ده أول تقرير أعمله فى المنتدى هنا فا معلش لو فيه عك استحملونى شوية...


قررت أروح أعمل صيانة ال 90000 رغم ان العربية لسة 88500 و أنا لسة فى الامتحانات بس قلت الواحد مش ضامن ظروف الشغل بعد ما أخلص و ممكن مبقاش فاضى...



المهم ندخل فى الموضوع العربية كانت محتاجة بالاضافة للصيانة ، تغيير تيل خلفى و ده كنت عرفته ساعة ما كشفت عليها من شهرين فى عز العرب ده بالاضافة انها كانت بدأت تصفر و لما أجى أفرمل و الصفارة جاية من ورا ، و كان فى مشكلة تانية ان الجلد اللى حوالين الزجاج الأمامى فاكك من تحت عند التوربيدو على طول...




استقبلنى المهندس هشام ، شخص محترم جداً و سمع كل ملاحظاتى ، كانت حوالى الساعة 10 صباحاً يوم الخميس ، قاللى يمكن العربية تأخر شوية عشان انهاردة فى زحمة شغل عشان الخميس و اخر الأسبوع (و أنا أصلاً معادى كان 9 صباحاً بس المحور عطلنى عشان كان عليه حادثة) ، قلتله هتخلصوا امتى طيب يا بشمهندس ده أنا عندى امتحانات و متنيل بنيلة و بتاع ، قاللى على 5 العصر للأسف ، قلت ماشى ما باليد حيلة ، بس ياريت لو فى فرصة يبقى بدرى شوية يكون أحسن ، و استلم العربية...




و أخدت كتبى و رحت أتزاول شوية فى دندى مول و قلت أذاكر شوية فى سيلانترو على ما البهوات ينجزوا ، على 4 الا ربع كده كلمنى و قاللى العربية خلصت قلت كويس و فى خلال 10 دقايق كنت عنده (المشى من دندى لحد عز العرب فى الصحراوى على رجلك شئ مزعج فعلاً بسبب التريلات )...




قاللى الصيانة اتعملت و تم تغيير: زيت المحرك ، كل الفلاتر (فلتر زيت ، فلتر بنزين ، فلتر هواء ، فلتر تكييف) و البوجيهات و مياه المساحات و مياه التبريد ، و تم زيادة زيت الفرامل عشان كان ناقص ، و تم تربيط العفشة ، و غسيل السيارة داخلياً و خارجياً ، ده بالنسبة للصيانة ، بالنسبة للتيل تم تغييره و التوربيدو رفعهولى لفوق شوية عشان كان ساقط لتحت و عشان كده الجلد فك من تحت ، و كان فيه لمبتين فوانيس فوجات و لمبة النور الكبير محروقين غيروهم...




بعد التجربة صوت الموتور بقى أهدى بكتير (زيت موبيل 1 اللى كان فيها زفت بقى على كده) ، الصفارة مع الفرملة راحت بعد تغيير التيل ، التكييف بقى أحسن بشكل ملحوظ و محتجتش و أنا مروح انى أعلى عن تانى Level (التكييف عندى 8 Levels ) مع العلم ان العربية كانت قارية حرارة خارجية 37 مئوية ، التوربيدو اترفع فعلاً بس حالة الجلد مش عاجبانى فا شكلى هغيره كله بقى المرة اللى جاية ان شاء الله...




طبعاً زى أى توكيل الحاجات القديمة اللى اتغيرت كلها لاقيتها محطوطة فى علب الحاجات الجديدة و محطوطين فى شنطة العربية



و دى أسعار الحاجة اللى اتغيرت (غير شاملة الضريبة بتاعة المبيعات):

زيت محرك (توتال 9000 ) 310

4 بوجيهات 192

فلتر زيت 52

فلتر هواء 91

فلتر بنزين 55

فلتر تكييف 119

زيت الفرامل 12

مياه المساحات 25

مياه التبريد 4 لتر 90

ده بالنسبة للقطع اللى اتغيرت فى الصيانة ، الحاجات الاضافية بقى اللى تم تغييرها:

تيل الفرامل الخلفى 279

اللمبتين بتوع الفوجات الواحدة ب 7

اللمبة بتاعة النور الكبير 46


اجمالى المصنعيات بتاعة الصيانة زائد تغيير التيل الخلفى و لمبتين الفوج و لمبة النور الكبير 550




و عملولى خصم 7.5% على المصنعيات و قطع الغيار..




اه صحيح للناس اللى مش عارفة ، العربية سيتروين سى 4 2007




بس كده ، و أقعدوا بالعافية