بيجو 307 sw :( الحمد لله

**nadaessam** · 15-05-2013 01:48 PM

السلام عليكم

انا اشتريت 307 sw فى 12/12 يعنى من 5 شهولا تقريبا .. انا ام و عندى ولدين و جبتها طبعا ما شاء الله لانها كبيره لحاجات الولاد و السفر .. كانت دى اول مره نشترى مستعمل من حد منعرفهوش .. راح زوجى التوكيل اللى فى غمره .. و قالو العربيه كفأه موتور 85 % و فابريكه بره وجوه و مش محتاجه حاجه خالص .. المهم صاحبها كان طالب 90000 و دفعناهم .. العربيه كانت عامله 28000 كم و هى موديل 2007 .. و بعد ما خلصنا الاوراق ا كتشفت انو العربيه مش بتاعتة و ان فى توكيلين بينهم شهر واحد فقط ... فهمنا انو تاجر و اكيد كده غاليه بس كنا عاملين استخارات كتير و الحمد لله الموضوع مشى .. المشكله بقى دلوقتى ان العربيه بيتهبد كده و بتطلع اصوات من كل حته .... ده حتى التابلوه ب يتك تك كده ... هى كده محتاجه عفشه ؟؟ ابيعها و اخسر فيها ولا اعمل ايه ... و لو اصلحها اصلحها فين ... و تكلفنى كام ؟؟؟ حد مضمون حد عنده عمل عفشه قبل كده ؟؟ جزاكم الله خيرا

**kar!m** · 15-05-2013 01:59 PM

مش عارف ليه حاسس ان الموضوع وسوسه مش أكتر .. ما دام رحتوا التوكيل و قال لكم العربية تمام يبقى ازاي العربية طلع فيها مشاكل مره واحده؟

ممكن يكون مثلا ضغط الهوا في الكاوتش زيادة شوية هو اللي مسبب الموضوع ده .. أو العفشه عاوزة تتربط .. يعني أنا شايف الموضوع مش هيخرج عن حاجات بسيطة.

و أنصح حضرتك متستعجليش في البيع.

**nadaessam** · 15-05-2013 02:02 PM

جزاك الله خيرا على الرد ... عارف فعلا لما تقفل من حاجه :( واللهى فكرت ابيعها واجيب بيكانتو زيرو :(

**a_arazik** · 15-05-2013 02:18 PM

بص يا باشا انا شايف ان الموضوع وسوسة بردو بس حضرتك العفشة ولا اي حاجة حضرتك روح عند عفشجي كويس وشوف هو هيقولك اية في العربية

**bmya** · 15-05-2013 03:01 PM

ياغندم عادي يعني ده طبيعي انتي حضرتك شارياها 12/12 واحنا حاليا 5/13 يعني 5 شهور من الاستهلاك طبيعي العربيه تبقى محتاجه تربيط عفشه مثلا او لو بتمشي كتير في طرق مكسره ممكن تكون حاجه محتاجه تتغير عادي
بغض النظر تاجر او لا بس طالما انتم كشفتم عليها في التوكيل وقال لكم انها تمام تبقى تمام واللي فيها حاليا من الاستهلاك العادي ممكن تروحي التوكيل يكشفلك عليها ويقولك اللي فيها او لو زوج حضرتك بيتعامل مع عفشجي كويس يروح له وهتبقى حاجاه بسيطه ان شاء الله
العربيه ماشاء الله جميله

**nadaessam** · 16-05-2013 10:15 AM

بشكركم جميعا .... روحت امبارح مع والدى ل على الدهشورى اللى فى صقر قريش .. كان 2 هنا شكروه فيه و كشف على العربيه و طلع جربها و قالى انها الحمد لله كويسه جدا و تمشى زى ما هى و مش مختاجه حاجه خالص بس واضح انها فعلا وسوسه .. الحمد لله .. بس غالبا هابيعها لاتى فعلا مش مرتاحه ... نسألكم الدعاء

**boosy** · 27-05-2013 06:07 PM

طيب لو حضرتك هتبيعيها هتبيعيها بكام؟

**Ahmed Amin** · 28-05-2013 10:24 PM

لو الكاوتش اللي عليها لسه القديم بتاعها الي نزلت بيه من بلادها أحتمال كبير يكون السبب.
لان الكاوتش عمرة الافتراضي ٤ سنين وبينشف بعد كدا وهتحسي انك ماشي علي حجر او زلط مش اسفلت.

انا غيرت الكاوتش في ٢٠١١ تقريباً وهيا موديل ٢٠٠٧ برضه. والماوتش اللي عليها كان Good Year إنتاج ٢٠٠٦ وكان بقي حجر. كنت لحس بكل زلطة تيجي تحت الكاوتش حتي لو قللت ضغط الهواء في الكاوتشات.
بعد ما غيرت الكاوتش حسيت بفرق السماء من الارض. زي ما كون كنت ماشي حافي عال اسفلت وبقيت ماشي علي بطانية ناعمة.

أي حد بينوي البيع بياجل الصيانات ومش بيعمل اي شغل محتاجاه العربية لانو ناوي يبيع.
وطالما العربية عاملة كيلو متر قليل أوي كدا أكيد كانت بتقف بالشهور او كانت مرفوعة وفي الحالتين الكاوتش بينشف.

انصحك تغيري الكاوتش قبل التفكير بالبيع. وتربطي عفشة بعد التربيط وتشوفي فرق الأداء.
العربية جميلة بس اكيد عربية بالعمر محتاجة شوية صيانة وقطع غيار اي عربية في عمرها سواء كيا او تويوتا هتحتاج نفس الصيانة.
ومتنسيش انك كننتي جايباها عشان تبقي عربية عيلة وللأولاد ودي حاجة والهاتش باك حاجة تانية.

**Ahmed Amin** · 28-05-2013 11:43 PM

نسيت أذكر حاجة ان لو في صوت تكتكة من ناحية الطابلوة احتمال تكون البطاحات محتاجة تتغير.
"اللي هيا بتبقي ماسكة المساعد ف جسم العربية من فوق علي جنب الماتور يمين وشمال لو مش عارفة مكانها"
دي هتعمل صوت الطقطقة اللي بتطلع من ورا الطابلوة. و عمرها الافتراضي من عمر اي أجزاء كاوتش في العربية.
وطبعاً الكاوتش الناشف هيحمل عال مساعد والمساعد هيرزع فيها أكتر.
و البيض اللي تحت في المقصات احتمال يكون محتاج يتغير.
فالعربية محتاجة تروح لعفشجي بيفهم.

والكاوتش يفضل انو يتملي يروح مركز خدمة لبريدچستون ويتملا نيتروجين بعد ما يتفضي تماماً من الهواء.
"هيفرق كتير جداً عن تجربة في الكاوتش القديم قبل ما أغير والكاوتش الجديد."
لان الهوا في الحر بيتمدد بالحرارة. والضغط بيزيد بداخل الاطار بيخليه ناشف أكتر من ما هوا ناشف لو قديم وهيرزع اكتر وتبقي السواقة والعربية مش مريحة بالمرة.

لكن لما الكاوتش المنتهي صلاحيته يتغير ويتملا نيتروجين الجديد او القديم مؤقتا لحد ما يتغير.
وتتربط العفشة وتتغير الاجزاء اللي انتهي عمرها فيها. ساعتها ال sw هتكون قعدتها وسواقتها زي أريح كنبة عندك في البيت ومش هتبقي عايزة تنزلي منها علي عكس أي عربية كوري او حتي ياباني.