خلاص قربت اتجنن مشكلة في الماتور مغلباني
السلام عليكم ورحمة الله
من فترة وانا راجع بالعربية لانوس 1 موديل 99 العربية ادوس بنزين مفيش اي استجابة والموتور مفيش كبس فجأة بطلت ادور فيها مفيش المهم نزلت بصيت على الموتور كله تمام يومها للأسف دوخت على بنزين ما لقتش غير 80 اضطريت احط مع اني ممشيها 92 المهم كل حاجة تمام في العربية ادور تاني مفيش ،، المهم نزلت خلفت التقسيمة ودورت فضلت العربية (تعطس) شوية رحت راجع مرجع التقسيمة تاني ، العربية راحت دايرة وزي الفل مشيت بيها شوية مسافة اتنين كيلو كده راح نفس الموقف ده حاصل تاني ، نزلت مرة كمان عملت نفس الحاجة برضو دارت شوية وراحت مبطلة المهم من كتر القرص على المارش فوت رحت متصل على واحد قطرناها لحد الميكانيكي لأن وقتها كان متأخر وكان بقالي فترة عايز اشد العربية قولت دي الفرصة بقى
العربية راحت للميكانيكي جه الكهربائي صلح المارش ركب المارش الميكانيكي جه عدل التقسيمة لأني كنت خالفها اخر مرة دور يعم علشان اشوف العيب ايه راحت العربية دايرة من اول تكة
هتجنن طبعا لأني معرفش المشكلة في ايه ؟! والميكانيكي قالي ما هي دايرة انا عايز اشوفها على عيبها.
اتصلت بسمكري حبيبي تعالى يعم خد العربية مشيت بالعربية حوالي 10 كيلو من عند الميكانيكي لحد عنده العربية زي الفل ،، السمكري خلص شغله بعد حوالي اسبوعين لقيته بيتصل بيا بيقولي انا واخد العربية للدوكو العربية مش عايزة تدور! ادور العربية نفس المشكلة القديمة الماتور ما بيلقطش نهائي او يلقت تفضل تدوس بنزين تحس انه بيهرب الكبس ولا ايه مش عارف
وللأسف البطارية سافرت
اتصرفت ووديت العربية للميكانيكي المكانيكي فضل يدور مفيش قالي هنفك من هنا لهنا الكستبانات بايظة محتاجة تتغير غير يعم اول ما اتغيرت (كل ده وانا واقف فوق راسه) دور راحت العربية دايرة من اول تكة! حاسبته ومشيت بالعربية لحد بتاع الدوكو ،، المهم بتاع الدوكو عيل ابن حلال بعد يومين بيتصل بيا بيقولي العربية عايز اوديها للسمكري تاني ليه يعم قالي أنا ما بشتغلش بمعجون كتير وبتاع والواد بصراحة ايده ميزان وفعلا العربية تسمع رنة الصاج ومحتاج السمكري يعيد تاني على الباب المشكلة العربية مشيت بيه حوالي 500 متر وكأن مفيهاش بنزين،، اتصل بيا خدتها للميكانيكي تاني بص عليها شال الكابل اللي واصل من الفلتر للموتور وركبه تاني العربية دارت مالها يا اسطة (وهو شيخ صنايعية المنطقة بصراحة) قالي يعم مفيهاش اي حاجة خدت العربية طبعا انا قرفت قولت للسمكري تعالى خدها واتصرف علشان انا زهقت الراجل جه مكدبش خبر مشي بالعربية مسافة كيلو او اتنين كيلو كده وقالي العربية بطلت مني
رحتله وكانت الصدمة الكبرى سير الكاتينة مقطوع حاولت تدور يا اسطى قالي لا انا حسيت بحاجة غريبة كده ما رضيتش ادور المهم وانا بكلمه افتكرت ان السير ده مغير من شهر بالظبط اتقطع ازاي قلبي اتقبض قولت يبقى فيه قفشة في الموتو وقد كان جه ميكانيكي تاني مشهور جدا بص على الموتور قاله الموتور قافش واكيد الصبابات اتعوجت وكده طرمبة الزيت ما بتطلعش زيت فوق ووووووووو ومشاكل بالكوم قولتله فل يا اسطى انا هروح للميكانيكي بتاعها يحل الموتور وهنزل اجيب واحد استيراد وارتاح من القصة دي !
في حاجة مهمة جدا لما الاسطى ده فك غطا مليان الزيت ملقيش نقطة زيت على عامود الكامات وقالي ان العامود شكله مكسور رغم اني مغير زيت والزيت مش ناقص ولا لمبة الزيت نورت
المهم يا جدعان راحت للميكانيكي بتاعها وانا قولت انه صنايعي كويس قالي يعم ده راجل بيستهبل فك الموتور فعلا قافش المهم قالي دي الزنبة بتاعة عامود الكامات روح للخراط خليه يظبطها ورحت فعلا للخراط والموضوع بفضل الله خلص بالظبط في 150 جنيه ، 15 جنيه خراطة + مصنعية + سير كاتينة
وقالي ان القفشة دي مش في الموتور ده عمود الكامات واخدت العربية فعلا دايرة وانا ماشي لمبة الزيت نورت اتصلت بيه جالي عمل تشيك قالي ما تقلقش دي مكان الحل وميه جت على ساعة الحرارة وحوارات ما فهمتهاش بس بعد شوية لمبة الزيت طفت وبقت زي الفل.
اخر حاجة بقى العربية خلصت دوكو ادور بقى يا مؤمن علشان اروح للسروجي واقفلها العربية ما بتدورش
انا قربت اعيط
الميكانيكي قالي ان السبب الرئيسي في انهم كل شوية يفكوا الكنترول والبطارية ويركبوهم هل الكلام ده صح ؟
وهما فعلا بيخافوا الحاجات دي تتسرق فبتتشال لحد ما يحتاجوا يدوروا العربية
ثانيا أنا اعمل يا رجالة
اخر حاجة الصيانة للموتور بالذات بعملها قبل معادها بمعاد يعني تغيير الزيت مثلا ال 3000 ده بغيره كل 1200 بالكتير قوي ، السيور كلها بغيرها باستمرار
عايز اعرف ايه المشكلة انا قربت اتجنن خلاص !
واسف على الاطالة بس ده جزء من المعاناة اللي انا عيشتها في الايام اللي فاتت
