بداية التبرعات لمجلس الشورى:مصر تلعب مباراة ودية والإيراد لإعادة بناء مبنى مجلس الشور

**MoToRiZeR** · 21-08-2008 01:08 AM

المشاركة الأصلية كتبت بواسطة Hossam_Hassan

سؤال برىء، ياترى تكلفة استضافة "منتخب عالمى" هتبقى كام؟

انا كنت داخل اقول كدة ... هي الناس دي فاكرينا ايه !!!!!!!!!!!

عامة حتي لو منتخب العالم هييجي يلاعبنا ببلاش و بتيشيرتات عليها صورة مجلس الشوري .. ولا مليم

**OlaOsman** · 21-08-2008 01:18 AM

و انا عن نفسي اللي اعرف انه راح هاقاطعه بقية حياتي .. بس.. هه

**hamedo0** · 21-08-2008 01:26 AM

المشاركة الأصلية كتبت بواسطة OlaOsman

و انا عن نفسي اللي اعرف انه راح هاقاطعه بقية حياتي .. بس.. هه

مافيش حد يقدر علي زعليك يا استاذه

**elpasha009** · 21-08-2008 01:43 AM

هههههههههههههههههههه
إنتوا فاكرين إنكم لما تقاطعوا المبارة الحكومة هتغلب:)أبداااااااااااااااا اااااااااا
اللي هيحصل بالظبط إنهم هيلموا العمال من مصانع عز وبهجت وأبو العنين.......ألخ في الأوتوبيسات ويشحنوهم على الإستاد ويخصموا تمن التذكرة من المرتب ويقولوا عمال مصر إتبرعت لبناء مجلس الشورى:)

**د-احمد عبد اللطيف** · 21-08-2008 05:57 AM

اللي انا نفسي افهمه ازاي الحريق اتأخر لدلوقت احنا كلنا عارفين ان مواعيد الجرد السنوي في اول يوليو يبقي ازاي الحريق اتاخر لاخر اغسطس
وبعد التبرعات ما تتلم ياتري حيبقى في حريق تاني وللا ايه
ولما عز يتبرع ياتري حياخد اعفاء ضريبي على التبرعات وللا ايه
ياريت حد يقولى

**MOHAMED ABD EL SHAFY** · 21-08-2008 09:36 AM

طب احنا فيها
الاخوة الاعيبة المغوارين البواسل حصدوا من ماتش السودان 35 سيارة كهدية
يعنى لو السيارة بمتوسط 100 الف جنية يبقوا 3.5 مليون جنية
ممكن بقى احد معرض السيارات مشكورا يشتريهم ويبعهم لصالح مجلس الشعب
ولا الاخوة الاعيبة اصحاب الملايين اللى احدهم دخلة السنوى 3 مليون وهرب عشان (عاوز يكون نفسة)
مش هيردوا يتبرعوا بالعربيات الهدية
وهيقولوا الهديه لا تباع ولا تشترى
انا دمى اتحرق
شوية عيال بيلعبوا بيجنوا الملايين
واصحاب العقول والخبرات والعلماء والدكاترة والمهندسيين مش لاقيين شغل ويادوب بيكفوا اكلهم بالعافية
البلد دى لازم تروح فى داهية

**meza** · 21-08-2008 10:21 AM

محسسنتى إن مجلس الشورى ده ... مستشفى سرطان الأطفال الجديد.

سبحان الله ..

سيخصص إيراد المباراة بالكامل الذي قد يصل إلى أربعة ملايين جنيه مصري (نحو 750 الف دولار) للمساهمة في إعادة تشييد مبنى مجلس الشورى المصري

الحكومة اللى متعرفش تتحصل على 4 مليون و تشحتهم من شعبها ... تبقى لا مؤاخذة مش حكومة.

**aliabutaleb** · 21-08-2008 10:38 AM

والله اعتقد إن الأولى إنهم يتنازلوا عن جزء من مكافآتهم الباهظة
او يدفعوا من جيبهم جزء من الاعفاءات الضريبية او الامتيازات اللي واخدينها منه بالحلال
ما علينا من الحرام اللي بتتناوله الشائعات
وكفاية بقى إقحام المنتخب في السياسة
مش معنى إن رئيس الاتحاد ونائب الرئيس وآخرين في مجلس الاتحاد أعضاء في المجلسين وفي الحزب الحاكم يبقى نسيس نشاطات المنتخب بالشكل ده
امبارح قبل مباراة السودان كل ما حد من الجهاز او من اللاعبين يتكلم يقوللك جايين نلاعب اشقائنا ونناصر الرئيس السوداني الشقيق في اللي بيحصل
ولا حد عارف ايه اللي بيحصل
ولا حتى دارفور دي فين
تلاقي تلات أرباعهم فاكرينها آخر خط ميكروباس أرض اللوا

**sab3aawy** · 21-08-2008 10:39 AM

وابتدينا الشحاتة

هى المشكلة انا عايز اعرف من اللى هيدفع قرش صاخ يوجه لانشاء مبنى يتم فيه سن السكاكين التى نذبح بها يوميا

لكن هم لما يلاقوا ان الشحاتة بالذوق مش نافعة هيتم طباعة ايصالات معونة شورى على غرار معونة الشتا وهتتباع اجبارى فى كل الجهات الحكومية اللى بتقدم خدمات للمواطنين(بطاقة-باسبور-رخصة قيادة-ترخيص بناء-ايصال كهرباء) وهنكع هنكع

هم يولعوه واحنا نكوعوه

**sab3aawy** · 21-08-2008 10:45 AM

المشاركة الأصلية كتبت بواسطة alijandroo

امبارح قبل مباراة السودان كل ما حد من الجهاز او من اللاعبين يتكلم يقوللك جايين نلاعب اشقائنا ونناصر الرئيس السوداني الشقيق في اللي بيحصل
ولا حد عارف ايه اللي بيحصل
ولا حتى دارفور دي فين
تلاقي تلات أرباعهم فاكرينها آخر خط ميكروباس أرض اللوا

هى فين ارض اللوا دى؟