صمام الكانستر وال اي جي ار (canister & egr valve)
http://www.nilemotors.net/Nile/344695-a.html
http://www.nilemotors.net/Nile/341836-a.html
http://www.nilemotors.net/Nile/350623-a.html
طبعا دية المواضيع اللي كنت عاملها الأول ودوخت علي بال معرفت اوصل للصمامين دولة هما بتوع ايه وبيتوصلوا ازاي ..... وزي ما انتم شايفين مكانشي فيه حل قاطع من احد او شرح وافي فحبيت انقلكم تجربتي ليستفيد بيها غيري .
اولا شكرا لكل من ساهم في الرد عليا علشان مننكرشي مجهود حد برده .
انا والحمد لله جبت الصمامين من عزبة شلبي ب 165 جنيه .
الشرح بلدي للغلابه اللي زي حالاتي
الصمام الاول في اول صوره حتلاقوه دوة صمام ال egr ودوة فايدته انه يفتح ضغط الهواء وبعض ابخرة العادم للموتور اثناء اللفات العاليه يعني مع ار بي ام عالي ودوة موضوع شرحه طويل والاساتذه شرحوه كتير بس الكلام البلدي اللي يخصك انه بيظبط حالة الموتور وكفائته معاك لانه بيفتح في وقت محتاجه الموتور وبيقفل في وقت الموتور مش في احتياج ليه فوجوده لازم الا في حالة الغاء بلف egr يبقي ملوش لازمه . وموضوع الغاء البلف اختلفت فيه الاراء والاقاويل .
الصمام التاني بتاع الكانستر في الصوره التانيه ودوة مهم لانه مرتبط بدورة البنزين وبيبقي واصل بخرطوم جاي من الكانيستر اللي بيسحب الابخره بتاعة البنزين من التانك فالبتالي بيظبط ضغط الهواء جوه التانك وبيخليك تستفيد بالابخره دية ويدخلهالك في دورة الوقود فبيوفرللك بنزين ممكن يتهدر ويتبخر منك ..
انا ركبت الصمامين بعد الفحص والبحث والتمحيص علي طريقة تركيبهم علشان محدش اداني الخلاصه بصراحه ....
وزي محتشوفوا في الصور صمام ال egr فتحتين اللي فوق بالطول رايحه علي المانوفيلد واللي تحت ناحية الفيشه علي بلف ال egr نفسه وفي واحده مسدودة جمب الفيشه علي طول ...
وصمام الكانستر واضح في الصوره زي ما انتم شايفين مش محتاج كلام ....
النتائج ...
اولا : كان عندي مشكله من ساعة مجبت العربيه ومحدش اداني الخلاصه برده فيها .. أنه كل لما افول العربيه وانا لسه واقف في البنزينه اجي ادور العربيه تغييب في الدواره لمره واحده بس بعد كده العربيه تفضل زي الفل لغاية ماروح تاني افول بقت حاجه دايمه عندي اني عارف لما حفول العربيه حتغلبني في الدواره وانا واقف في البنزينه طبعاً شيء محرج دائماً .... الحمد لله العربيه مهما افول واكبس بنزين في العربيه لغاية الزور تدور من اول لمسه .... والأغلب انه عيب صمام الكانستر لأنه كان ملغي اصلا عندي .
ثانيا : استهلاك البنزين كان عالي اوي عندي كان تفويل العربيه 60 لتر بيعمل 450 كيلو بس حاليا بفول علي 450 كيلو ( عشان المؤشر بيخرف بيبقي جايب e بعد 400 كيلو فبظبط نفسي علي العداد اضمن ) بلاقي التنك لسه فيه ميقلش عن 12 لتر او 10 لتر .
ثالثاً : العربيه كانت بتجيب 150 بالعافيه وساعاة تقف عند 140 وتحلف براس ابوها محتجيب اكتر من كده حاليا جربت اكتر من مره اجيب 150 بتجيب و 160 جابت برده بس لسه مش لاقي فرصه اقرص عليها اشوف اخرها ايه .
واهم شيء عندي في ده كله واكتر حاجه كانت خنقاني أنه لمبة التشك كانت منوره وساعاة كانت تطفي بس علي ار بي ام عالي . والحمد لله اللمبه طفت ودية كانت اكتر حاجه مضيقاني بصراحه مبحبش اشوف اللمبه دية شغاله ابدا بحس اني ماشي بعربيه بايظه طول مهي شغاله قصادي مستني انه العربيه توقف في اي وقت .
وهذه تجربتي ليستفيد بها غيري والحمد لله
http://www.nilemotors.net/Nile/imgcache/2/10alsh3er.jpg
http://www.nilemotors.net/Nile/imgcache/2/11alsh3er.jpg
http://www.nilemotors.net/Nile/imgcache/2/12alsh3er.jpg
http://www.nilemotors.net/Nile/imgcache/2/13alsh3er.jpg
http://www.nilemotors.net/Nile/imgcache/2/14alsh3er.jpg