الموضوع: الرد على موضوع كرهت اللانسر

السلام عليكم ورحمة الله وبركاته

نبتدى الموضوع علطول فى واحد كاتب موضوع ملخصه انه كره السيارة اللانسر البومة بالاخص عند مقارنتها بالسيارات الكورى وانا بصراحة نفسى اقول رأى مع العلم انى كنت راكب لانوس وبعدها مكواة مستعملة ثم بومة زيور والان شارك من الزيرو ايضا .

اولا : انا لا انكر ان السيارات الكورى فى تطور هائل وانا من المعجبين ببعض السيارات الكورى

ثانيا : ماينفعش كل شوية نقارن اليابانى بالكورى لان من وجهة نظرى الاتنين كويسين وعمليين ولكل منهما مميزاته وعيوبه لا سيما ان الجديد كله واحد يعنى عمالين نقول يابانى يابانى وانا معترض على ده لان اليابانى الجديد لا يختلف كثيرا عن الكورى بل احيانا الكورى بيكسب واحيانا اليابانى بيكسب .

ثالثا : نبتدى نرجع ورا شوية ايام الكريتسالة وانا من وجهة نظرى دى اعظم عربية انتجتها شركة متسوبيشى على مدار تاريخها وذلك من ناحية الثبات والتحمل وقطع الغيار المعمرة والهدوء الجميل بالمقصورة يعنى العزل الجيد ونقدر نقارنها باللانوس لانها فى نفس الوقت ... من وجهة نظرى الكريستالة تكسب اللانوس مع احترامى الشديد للانوس صحيح ثباتها حلو مش وحش بس قطع غيارها مش معمرة قوى زى الكريستالة وعزلها سىء عند مقارنتها بالكريستالة لذلك من وجهة نظرى الكريستالة تكسب .

رابعا : بعد الكريستالة جت المكواة ثم البومة والاتنين لا يختلفو عن بعض الا فى الكاربيراتير والانجيكشن فقط لذلك هاخد البومة كمثال وهعمل مقانة بينها وبين السيراتو مثلا ..... من وجهة نظرى البومة خدت سمعه غريبة فى بلد غريبة فى رأيها عن السيارات مع احترامى لها طبعا كسيارة عائلية متوسطة وهبتدى بمميزات البومة وعيوبها ....

من مميزات البومة صالونها مساحته متوسط من وجهة نظرى كويسة وشيك نوعا ما .... ماتورها كويس ومعمر .....وقطع غيارها معمرة نوعا ما وركزو معايا فى موضوع نوعا ما ده لان الجديد كله مبقاش زى زمان وتقريبا واحد فى موضوع مدة قطع الغيار وطبعا قطع غيارها متوفرة جدا جدا ده غير ان شكلها جميل وبسيط ....

نيجى بقى لعيوبها وده من وجهة نظرى طبعا رقم واحد عزلها سىء جدا جدا وبنسمع الضوضاء الخارجية بوضوح وصوت الماتور ..... رقم اتنين خفيفة على الطريق بالاخص بعد سرعة 130 بالذات على الطرق المصرية الغير مستوية وذلك بسبب ان العربية عالية فلما بتجرى الهواء بيتخلل العربية من الاسفل فبيرفعها الى اعلى فنجد الدريكسيون بقى خفيف وبيلعب يمين وشمال مع الطريق وده مش معناه ان العربية بتعوم بس بيخلى الواحد سايق وهو مش ريلاكس يعنى متنشن علشان يعرف يتحكم فيها وانا اختلف مع كل اللى بيقوقوا ان اللانسر ثباتها خرافى طبعا الكلام ده مش صح خالص وده من وجهة نظرى ... رقم تلاتة فيها بعض عيوب التصنيع زى مثلا صوت خبط اكنه حديد فى حديد بتسمعه من عند الدريكسيون فى المطبات الجامدة بالاخص وانت كاسر شمال وانا كاتب موضوع متكامل عن هذا الموضوع وذكرت الحل بتاعه برضوا من ضمن عيوب الصناعة العربيات اللى بعتب حتى اللى من غير عتب بيجى بارومة فى الجزء اللى امام العجلات الخلفية وبرضوا عملت موضوع عنه هذا الشأن وذكرت الحل الامثل ليه برضو ...... رقم اربعة ودى حاجة مش مهمة قوى بس اضاءة التابلوه مش حلوة خالص وضعيفة وتحس انا قديمة ودايما اللمبات بتضعف علطول علشان مش ليد يمكن عدلو ده فى موديلات 2011 و2012

ندخل على الكورى زى السيراتو مثلا انا اعتقد انها سيارة كويسة لها مميزاتها وعيوبها من مميزاته عزلها جميل جدا احسن من اللانسر شكلها طبعا اشيك من اللانسر بمراحل ماتورها قوى جدا صالونها شيك تصميم التابوله والاضاءه فيه جميل جدا وانا بعتبرها عربية معمرة لو السائق حافظ عليها زيها زى اللانسر زى اى عربية تعيش لو حافظت عليها .... نيجى بقى لعيوبها عفشتها ناشفة جدا جدا جدا جدا جدا ثباتها مش حلو زى اللانسر قطع غيارها بصراحة معرفش معمرة ولا لأ بس غالية زى اللانسر ويمكن اغلى فى بعض الحاجات .

لو قولنا من تكسب فى المقارنة والله كل واحد حسب احتياجاته من السيارة وحسب استخدامه لذلك مش ينفع نعمل مقارنة جماعية على سيارتين لان كل واحدة لها مميزات وعيوب وانا من وجهة نظرى كل العربيات تبقى تحفة وجامدة زى بعض لو الاسخدام كويس وكلهم زفت لو الاستخدام سىء ونسيب موضوع يابانى وكورى وبتاع كل الجديد الصاج زى بعض والعمر الافتراضى لقطع الغيار يمكن قريب من بعضه بل يمكن العمر الافتراضى للسيارة متشابه وكلهم بيتصلحوا وبيتجددوا .

انا اسف للاطالة بس عايز اقول بلاش نجيب عربية ونقارنها بواحدة تانية لان السيارات المتوسطة الثمن جميعها متشابهة ... الاستخدام للسيارة هو الفرق بعنى مثلا انا ممكن اركب عربية الناس بتقول عليها ثباتها وحش وعفشتها بتبوظ بسرعة وانا مثلا مش بسوق اكتر من 100 كيلو فى الساعة وبهدى فى المطبات العربية هتعيش معايا كويس وهتبقى احسن عربية فى الدنيا بالنسبة ليا وممكن اسوق عربية ثباتها رهيب وعفشتها جامدة وانا سواقتى رياضية جدا وباكل المطبات وبجرى بطريقة مش صحيحة طبعا العربية هتبوظ بسرعة وهتبقى اسوء عربية من وجهة نظرى ....... من الاخر كل واحد يجيب العربية اللى فيها احتياجاته وبس مش احتياجات الناس التانية يعنى مثلا ظهرى بيوجعنى اركب لانسر لانها انعم من السيراتو ظهرة كويس بس بحب مثلا الماتور القوى والتسارع هركب سيراتو بحب السرعة المتهورة م شهركب حاجة من دول خالص وهدخل على الاعلى زى الالمانى مثلا مشكلتنا ان الواحد بيجيب عربية اللى صانعها قايل فى انذار بعد 120 يعنى مش صح تجرى بيها اكتر من كده ومع ذلك عايز تجرى 180 وتبقى ثابتة وملاهاش حل طب ازاى ويأما كده يأما بقت عربية وحشة وثباتها وحش ههههههههههههه
اعتقد ان بعض الناس بتختار السيارة بطريقة خاطئة ..


ملحوطة : انا جبت شارك 2012 والعربية من وجهة نظرى رهيبة بالنسبة ليا فى كل الاشياء من غير ما ادخل فى تفاصيل بش الكمال لله واحد صحيح العربية ثباتها عالى جدا جدا جدا جدا جدا لا يقارن بالبومة مثلا مع احترامى للبومة طبعا وماتورها اقوى وعفشتها اقوى نفس تصميم العفشة الالمانى والعربية اشيك طبعا بس بردو لها عيوب من وجهة نظرى فمثلا عزلها سىء يمكن اسوء من البومة بشوية .



يا ريت بلاش مقانات كل العربيات حلوة حسب استخدامك ليها ومن الاخر عايز تجرى وتشد وتاكل مطبات يبقى طبعا الالمانى وبردو هيبوظ حسب استخدامك بس هو طبعا عمره الافتراضى مع الاستخدام السىء اظول بمراحل من اليابانى والكورى وغيره ...


كانت شوية فضفضة واسف على الاطالة مرة تانية وياريت أراء سيادتكم وطبعا بعيد تانى كل اللى كتبته من وجهة نظرى واللى بمكن تبقى غلط .

ربنا يبارك لحضرتك و فعلا الشارك حاجة تانية ف الثبات و الاداء و الخامات ما شاء الله لا قوة الا بالله