الموضوع: سيكولوجيا السائق المصري

المشاركة الأصلية كتبت بواسطة janagabr

سيكولوجيا السائق المصري

السائق المصري هو ذلك الكائن غريب الاطوار المصاب بالانفصام في الشخصية والذي يعاني من الكثير من الامراض النفسية التي بالتبعية تؤثر علي غيره من الاصحاء

تعالوا نتعرف علي ذلك الكائن العجيب ؟؟؟؟؟؟؟؟

1- لما تلاقي واحد راكن صف تاني علي الرغم من وجود اماكن فاضية بس هو مكسل يركن فيها بيقولك هما خمس دقائق وهمشي هي هتيجي علي ده يعني انا اللي هوقف الطريق وياسلام لو الطريق ضيق ويجي واحد يبصله بصة مش تمام تلاقيه عايز يتخانق معاه وكانه راكن زي الناس الطبيعيين وتلاقيه مش فاهم انه بيعمل حاجة غلط

2- لما تلاقي واحد ماسك الشمال وماشي علي مهله تزمرله وترعشله عشان يفوق مفيش تقوم معدي من علي يمينه وتبصله تلاقي في غيبوبه ومش فاهم انه بيعمل حاجة غلط

3- لما تلاقي واحد بيكلم في الموبايل وماشي علي مهله ومعطل الشارع طاب يااخي اركن واتكلم ولا خد يمينك طاب انت شخص مبتعرفش تسوق وتتكلم في الموبايل في نفس الوقت بتكلم ليه اعرف قدرات نفسك طالما عقلك لا يستوعب عمل حاجتين في نفس الوقت وبرده مش فاهم انه بيعمل حاجة غلط

4- لما تلاقي واحد ماشي وفجاة يقف عشان يركن يجي اللي وراه يزمرله ويلزق فيه والتاني واقف عشان يركن يقوم راجع ورا ويخلي اللي وراه يرجع ورا عشان يركن طاب يابني ماتشغل الاختراع اللي اسمه زرار الانتظار ولا هو بيسحب كهرباء من بيتكوا بفلوس ومش فاهم انه بيعمل حاجة غلط

5- لما تلاقي واحد فاتته اللفة يقوم يرجع بضهره وعايز يقطع الشارع بالعرض عشان يلف يقوم موقف الشارع وتلاقيه عمال يشتم الناس ويقولك انت مستعجل علي ايه انت معندكش صبر وبرده مش فاهم انه بيعمل حاجة غلط

6- لما تلاقي واحد بيقف في نص الشارع عشان يركب صاحبه او ينزل حد من العربية وياسلام لو بيركب حد كبير في السن ويوقف الشارع والناس تزمله
تلاقيه بيقولك انت معندكش رحمه طاب ياابني متركن عدل جنب الرصيف وتخلي الراجل الكبير في السن يركب براحته وتلاقيه مش فاهم انه بيعمل حاجة غلط

7- لما تلاقي واحد ماشي علي مهله في الصحراوي او علي طريق سريع وماشي في نصف الطريق او الشمال طاب متمسك يمينك او شغل الانتظار وتلاقيه بيتمني ان كل العربيات اللي بتعديه تتخبط عشان يحس انه صح وتلاقيه مش فاهم انه بيعمل حاجة غلط

8- لما تلاقي واحد بيلف يمين ولا شمال بدون ما يدي اشارات ولا ماشي وسايب الاشارة شغاله في ناحيه وهو بيلف ناحيه تانية وتلاقيه مش فاهك انه بيعمل حاجة غلط

9- لما تلاقي واحد ماشي عكسي ومشغل النور العالي والناس تشتمه تلاقيه مضايق ويقولك مش عاجبك وبرده مش فاعم انه بيعمل حاجة غلط

لما تلاقي ..............................!!!!!!!!!!!!!!!!!

وما اكثر الافعال الغلط التي تتفنن فيها ايها الكائن العجيب يا لك من مبدع تستحق جائزة نوبيل في الغباء

الا من رحم ربي

ذلك الكائن قد يكون متعلم وغني وذو اسرة راقية
وقد يكون فقير وجاهل وذو اسرة محدودة الدخل

الموضوع مالوش علاقة بالكلام ده

العلاقة بتيجي من ادراكك وقدرتك علي التفريق بين الخاص والعام بين حدودك وحدود غيرك وحدود الدوله بين مدي ثقافتك وتطلعك علي العالم وعلي الاخريين لتحديد مستواك بين الفئات المختلفة وبين شعوب العالم

لماذا عندما نزور بلاد برة بنعجب بيها ونشتم بلادنا علي الرغم من اننا من فعلنا هذا ببلادنا !!!!!!!!!!!!

هذة سلوكيات افراد ولا دخل للحكومة فيها الا من خلال امور بسيطة لها علاقة بصلاحية الطريق والرصيف والباركينج وما الي اخرة

ما علاقة الحكومة برمي الزبالة في الشارع او الركن صف تاني او السير العكسي او الزماره علي الفاضي والمليان !!!!!!!!!!!

هل لاسرائيل التي بنعلق عليها فشلنا دخل بهذة السلوكيات الخاطئة

اتظن من يفعل هذة السلوكيات بانه شخص سوي ناضج في بيته او عمله او علاقته بالاخريين

فالشارع وسلوكيات السائقيين ما هي الا مراه لعكس ثقافة الشعب من حيث احترامه للقانون واحترامه لذاتة وللاخريين

اتظن انك افلت من عقاب المرور فانت غشيم

فهناك من يرصد تحركاتنا وسلوكياتنا ومن يدقق في افعالنا ويصنفها هناك من يراك وانت لا تدري ويمهل لك ولا يهملك فينزل بك العقاب في الحال او ينزله في صحتك او اسرتك وقد ينزله بك في شيخوختك او ياويله من ينزل به العقاب يوم القيامة

اده هو يوم القيامة ده موجود بجد ولا هزار !!!!!!!!!!!!!!!!!!!!!

اده هو انا هموت بجد !!!!!!!!!!! علي رأي قدوتنا ومثلنا الاعلي يا راجل كبر مخك منا عايش بقالي كتير

اتظن انه نسي فعلتك اتظن انك نجوت بفعلتك اتظن انك انتصرت علي غيرك بفعلتك ههههههههههههههههههه يالك من فاشل الم يكفيك فشلك في السواقة كما غبي انت لمتخصص في الفشل

( ان ربك لبرمرصاد )

نسال الله تعالي ان يهدينا لما فيه الخير وينور بصيرتنا ويرشدنا الي الصواب
مش عارف الموضوع قلب دين ليه في الاخر
بس الهدف من الموضوع ادراكنا لافعالنا وسلوكياتنا وتصحيحها

السؤال : هو في امل ان تختفي او حتي تقل هذة السلوكيات من مجتمعنا ؟

هل عندي القدرة للسيطرة علي نفسي وتغيرها للاحسن..................... يارب

هما كلمتين موجهين ليك

(( دعني احييك ))

وماتنساش ان السواق المصري احسن سواق في العالم
بيفادي
1- اطفال
2-شوارع مبهدله
3-بلاعات
4-رصيف مش كامل
5-مطبات مش سليمه مرتفعة
6-اخطاء السواقين غيرة
7-مياه صرف
8-دقشوم واسفلت غير مكتمل

نسيت حاجه ..
ممكن يمشي كمان بدون (( بنزين ))

هو فيه سيكولوجية أساسا! ههههههههههه