عاوز رأيكم فى بيع الاوبل بتاعتى

**tofy0123** · 20-05-2013 02:45 PM

السلام عليكم
يا جماعه انا عندى عربيه اوبل فكترا موديل 1997 احمر مارلبوروا 1600
العربيه دى انا اشترتها بى من شهرين انا مش هبالغ لو قلت انها انظف عربيه اوبل شفتها فى حياتى لانها بحالة المصنع تماما
- هيه دوكو شركه برا وجوه عامله 83 الف عداد حقيقى لان صاحبها اللى اشتريتها منه كان رافعها بدون خرابيش حتى وكمان بدليات الكاوتش تكتات المصنع والوكيل حتى الان
دى الاكصدامات الاصليه كانت راكبه فيها بدوكوا الشركه بس للامانه كان شكلهم وحش رحت جايبلها 2 اكصدام بشبوره ودهنتهم ومفتلح شيوره اصلى
- المتور الاسود الاصلى وحالتها لو فى اعلى من الممتازه نقولها عليها والله العظيم
- وكمان ركبتلها 2 زجاج كهرباء اصلى خلفى على ضفيرتها الاصليه ومفتاح رباعى اصلى وزراير ازاز اصلى فى الاواب
- وكمان ركبتلها 2 مرايا كهربه على ضفيرة العربيه الاصليه بالفتاح الاصلى
-يعنى العربيه 1600 فيها كماليات ال2000 وكلها اصليه
- طب تخيلوا انا معايا ال2 مفتاح الاصلى والريموت والاصلى وشغالين وكمان الكتالوج
- وكمان عملتلها عفشه كامله 4 مساعدين جميع الجلب اصليه وكمان مغير جلب الكمره الاماميه
-وكافة الصيانات معموله بوجيهات فلتر زيت كل السيور تنظيف دورة التبريد
- والكاسيت الاصلى شغال فيها
- وكمان جايبلها طقم فرش حلد على الكراسى رائع بخياطه حمرا بلون العربيه
-وكمان معايا جنوط سبور جى ام مقاس 15 بس لسا مركبتهاش
اه قى حاجه مهمه نسيت اقولها العربيه دى من جوه اسود مش رمادى فرش كراسى ابواب فبر وده اصلى فيها ومحدش يقولى دى خليجى عشان علامة منصور النيكل عليها اللى فى شمال الشنطه وعلامة الزجاج الامامى موجوده
يعنى والله العظيم اللى هيشتريها مش هيصرف جنيه غير الزيت والبنزين ده الحاله دى تفوق اللى انا بوصفه
المهم العربيه دى بتمنها كلفتنى فى حدود 80 الف وتزيد والله العظيم
لو حبيت ابيعها تساوى كام دلوقتى مع انى لسا شريها من 3 شهور؟؟؟؟؟؟؟؟؟؟؟؟؟؟؟؟؟

**mifs** · 20-05-2013 03:26 PM

نصيحة بلاش تبيعها
تكلفة 80000 ده رقم خيالي وهتزعل من الاسعار اللي هتسمعها
لانها هتكون في الخمسينات

**drmsadek1979** · 20-05-2013 03:28 PM

المشاركة الأصلية كتبت بواسطة mifs

نصيحة بلاش تبيعها
تكلفة 80000 ده رقم خيالي وهتزعل من الاسعار اللي هتسمعها
لانها هتكون في الخمسينات

تمام جدا دا سعرها حقيقي

**lamada** · 20-05-2013 03:30 PM

50 و شوية

**temeey** · 20-05-2013 03:32 PM

فى رايي الشخصى سعرها فى السوق لا يتعدى الخمسين الف مهما كانت حالتها.

**MaaM** · 20-05-2013 03:37 PM

باردوا زي ما قلت قبل كدا ، قول انت عايز تبيعها بكام لأن فيه نية للشراء
لكن نصيحة لوجه لله ، ماتبيعهاش طالما بالمواصفات ديه ، لانك مش هاتقدر تجيب الرقم اللي دفعته فيها
وحتى اللي هايقدّر اللي دفعته فيها ، باردوا مش هايقدر يعدي رينج معين في الفلوس على فئة معينة
80 الف يجيبوا فئة اعلى بكتير منها

**zizo50001** · 20-05-2013 04:18 PM

بص هو فعلا العربية ليها فئة معينة بس طبعا بيبقى فى عربيات ممكن تعدى سعرها على حسب الحالة و على حسب المصروف عليها وعلى حسب اللى هيقدر
المهم انا شايف انا سعرها ممكن يبقى 55 الف ممكن تزيد شوية
بس سؤال معلش الزرار الرباعى و المكن الخلفى و الزاراير كلفك كام ؟

**ayman hamdy** · 20-05-2013 04:18 PM

العربية دي فعلا حالة نادرة وخسارة تبعها ولو بعتها مش هتلائ زيها تاني ممكن اعرف حضرتك عايز تبيعها ليه هية قيمة احسن من ال٥٠الف بلبل ولا اكتر حتى العربية دي مش هيعرف قيمتها غيرك لانك انت اللى صرفت عليا وعارفها نصيحة منى متبعاش غير لواحد ركييب علشان يقدر قيمتها

**tofy0123** · 20-05-2013 04:31 PM

المشاركة الأصلية كتبت بواسطة zizo50001

بص هو فعلا العربية ليها فئة معينة بس طبعا بيبقى فى عربيات ممكن تعدى سعرها على حسب الحالة و على حسب المصروف عليها وعلى حسب اللى هيقدر
المهم انا شايف انا سعرها ممكن يبقى 55 الف ممكن تزيد شوية
بس سؤال معلش الزرار الرباعى و المكن الخلفى و الزاراير كلفك كام ؟

الزرار الرباعى 450 مكن خلفى 600 زراير البواب 100 للواحد
بس على فكره المكن الاصلى الخلفى بتفك برشام المكن اللى عندك وتبرشم جديد بدون ولا حتى خرم واحد فى الباب
والمرايات ال 2 ب500 بالسخانات وشغاله مفتاح المرايات 150