المسلسلات التركية المدبلجة (مكنتش ناقصة مسلسل نور ده كمان)

**sherif_84** · 21-08-2008 06:31 PM

بس بجد ياجماعة سيبكوا من مهند ونور والكلام الفاضى ده

بما اننا فى منتدى سيارات أحلى حاجة عجبتنى فى المسلسل ده العربية الشاهين التركى ( : والله جامدة قوووى
ونفسى تنزل مصر عشان أركبها ونرتاح شوية من الشاهين المصرى ومن عيوب تقفيلها

**OlaOsman** · 22-08-2008 02:41 PM

لحد دلوقتي باسمع عنه بس و ماشفتش منه و لا حلقة و ماحاولتش.. بس الهوس ده مش غريب علينا.. مين فاكر أميتاب باتشان لما جه مصر في التسعينات المهازل اللي حصلت من بنات مصر؟ هونفسه أيامها استغرب من الشعبية الجارفة دي ليه في مصر وماكانش يعرف ان الناس مهووسة بيه للدرجة دي

**دموع الثلج** · 22-08-2008 04:31 PM

انا مش هقدر ادلـــــــــــــــو بجــردلى فى الموضوع ده لانى بتفرج على مسلسل سنوات الضياع اربع مرات فى اليوم

وموافقه على كل السلبيات اللى كتبتهوها بس القصه والتمثيل وروح التعاون بين الجيران وحاجات كثيره حلوه فى المسلسل اتمنى لو ترجع لمجتمعنا المصرى ونبقى ربع الاتراك فيها

**SaLM!Na** · 22-08-2008 06:19 PM

ياجماعة الواضح ان معظمكوا ما شفش المسلسل و بتهاجموا جامد اوي
انا متابعة المسلسل بقالي فترة طويلة
لا هو يخدش الحياء و لا هو بينشر الرذيلة
المسلسل عادي جدا زي اي مسلسل عربي
بل بالعكس ده بيعرض مشاكل كل اسرة و ازاي بيحلوها
و كمان تصوير المسلسل في الشتاء يعني اللبس مش اباحي زي ما انتوا فاكرين
لبسهم زي لبس المصريين عادي جدا

هو لو كان مسلسل نور ده مصري كنتوا هتهاجموا كده؟

و يا استاذ كريم منير المسلسل مش تافه و مش بيلهى عن العباده
مفيش حد مجبر انه يشوف المسلسل يوم الخميس 5 ساعات في حين انه ممكن يشوفو كل يوم ساعة كترويح عن النفس مش اكتر
لو على الصلاه المسلسل مش بيتعارض مع مواقيتها و بييجي بعد العشاء و لو على قيام الليل ممكن تقيم بعد المسلسل
الحاجة المنتقدة بشده دليل على نجاحها و ياريت حد فيكوا يتفرج و لو على حلقة واحدة و يقول في اباحية زي ما بتقولوا و لا لأ

**Ashraf A.Kader** · 22-08-2008 06:45 PM

احسن حاجة في المسلسل ده انه بيبقي الوقت الوحيد اللي تريح دماغك فيه من كل اللي بالمنزل وتعمل اللي انت عايزه بحرية مطلقة اكتر من ماتشات الاهلي والزمالك ههههههههههه

**Bossy_Fadl** · 22-08-2008 11:42 PM

انا يا جماعه عمري ما كنت باشوف المسلسل لحد من اربع ايام بالظبط

و طبعا كنت مستغربه جدا كمية الاعجاب و الهوس الشديد بالمسلسل

لاني عموما مش باحب الافورة في ردود الفعل

يعني اوكي مسلسل او فيلم عجبني خلاص مش هاعمل لصاحبه تمثال يعني

عمل ناجح و خلصنا مش مستاهله بقي هيصه كتير

بس انا لما شوفت المسلسل فهمت ليه الناس عامله عليه كل ده

لان المسلسل و صناعه عرفوا ازاي يجبروا المشاهد علي مشاهدته

بمنتهي البساطه بعدوا عن السياسه و العنف و الدم و الاكشن و الكوميديا الفارص بتاعه اللي ما يتسمي محمد سعد اللي خربها و قعد علي تلها

و ركزوا علي حاجة واحده بس بقت مفقودة في حياتنا للاسف

الرومانسيــــــــــــــــ ــــــــــة

لو الناس واخده انهم يتفرجو علي حاجات رومانسية و قصص حب بجد يقدرو يعيشوا معاها و يلاقو فيها متنفس طبيعي للهموم اللي الواحد بيقابلها كل يوم ماكانوش عملو كل الهوليله دي علي مسلسل تركي

بس الناس لقت في المسلسل ملجأ من العواصف اليومية بتاعه الغلا و كيلو البطاطس بقي بكام و السياسه و ياتري هو مجلس الشوري اتحرق لوحده و لا حد ولع فيه بجاز

انا شخصيا مش بشكر في المسلسل شكر فظيع و مش بادافع عنه و الحركات الاوفر دي

بس في منتهي البساطه انا محايده

يعني لقيت ان المسلسل فعلا مافيهوش حاجة زياده و لا خارجة عن اللي بيحصل في كل افلامنا و مسلسلاتنا

الابطال حوارهم محترم جدا و لبسهم عادي جدا

و القصه جميله و تشد بجد لانها رومانسية راقيه

يعني لو الواحد شاف الحلقه كل يوم كمتنفس عن ضغوط اليوم و في نفس الوقت عوض شوية من الرومانسية المفقودة في حياته و لو في صورة مسلسل فيبقي شيء مش عيب و لا غلط يعني

و خلونا نعترف ان الاتراك اذكيا و عرفو ازاي يستقطبو المشاهد العربي

هما دورو الخلل و النقص عندنا في الدراما بتاعتنا فين و عوضوه

بس

نقطه في صالحهم و من حقهم اننا نحييهم

مش لازم نهاجم لمجرد الهجوم

انا بعيد كلامي اني ضد كل ردود الفعل الاوفر و الحركات اللي مالهاش اي لازمة دي

و يعني يوم ما افكر احب فارس احلامي عمره ما هيكون مهند يعني

لحسن حد يفتكر اني كالعاده بدافع عن المسلسل عشان البطل( امور) و الكلام الغريب ده

_و الله مانا شايفاه امور و لا حاجة خالص_

بس في نفس الوقت المسلسل حلو و راقي

ارجو اكون قدرت اوضح وجهة نظري

ملحوظة: كيفانش تاتليتوغ مش شاذ

خطيبته تبقي ملكة جمال العالم

و صورهم مع بعض في كل المجلات

دي كانت مجرد اشاعات طلعت ضد المسلسل مش اكتر

للرد علي نجاح المسلسل

و برضه مش بدافع بس دي شهاده يعني

و الف شكر علي الموضوع

بوســـــي

**PRO-DRIVE** · 23-08-2008 12:20 AM

والله ماجيبنا في داهيه غير الرومانسيه و الحب و الكلام دا كله :@

**Mido80** · 23-08-2008 03:30 AM

انا كمان استغربت لما شفت ولاد اختي بيسهروا للصبح بيتفرجوا علي المسلسل دة مش عارف علي اية؟ انا عمري ما اتفرجت علي المسلسل ولا احب اشوفة لانة فية نفاهة وسفالة. فية اية اخينا دة عشان البنات والستات يقعوا في غرامة بالشكل دة. دة ان دل فانما يدل علي نقص الوازع الديني لدي الناس لان لو فية حد يستحق الاعجاب والتعلق بة بالشدة دي فهناك الكثير منهم وعلي راسهم الرسول الكريم سيدنا محمد.
علي فكرة دة مش اول مسلسل الاحظ ارتباط البنات بية بالشكل دة. لانة كان فية مسلسل اجنبي اتعرض في مصر زمان في التسعينات اسمة ( الجرئ والجميلات) بردة لاحظت اهتمام الناس بية اوي وعندك كمان مسلسل سوري اسمة باب الحارة اللي كان عامل قلق في البيوت في كل حتة

**khalid_adel** · 23-08-2008 06:28 AM

ماهو ده ان دل بيدل عن نقص الوازع الديني وعدم الاحترام ونقص العقل
1- نقص الوازع الديني لان بكل بساطه الناس اللي بتقعد بالساعات قدام المسلسل وعاملينه انه حاجه يوميه ماينفعش تتفوت ابدا مهما طالت (معدي ال 120 حلقه ) طب هل هما عملو الاهتمام ده لحاجه في الدين بقرأة ورد لمده ساعه ولا قيام ليل يعني من الاخر عملو حساب كبير قوي واهتمام لمسلسل مش بيعملوه لربنا ودي حاجه تكسف والله ( ارأيتم من جعل اله هواه ) واعتقد ده نوع من عباده او تقديس للهوى النفسي
2- عدم احترام لان لو راجل قال لمراته انا نفسي تكوني زي نور ولا مش عارف اعمل ايه وتعملي زيها كده واحط صورها في كل حته ما ده اسمه قلة ادب وعدم احترام لمراتي واقل حاجه وده من حقها حتقول لو انا مش عاجباك طلقني طب تخيل العكس ان ده يحصل من واحده لجوزها وتخيل بقى الراجل دمه بيفور ازاي وممكن يعمل جنايه فيها او اقل حاجه خالص حيطلقها ويقولها روحي دوري على مهند ينفعك
3- نقص عقل لان ببساطه مفروض نحكم عقلنا ونعرف ان ده مبالغ فيه والحياه مش دلع كده ورومانسيه دايما ومش كل حاجه بتتعالج بالعواطف والرومانسيه لا ببتعالج بالعقل فقط اما الرومانسيه دي ليها وقتها ومش في كل حاجه لان في امور لازم فيها الحزم واتخاذ قرارات وتكون بعقل لكن اللي يصدق الكلام اللي بيتعرض في المسلسل ده والله تمثيل والحقيقه مش كده ابدا مهما كان وللاسف طبعا اغلب السيدات هما اللي بيصدقو الكلام ده وبيميلو ليه لانهم بتغلبهم العاطفه اكتر وده اللي حيأثر فيهم اكتر
على فكره اللي بيعمل مسلسل ولا اي انتاج بيبقى عارف مين اللي حيشوفه وحيأثر في مين وطبيعه التأثير ايه والناس دول فاهمين كويس هما بيعملو ايه وازاي مش بطاطا هيا
خلاصه الكلام الواحد لازم يتعرف على كل حاجه ويشوف ولكن انه يتعلق بحاجه قوي او زي ماشوفنا المبالغات اللي بتحصل من الناس دي اللي غلط وده حرام بجد ولازم نحكم ونشغل عقلنا اللي ربنا كرمنا بيه ومنخليش حاجه تسلب عقولنا وتسلب انفسنا معاها
اه على فكره انا ماشفتش ولا حلقه من المسلسل ده قبل كده ولا اعرف ابطاله بس قريت عنه كتير وشوفت مدي تأثر الناس بيه والكلام الكتير اللي كلنا بنسمعه عنه
واحد يقولي انت ماشفتش عشان تحكم اقوله انا محكمتش اصلا على المسلسل انا بقول رأي في الناس عامة واللي بيعملوه من ردود افعال ( ومش لازم احط ايدي في فيشه كهربه عشان اعرف انها بتكهرب والجواب بيبان من عنوانه برضه )
معلش طولت عليكو وربنا يهدينا اجمعين الي ما يحبه ويرضاه

-

الموضوع: المسلسلات التركية المدبلجة (مكنتش ناقصة مسلسل نور ده كمان)

LinkBack

أدوات الموضوع

عرض

-

-

-

-

-

-

المواضيع المتشابهه

عن المسلسلات التركيه

ايه اخرت المسلسلات التركى ؟

لا لضياع الوقت مع المسلسلات فى رمضان

مصر التي في المسلسلات

السيارة التركية الاولى

الكلمات الدلالية لهذا الموضوع

المفضلات

المفضلات

ضوابط المشاركة