المشاركة الأصلية كتبت بواسطة karim ibiza
والله ياجماعة الموضوع بقى صعب قوى وبقى محير, الحق بقى ضايع والغلط بقى صح والأصول بقت معدومة
الموضوع بقى ليه وجهات نظر كتير والمشكلة ان كلهم ممكن يبقوا صح لو كل واحد حط نفسه مكان صاحب وجهة النظر دى
وجهة النظر الأولى:
يبقى عندى عمارة ومش عارف اركن قدام بيتى؟؟؟؟
وجهة النظر الثانية:
أبقى ساكن فى عمارة ومش عارف اركن قدامها؟؟؟؟
وجهة النظر الثالثة:
انا اركن فى الحتة اللى تعجنى لأن الشارع ملكية عامة
وجهة النظر الرابعة:
ده محل أكل عيش وباب رزق ومينفعش تقف قدامه
وجهة النظر الخامسة:
كل واحد يركن قدام بيته
طيب ولو ملقيتش مكان قدام بيتى
مش مشكلتى وروح شوفلك جراج تركن فيه
فيه جملة عجبتنى قوى قرأتها على ضهر عربية ميكروباص بتقول: ازاى أمشى عِدل والطريق عِوج
ولو طبقنا الجملة دى على موضوعنا يبقى هنقول ازاى هتقولى ملكية عامة وحق عام وفيه قوانين كتير بيتم تجاوزها سواء بالتقاعص او بالرشاوى ومش بتتطبق
يعنى ماهى كل حاجة فى البلد ماشية من غير قانون, جت على دى وهتمشى بالقانون؟؟؟!!!!!!
على فكرة انا كنت من أنصار وجهة النظر دى اللى بتدينى الحق انى اركن فى اى مكان طالما ملكية عامة وعلى فكرة انا ساكن فى شارع جانبى فى شقة ايجار قديم فى عمارة 6 ادوار والدور فيه شقتين والعمارة كلها فيها 4 عربيات وفيه محل تحت البيت ومع ذلك مش بعرف اركن تحت بيتى وبضطر انى اطلع اركن على الشارع العمومى وطبعا بيكون قدام عمارة وفيها سكان وعربيات
الموضوع اصبح مش حقى وحقك فى ظل كل حاجة بقت مسموحة حتى لو فيه قانون بيجرمها
الموضوع اصبح بطريقتين:
الطريقة الأولى: العافية
وده شغل بلطجة والعيلة اللى مفيهاش صايع حقها ضايع والكلام الهتش ده وفى الأخر بتقلب بنكد وده يجيب ناس وده يجيب ناس وتبقى حرب أهلية بسبب فرض السيطرة على مكان معين
وبكده يبقى مبقاش فيه فرق بيننا وبين الحيوانات زى الحيوان الذكر اللى لازم يفرض سيطرته على منطقته عن طريق التبول على حدودها
الطريقة الثانية: الذوق
راعينى أراعيك
شيلنى وأشيلك
متقوليش حقى وحقك لأن مفيش حد هيجيبهولك غير دراعك وملهاش لازمة الامور توصل لكده لأن كلها تعرف بعضها (هتجيبلى ناس, هجيبلك ناس)
بلاش كل واحد يبقى أنانى ويقول مليش دعوة, انا ركنت خلاص
ولا يركن عربيته بطريقة معينة عشان ميخليش حد يركن تانى
لازم زى ما لقيت مكان تركن فيه,يبقى تفكر فى جارك لما يجى هيركن فين ومتقولش مليش فيه وحاول توسعله عشان يركن جنبك او قدامك وتنسقوا مواعيدكم مع بعض
لازم نتعايش مع الوضع لأن كلنا فى مركب واحدة واللى بتعمله فى حد النهارده هيتعمل فيك بكرة
الأعضاء الى بتستشهد بأمثلة من أمريكا او اوروبا او اليابان, حاجة جميلة والنظام حلو مفيش كلام, بس لما نلاقى اللى يطبقهولنا ويدى كل واحد حقه, وكل بلد ليها ظروفها وامكانياتها وكل شعب ليه ثقافته
طيب ايه الحل؟؟؟
الحل ان كل مجموعة تنسق مع بعضها من ناحية المواعيد وطريقة الركن اللى بيها نقدر اننا نستغل المساخات بدون تهدير عشان تشيل اكبر عدد ممكن من العربيات وممكن تجيبوا سايس هو اللى يبقى مسؤل عن الموضوع ده مقابل مبلغ رمزى من كل مالك عربية
الحل ان بدل ما نفضل نبنى فى ابراج سكنية والحمد لله مبقاش عندنا ازمة فى الشقق وبقت على قفا مين يشيل, نستغل الارض ونعمل جراج بطوابق متعددة وبأجر مش كبير وهيدخل لصاحب الأرض دخل شهرى كبير ومش هيكلفه زى ما هيكلف البرج السكنى وهيبقى حل ازمة منطقة بحالها
معلش انا طولت عليكم, بس الموضوع قلب عليا المواجع