تقييم لادا 2107 روسي بعد 3000 كم

**sniper2010** · 20-08-2008 04:30 PM

قبل ما أقول أي حاجة أنصح أي حد انه يقرا تقييم الألف كيلو الأول عشان يفهم انا بتكلم على إيه

أنا همشي بنفس الترتيب اللي كنت كتبته في تقييم الألف كيلو بس لو حاجة ما علقتش عليها تبقى زي ما هي ....
• استهلاك البنزين : طبعا بعد تسجيل بيانات تفويل العربية على المدى الطويل ده أعطى فكرة احسن عن استهلاك العربية... هي عملت 1589 كيلو بكمية بنزين = 128 لتر نصفها تقريبا بنزين 90 و النصف الآخر 92 يعني معدل الاستهلاك حوال 12.4 كيلو لكل لتر مش 11.7 زي ما قلت قبل كده ((( آدي أول مفاجأة )))
• استعمال بنزين 92 بدل 90: أولا فرق السعر مش كبير (2 جنيه في الصفيحة) ثانيا بيعمل فرق في آدء الموتور زي انخفاض صوته و انخفاض مؤشر ال economy يعني انخفاض استهلاك البنزين و طبعا الفروق دي بسيطة .....
• سحب العربية بعد المطبات : السحب كويس بس محتاج تدوس على البنزين ...( اللي انا كنت بعمله هو اني كنت بحط عيني على مؤشر الإيكونومي و ما خليهوش يدخل في الاحمر و طبعا كانت العربية بتحتاج وقت عشان تاخد سرعتها تاني)
• ثبات العربية حتى 110 ممتاز و طبعا بعد كده بتتأثر
• تمويجة العربية في الملفات أعتقد إني اتعودت عليها مش هي اللي اختفت لأن الشاهين في نفس الملفات دي و على نفس السرعة بتكون أكثر ثباتا
• الدهان الخارجي طبعا مش عاجبني بس لقيت حل : جلانس منظف الزجاج و الأسطح الملساء بعد ماتغسل العربية استعملة عليها بس تمسحه بفوطة نظيفة أو مناديل ورقية ... وطبعا هترجع تلم تراب تاني بعد يومين J
• مجال الرؤية: لسه ضيق زي ما هو ... بس انا اتعودت عليه خلاص ( وعلى فكرة ما غيرتش المرايات)
• الدركسيون : بعد عمل مشحمة تحسن بصورة بسيطة... و كمان انا ربيت عضلات خلاص من كتر استعماله و بقيت أرجع بالعربية بإيد واحدة زي ما قال الأخ expert.... بس أحيانا بحتاج الإيدين ( أحيانا)
• الفرامل لسه بتصفر بس برضو اتعودت عليها و ما بقيتش احس إنها ضعيفة زي ما كنت بقول
• لسه بستعمل الموبايل بدل الكاسيت J)
• الأبواب اتحسنت بصورة ملحوظة ما عدا الباب الخلفي شمال يمكن لأنه الأقل استعمالا
التغييرات اللي عملتها للعربية:
1- تركيب كارتيرات فوق العجل لحماية صاج العربية
2- تركيب حلية رفارف ... لزوم الكارتيرات
3- تركيب فرش أرضيات مشمع لسهولة تنظيف السيارة من الداخل
4- فصل مفتاح تسخين الزجاج الخلفي خوفا من وقوع حوادث لا قدر الله
5- وضع الحاجات التالية في التابلوه : كوب ماء معدني عشان اشرب من أي حته و انا في الطريق – نوته لمتابعة بيانات العربية ( اتكلمت عنها في موضوع منفصل) – قلم جاف – معطر جو – علبة مناديل – بكرة ورق تواليت لتنظيف الزجاج باستعمال الجلانس – شمسية زجاج عشان لو ركنت في حته فيها شمس
6- وضع جركن مياة خضراء في الشنطة ( سائل تبريد بدل المياه العادية سعر الجركن 12 جنيه)
آسف على الإطالة يا رب الكل يستفيد

**sniper2010** · 20-08-2008 04:32 PM

يا ريت حد يحط لينك موضوع تقييم اللادا 2107 بعد ألف كيلو
لأني داخل من الموبايل و مش عارف أحطه
و شكرا مقدما

**sniper2010** · 20-08-2008 04:59 PM

http://www.nilemotors.net/Nile/showthread.php?t=27944

الحمد لله عرفت أحط اللينك

**Abdm** · 20-08-2008 05:58 PM

هل اللادا الروسى فية منها نازل بأى أوبشن يعنى هل يوجد روسى بالتكييف بتاع بلاده أو باور أو أى امكانيات . وما هى الامكانيات الموجودة اللى نازلة معاها حاليا . وشكرا

**Abdm** · 20-08-2008 06:00 PM

ونسيت أسئل هل يوجد منها كاربراتير ولا كل الروسى انجكشن وأسف على الاطالة

**mohamedok** · 20-08-2008 06:12 PM

السلام عليكم ورحمة الله وبركاته

تقييم ممتاز ورائع وموضوعى جدا وكمان اسلوب حضرتك فى الكتابه شيق للغايه واعتقد انى بعد ما قرأت تقييم ال1000 وال3000 متمسك جدا بشرائها خاصة الروسى

لدى استفسارين الاول هو حضرتك عملت ايه بخصوص سخونة الموتور هل لغيت وصلة المياه السخنه التى تدخل للموتور كما ذكرت حضرتك فى تقييم ال1000 كم

وايه موضوع الكارتيرات الى فوق العجل ثمنها كام؟ وبتركب بكام؟ وازاى ؟ ونشتريها منين؟ وهل لازم لو ركبنا الكارتيرات نركب حلية الرفارف ؟ اصل بصراحه حلية الرفارف ديه بالزات مبتعجبنيش ابدا

والف الف شكر يا مبدع دائما

تحياتى وتقديرى

**mohamedok** · 20-08-2008 06:18 PM

السلام عليكم ورحمة الله وبركاته

انا من الاسماعيليه واعمل مهندس زراعى وبركب عمال كتير معايا يوميا وممكن اعمل بالعربيه 200كم كل يوم واحيانا اكتر لظروف عملى فى استصلاح الاراضى وديه المواصفات التى اريدها فى السياره وانا عملت بها اعلان على المنتدى هنا

اريد شراء لادا 2107 / 1500 سى سى روسى بالمواصفات الاتيه :

المبلغ المتاح / ابتداء من 37000 وحتى42000
نوع العربية / مستعمله او كسر زيرو
العداد / 25000
إمكانية التقسيط فى حالة الزيرو / كاش
خبرتك فى السواقة وسكك الصيانة / خبرة
شكل العربية / سيدان
الموديل / ابتداء من 2006 الى 2008
إستخدام السيارة فى الاغلب /داخل وخارج المدينه
انتقالاتك بالعربية / دايماً معاك ناس
الكماليات المرجوة / سنتر- كاسيت-انذار (انوع محترمه )
إستهلاك البنزين / يفضل قليل
قطع الغيار / فى المعقول
اماكن الصيانة / يفضل توكيل - ممكن ميكانيكية - يفضل الاتنين
التفرغ لأعمال الصيانة / عندك وقت
الاستمرار بالعربية لفترة / احتمال تغير العربية قريب - هاتستمر بيها فترة طويلة - مش فارقة
سعر إعادة البيع / مش عايز تخسر كتير
اهم حاجات بتدور فيها على العربية / الدواخل والخارج تكون فابريكه

يجب ان تكون السياره متفكش فيها مسمار واحد والموتور بحاله لا تقل عن 90%

والمساعدين والبطاريه والكاوتش بحاله لاتقل عن 90%

تحياتى وتقديرى

**sniper2010** · 20-08-2008 09:19 PM

المشاركة الأصلية كتبت بواسطة mohamedok

السلام عليكم ورحمة الله وبركاته

انا من الاسماعيليه واعمل مهندس زراعى وبركب عمال كتير معايا يوميا وممكن اعمل بالعربيه 200كم كل يوم واحيانا اكتر لظروف عملى فى استصلاح الاراضى وديه المواصفات التى اريدها فى السياره وانا عملت بها اعلان على المنتدى هنا

اريد شراء لادا 2107 / 1500 سى سى روسى بالمواصفات الاتيه :

المبلغ المتاح / ابتداء من 37000 وحتى42000
نوع العربية / مستعمله او كسر زيرو
العداد / 25000
إمكانية التقسيط فى حالة الزيرو / كاش
خبرتك فى السواقة وسكك الصيانة / خبرة
شكل العربية / سيدان
الموديل / ابتداء من 2006 الى 2008
إستخدام السيارة فى الاغلب /داخل وخارج المدينه
انتقالاتك بالعربية / دايماً معاك ناس
الكماليات المرجوة / سنتر- كاسيت-انذار (انوع محترمه )
إستهلاك البنزين / يفضل قليل
قطع الغيار / فى المعقول
اماكن الصيانة / يفضل توكيل - ممكن ميكانيكية - يفضل الاتنين
التفرغ لأعمال الصيانة / عندك وقت
الاستمرار بالعربية لفترة / احتمال تغير العربية قريب - هاتستمر بيها فترة طويلة - مش فارقة
سعر إعادة البيع / مش عايز تخسر كتير
اهم حاجات بتدور فيها على العربية / الدواخل والخارج تكون فابريكه

يجب ان تكون السياره متفكش فيها مسمار واحد والموتور بحاله لا تقل عن 90%

والمساعدين والبطاريه والكاوتش بحاله لاتقل عن 90%

تحياتى وتقديرى

أفضل عربية تنفع حضرتك هي شاهين أو لادا بس لو شاهين هتبقى موديل 2002 أو 2003 مقابل المبلغ ده _ _ _ و طالما ناوي تغير خليك في المستعمل

كان في زميل في المنتدى عربيته جديدة و كان عايز يبيعها لظروف السفر و هو الزميل yasoxp
ممكن حضرتك تسأله إذا كان باعها و لا لسه و إن كنت أعتقد إنه باعها لأن بآله فترة كبيرة ما لوش حس في المنتدى

**sniper2010** · 20-08-2008 09:22 PM

المشاركة الأصلية كتبت بواسطة Abdm

ونسيت أسئل هل يوجد منها كاربراتير ولا كل الروسى انجكشن وأسف على الاطالة

الروسي كله إنجكشن
و ما فيش منها مكيفة أو باور
بس الكلام ده كان أيام ما اشتريت أما دلوقتي العربية سعرها زاد حوالي 5 آلاف جنيه أعتقد إنهم زودوا حاجة و أرجح إنها الباور

**sniper2010** · 20-08-2008 09:27 PM

بالنسبة لموضوع الكارتيرات فهي عبارة عن فيبر يركب على الرفارف من الداخل (فوق العجل يعني)
و فايدتها تحمي صاج العربية من الحاجات اللي العجل بيحدفها بالذات الطين و المياه عشان تمنع البارومة _ _ _ و تركيبها سهل جدا باستخدام مسامير و شنيور و ممكن أي سمكري يركبها ¤¤¤ و مش لازم يركب حلية رفرف _ _دي مسألة أذواق مش أكتر