سبب التأخير (أنا رحت التوكيل حوالي 5-6 مرات لحد دلوقتي ودي كانت أزحم مره فيهم) وطبعا بيربطو العفشه ويغسلو العربيه بره وجوه وبيغسلو الموتور بالفوم ويشيكو على كل حاجه زي السوائل والفلاتر والكهربا الخ الخ الخ..... والانطباع بعد أي تغيير زيت هوه هدوء صوت الموتور بفرق واضح مخليني ناوي أغير الزيت ال 10 تلاف كل 5-7 ألاف لأن تقريبا الزيت مش كفء لل 10 تلاف وبرضه ممكن نقول اني عايز العربيه تبقى مرتاحه و هاديه طول الوقت.

ملحوظه غريبه: المهندس سألني وهوه بيستلم العربيه قالي لو لقيت التيل محتاج تغيير اغيره؟ قلتله تيل يتغير على 20 ألف؟ قالي أيوه ممكن. قلتله طب لو محتاج تغيير ابقى قولي الأول وبعد الصيانه قالي التيل مش محتاج تغيير وفلتر التكييف كان ممكن تخليه على الاقل لصيانه ال 25 بس انا غيرته حسب طلبك.

لو فيه أي استفسارات أنا جاهز...

**S O P H O S** · 14-05-2013 04:45 PM

الف مبروك الصيانة ..

**Ahmed_Adham** · 14-05-2013 10:39 PM

المشاركة الأصلية كتبت بواسطة s o p h o s

الف مبروك الصيانة ..

الله يبارك فيك. وعلى فكره سعر الصيانه بدون تغيير فلتر التكييف (اللي أنا غيرته بمزاجي) كان 850 جنيه شامل الضريبه والمصنعيه.

**mohamed_selim** · 14-05-2013 10:52 PM

التيل قالولىعليه يمشينى ٥٠٠٠ وانا فى صيانة ال ٣٠ و فى ال ٣٥ قلتله يكشف عليه فقالى كويس
اتغير فى صيانة ال ٤٠ و كنت عامل ٤٣ الف و التيل انا شايفه لسه فيه بس مش مشكله لما يتغير كل ٤٠