كام استشاره في السريع حاجات عاوز اجيبها

**محمد العقابي** · 31-03-2013 08:58 AM

أولأً : المؤشر بتاع البنزين مش بيدي مقاسه مظبوط يعني لسه مجرب دلوقتي كان علي الربع الأخير يعني المفروض العربيه تاخد 45 لتر بنزين أخدت 40.5 لتر بالعافيه . ممكن يكون محتاج ايه علشان يتصلح وهل العيب ممكن يكون من العوامه نفسها . ولو محتاج حاجه تتغير يا ريت اجيبها منين برده .

ثانياً : عاوز اعرف مكان أروح أشتري منه صمامات بدون لف او دوران وصفه مباشره عاوز صمام egr . وصمام pvc . علشان كنت ذكرت قبل كده انه بتاع ال egr عندي مكسور وبايظ وبلف ال egr متوصل دايركت علي المانوفيلد .... والصمام التاني ملقتوش راكب عندي اصلا بس فيشته موجوده وانا عرفته من رسمة الماتور . والصور حنزلها تحت .
ويا ريت لو اقرب مكان لوسط البلد احسن مشوار الحرفيين رخم بالنسبه لي بس لو حكمت مش مهم بس اروح علي حد معين او وصفه دقيه يا ريت .

ثالثاً : برده نفس الكلام الفيشه بتاعة الموبينه عندي مدعوكه السلوك بتفلت منها وعملتها معايا امبارح وبهدلتني اول المحور وشكيت في الموبينه انها باظت تاني ومن ستر ربنا ببص بعيني تحت الموبينه لقيت الفيشه في سلكه فالته منها والتانيه بتشاور عقلها . رحت فاصل البطاريه اول حاجه وركنتها علي جمب وطلعت الفيشه لقيت السلوك كلها مش مستحمله لمسه قطعتها كلهم وطلعت البنات وقعدت اوصل فيها علي قد مقدرت ووصلتها اي كلام وكنت خايف تعمل قفله مع بعض تطيرلي الموبينه او الكمبيوتر ولا حاجه وعزلت ما بين الفرد بحتت خشب وكان موال والحمد لله دورت العربيه دارت علي طول وروحت الشغل وهناك فكتها تاني وظبتها علي رواقه بشريط لحام مؤقتاً بس السلوك علي شعره ممكن تفلت تاني .
فعاوز اشتري فيشه زيها واوصلها بلدي الا لو المعجزه تحصل ويكون في منها جديد ولا حاجه والسلك يركب علي البنات علي طول . ممكن الافاده اجيبها منين .

**محمد العقابي** · 02-04-2013 04:19 PM

وكمان نسيت الفلتر عاوز اغير فلتر الهواء اجيب فلتر ايه نوعه وبكام ومنين

**محمد العقابي** · 05-04-2013 04:42 PM

يا مسهل الحال يا كريم يارب

**mostafa mahmod** · 05-04-2013 05:48 PM

فلتر الهوا فيه عادى و سبور
لو عادى الاصلى ب 45 جنيه و ممكن يعد معاك 10 الاف كيلو
و الكورى ب 25 و تغيره على 5 الاف ولا حاجه
.
اما الاسبور فيه انواع كتير و اسعار كتير

**Ahmed Nasser** · 05-04-2013 07:12 PM

بالنسبة للصمامات هتجيبها استراد من اى حد مش شرط الحرفيين
وفيشة الموبينة برضوا من اى حد استراد
اما مؤشر البنزين ده عيبة العوامة بتروح لكهربائى شاطر ويظبطهالك

**محمد العقابي** · 05-04-2013 08:58 PM

المشاركة الأصلية كتبت بواسطة mostafa mahmod

فلتر الهوا فيه عادى و سبور
لو عادى الاصلى ب 45 جنيه و ممكن يعد معاك 10 الاف كيلو
و الكورى ب 25 و تغيره على 5 الاف ولا حاجه
.
اما الاسبور فيه انواع كتير و اسعار كتير

هل صحيح الاسبور افضل ولو افضل عاوز اسم نوع كويس

**mostafa mahmod** · 06-04-2013 11:41 AM

الاسبور افضل ؟؟
و الله هى تضاربت الاقاويل فى الموضوع ده
فيه هنا عضو من فتره عمل اختبارات و جرب كل الفلاتر الاسبور المخروطى و الاسبور اللى بيركب فى العلبه و الاوريجينال و الكل اداله نفس النتيجه
لو عايز تركب سبور و يديلك احسن اداء يبقى تعمله وصله كده ممدوح باشا عاملها و هو يفيدك فيها اكتر بتخلى الفلتر ياخد هوا ساقع مش سخن ( بتبعد الفلتر عن الماتور )
و من احسن الالنواع k&n

**swimmer25** · 06-04-2013 12:31 PM

سعة تانك البنزين كامل 48 لتر ..بالتالي لو إنت علي اخر ربع وأخدت 40 لتر يبقي تمام جدا ومعندكش مشكلة إن شاء الله

**MMamdouh** · 22-04-2013 01:31 PM

احسن حتة هى الفراغ اللى ورا الاكصدام الامامى ناحية اليمين (يمين العربية) و كل اللى انت محتاجة هو انك تعمل وصلة من مواسير الPVC من خرطوم العمة الى المنطقة دى مرورا البفتحة اللى تحت العمة اللى كان فيها الفلتر الاصلى و تركب فى طرفها الفلتر

الK&N طبعا احسن حاجة و يلية السيموتا

MMamdouh