ارجو النصيحة لشراء لوجان مانيوال

**AboHamza2011** · 19-05-2013 09:49 PM

السلام عليكم

ناوي إن شاء الله اشتري لوجان مانيول هاف اوبشن ليه هاف عشان انا كنت خلاص هشتري لانوس شيفروليه وبعدين قلت لنفسي ازنقك نفسك ودبر 5 الاف كمان واشتري لوجان او افيو بس انا الصراحة نفسي اركب اروبا بحس اشيك وانضف من الكوري كمان حاسس ان الافيو اضيق والهاف اوبشن تكييف وباور بس فارجو المساعدة والنصيحة والرأي

يعني الموتور كويس العفسة التوكيل الثبات وكده

شكرا

**aboamina** · 19-05-2013 11:59 PM

مميزات اللوجان :
كبر الصالون والشنطة , كبر تنك البنزين , عالية وماتحكش في المطبات خالص , بعد خمس سنين استخدام معايا الموتور كقوة واساسيات العفشة كعمر افتراضي ماشفتش منها مشاكل , موفرة في البنزين , شكلها اشيك وافخم من اللانوس والفيرنا من وجهة نظري

عيوبها :
سحبها ضعيف قوي قدام اللانوس والفيرنا لكن بعد ما بتجمع سرعتها يمكن بتتفوق عنهم , صوت الموتور عالي بصورة مستفزة , التكييف ضعيف , الدركسيون تقيل , ثباتها ضعيف لكن اعتقد احسن من اللانوس والفيرنا اللي ركبتهم بنفسي لكن معرفش اي حاجة عن الافيو عشان ماركبتهاش , قطع غيارها الاصلية غالية جدا لكن عمرها الافتراضي اطول من قطع غيار الكوري , مش اي ميكانيكي او كهربائي يشتغل فيها عكس الكوري , اتقل في اعادة البيع من الكوري اللي ممكن تبيعه في نص ساعة

اكيد زودت حيرتك بس انا ركبت الفيرنا واللوجان ومش سهل عليا اقول ايهما احسن في المجمل لكن كل واحد فينا له نقاط فاصلة في العربية اللي هيشتريها بتختلف من واحد للتاني يعني انا لظروف سفري الكتير شايف ان الثبات اهم حاجة في العربية عشان كدة قررت اشتري لانسر بومة مستعملة احسن من لوجان او لانوس زيرو .
ربنا يوفقك في القرار الصح والمناسب ليك

**AboHamza2011** · 20-05-2013 07:42 PM

ايه يا شباب هو انا دخلت اسال في منتدي غلط محدش عندوه نصيحة او راي

**ysamerlabib** · 21-05-2013 01:37 PM

انا كان معايا اللانوس الكوري ( مش بتاعة اليومين دول ) ودلوقتي معايا لوجان 2010 هاف

اقولك على الفروق

اللانوس قطع الغيار رخيصة جدا مقارنة باللوجان (بس اللوجان مش غالية برضة زيها زي العربيات الزيرو هي اغلى من الكوري وارخص من الاوربي _ بيجو مثلا او ستروين)

شغل الميكانيكا : طبعا اللانوس عند الاسطى بلية تعمل الشغل اللي انت عايزة ... اللوجان لو حد افتى فيها .. انسى .... بس اللوجان بدأت تنتشر قوي وبقى في مراكز كتير شغالة فيها وزي الفل

السحب : اللانوس افضل بس اللوجان لما تجمع سرعتها انسى اللانوس

استهلاك البنزين : اللوجان افضل بكتيييييييييييييييييييييي يييييييييييييييير

الوسع : اللوجان اوسع بكتيييييييييييييييييييييي ييير

الافيو مقارنة باللانوس واللوجان : لا تعليق

ملحوظة : انا معايا دلوقتي اوبترا ولوجان .. فالمقارنات دي كانت على اللانوس القديمة

**AboHamza2011** · 21-05-2013 10:04 PM

الف شكر وياريت ايه اخبار العفشة وايه موضوع الكاوتش الا ناس بتتكلم عليه ياريت الافاده لان انا بجمع فلوس العربية والشراء في خلال اسبوع

**AboHamza2011** · 23-05-2013 03:34 AM

طب ممكن تقرير عن لوجان مانيوال

**AboHamza2011** · 23-05-2013 03:35 AM

لينك لموضوع قديم يعني

**Egyzizo** · 23-05-2013 07:24 AM

ده من أحسن التقارير هنا :
http://www.nilemotors.net/Nile/90472-2010.html

مع الوضع فى الاعتبار ان الكاسيت فى الموديلات الأحدث MP3 ، وفيه multifunction فى الطارة على ما أظن.

**the lawyer** · 23-05-2013 11:27 PM

ايمجراند .... من غير تفكير انسى اللوجان بسعرها الحالي

**MIDOBROKERAGE** · 04-06-2013 12:39 PM

انا معايا رينو لوجان 2010 بصراحة عربية ممتازة واسعة عالية عن الارض كمان فى حاجة ان العربية رخيصة عن ثمنها 20000جم الجمارك يعنى يباه اكيد فئتها كويسة لانها لو فى جمارك تبأه 94000جم
وموضوع قطع الغيار هو يمكن غالى شوية بس معمر ومش كل قطع الغيار لازم تجيبها فرنساوى فى اسبانى وكورى بيمشى وربنا يوفقك