اقتباس المشاركة الأصلية كتبت بواسطة ahmed2801 مشاهدة المشاركة
هى دى تجربتى مع مرور السلام والعياذ بالله انا رخصت على 3 ايام.
واليكم التفاصيل:
اول يوم لازم تعمل مخالفات على النمر القديمة اللى سلمتها سنة 2009 وما حدش يقولك حاجه المواطنين هم اللى بيقولولك تروح كشك التصوير وتجيب ورقة مخالفات على النمر القديمة وتكتب النمر القديمة والجديدة وتقف ف طابور طويل طبعا ده للناس العاديين اللى زينا.... لكن البلطجية بتدخل على الشباك على طول والموظف عارفهم بياخد منهم الورق على طول بعد ما يزعق شوية لزوم الشغل وبينادو بصوت عالى داخل المرور "حد يدفع 10 جنية واجيبلة الورقة" يعنى قائد المرور سامع ..مافيش مشكلة .... وانتظر تحت المظلة ساعة اتنين تلاتة انت وحظك( والجو تحت المظلة نار وفيه مروحة واحدة فقط الكل يتسابق للجلوس تحتها وكأنك قاعد على محطة اتوبيس ف الشارع... شاى.. حاجة ساقعة.. كروت شحن.. محافظ جلد وبلاستيك) ومنتظر تسمع اسمك وتستلم الورقة اللى هى مكتوب فيها ان النمر دى هى هى نفس نمر العربية اللى فيها النمر الجديدة دى يعنى انت لسة ما ابتديتش اجرآت الترخيص وطبعا اليوم باظ الخزنة بتقفل من الساعة 11 ونصف..... تروح تانى يوم تخش على شباك المخالفات وما ادراك ما المخالفات تقف على الشباك وتعافر وانت وحظك توصل للشباك امتى وطبعا البلطجية شغالين الله ينور وبعد ما تسلم الرخصة والورقة بتاعت امبارح يكون فات ما يقرب من ساعتين وتنتظر تسمع اسمك وبعد ييجى ساعة وشوية ينده على اسمك ويقولك قيمة الغرامة او5 جنية لو مافيش مخالفات تدفع ويقولك استنى شوية وتستنى الشوية الله اعلم قد اية وينده على اسمك ويسلمك الايصال وبرأة الذمة للمخالفات كل ده انت لسة ما بدأتش اجرآت الترخيص تجرى على الشبابيك تلاقى عليها كوم من البشر لو انت جدع توصل للشباك المهم وبعد عناء شديد من الزحمة والتدخين ف الحر ده وصلت الشباك قلى هات ورق دفع الضريبة من كشك التصوير جريت على كشك التصوير وجبت الورق ورجعت تانى للشباك..... "خلاص ياخونا الخزنة قفلت تعالو بكرة" قلت اعمل حاجة بدل ما اليوم يروح كدةعلى الفاضى عملت التأمين الاجبارى وروّحت ع البيت... تالت يوم روحت كنت امام الشباك الساعة 8 صباحا لقيت ناس كتير (جم امتى دول ولا بايتين من امبارح الله اعلم) الشباك فتح الساعة 9 وربع واول ما فتح "نظام ياجدعان طابور" بعد شوية الطابور اتبعكك والبلطجية اشتغلوا وده بيسأل على حاجة " انا مش ح اعمل حاجة انا ح اسألو بس" شوية والزعيق اشتغل وبقى على الشباك كوم بشر والجدع اللى يوصل المهم وصلت كتب رقم الرخصة واداها للعسكرى علشان يجيب الملف وقالى استنى شوية بعد نصف ساعة جه الملف واخد منى ورق الضريبة اللى اشتريته امبارح وكتب وروحت الخزنة طابور طويل ما فيش غير شباك واحد لتحصيل الرسوم وشباك تانى لشراء استمارة التجديد .. خلصت الطابورين ورجعت للشباك تانى لسة عليه نفس الكوم من البشر عافرت ووصلت "استنى شوية انت مش شايفنى باشتغل" ماشى وبعد شوية اخد الورق "انت جايبلى الورق ف يدك.... هات ملف"حاضر... جريت جبت ملف ورجعتله تانى الحمد لله اخد الورق وكتب وقالى انتظر تحت المظلة.
الساعة 2 ونصف نده على اسمى واستلمت الرخصة اخيرا الحمد لله.
ملحوظة هامة : ميعاد ترخيصى 5 مارس وكل يوم اقول بكرة لغاية شهر مايو علشان العذاب اللى بنشوفه زى ما شرحت لحضراتكم.
انا اسف طولت عليكم هى دى تجربتى مع مرور السلام كل سنة علشان ما حدش يقول اننا بنتجنى عليه.
حمداً لله على سلامتك يا بطل
انت بطل من الابطال الى خلصو تجديد الرخصه في المرور الملعونة دي هههههههههههه
الف مبروك وعقبال التجديد الى جاي وعليك خير بقي