مش عايز حد يلمس عربيتك و هي راكنة؟؟

**shaikh_tamer** · 26-05-2013 04:57 AM

فكرة جاتلي و قلت اسال قبل لما اجربها لاني باعاني في المنطقة اللي انا ساكن فيها بكثرة ولاد الحلال اللي كل خمس دقائق الاقي واحد منهم قاعد علي العربية و بعضهم بيحط بيشرب شاي و مرة كانوا بياكلوا بطيخ و مرة ... ولا مش مهم

المهم الفكرة اني بافكر اشتري غطاء عربية مشمع, و بعد لما اغطيها اصب عليه زيت عربيات و طبعا المشمع مش حينفد الزيت لجسم العربية و في نفس الوقت حيكيف اي واحد عايز يقعد علي العربية, الموضوع حسب خيالي ليه اعرض جانبية, اولها اني انا شخصيا حتبهدل لما احط او اشيل الغطاء, بس الكلام ده مش صحيح اوي, ممكن يكون وضع الغطاء متعب شويتين و حيبهدل الايد بس اساسا بعد وضع الغطاء انت بتروح البيت و ممكن تغسل ايدك, اما رفع الغطاء فمفهوش مشكلة لانك اساسا بتمسكه من تحت من البطانة اللي مفيش فيها زيت.
المشكلة الثانية ان الزيت حيسبب ان تراب الشارع كله حيلزق في عربيتك و حيخلي الغطاء كتلة تراب معفنة, و ده ممكن يكون ميزة لواحد بيعاني زيي.

المشكلة ان بعض الاصدقاء قالوا ان زيت العربيات لو حطيته علي الغطاء المشمع حيسبب تاكل الغطاء, ده غير لونه اللي حيتحول للاسود, و نصحوني بزيت القلي بعد استهلاكه, و فيه بعضهم نصحني بزيت شعر :) انتو ايه رايكم؟

**p r i n c e** · 26-05-2013 05:06 AM

رأيي نفض و متشغلش بالك و تعكنن على نفسك

**p r i n c e** · 26-05-2013 05:07 AM

و ممكن تركب سبويلر عشان محدش يقعد على الشنطة

**مزمار وحيد** · 26-05-2013 05:42 AM

يا راجل فضفض وقول بيعملوا ايه غير البطيخ .... ربنا يهديهم ويصبرك فان الله مع الصابرين
ان شاء الله ربنا يبارك لك فى العربية
وعلشان اشاركك بحكايه صغيره تخفف عنك النهارده ركبت مشوار خمس دقائق مع سواق تاكسي لكن منتهي الفوضى طبعا واد روش جدا وشوف يا سيدي حاطط كوبية شاي بين رجليه علي الكرسى وبيكلم حد في التليفون باليد الشمال وبيفصل الحوار علشان تبعتلوه رصيد وطبعا الحمد لله سايق باليد اليمين فلك أن تتخيل ماشى بين الناس إزاي حاجة خرافية ولما شوفت كده قلت لنفسي طيب لما بأكون سايق واتعصب علي تصرفات الناس فى السواقه أكيد هذه النماذج منتشره علشان كده لازم نحاول الصبر والذكر وان شاء الله ربنا يهدينا للصراط المستقيم

**أحمد عبدالله** · 26-05-2013 06:30 AM

ريح دماغك

**hilal** · 26-05-2013 06:43 AM

ممكن واحد ينتقم من العربية ، ويكسر لك حاجة
زي نصيحة الزملا ، نفض أو اختار مكان آخر تركن العربية فيه

**p r i n c e** · 26-05-2013 06:45 AM

المشاركة الأصلية كتبت بواسطة مزمار وحيد

يا راجل فضفض وقول بيعملوا ايه غير البطيخ .... ربنا يهديهم ويصبرك فان الله مع الصابرين
ان شاء الله ربنا يبارك لك فى العربية
وعلشان اشاركك بحكايه صغيره تخفف عنك النهارده ركبت مشوار خمس دقائق مع سواق تاكسي لكن منتهي الفوضى طبعا واد روش جدا وشوف يا سيدي حاطط كوبية شاي بين رجليه علي الكرسى وبيكلم حد في التليفون باليد الشمال وبيفصل الحوار علشان تبعتلوه رصيد وطبعا الحمد لله سايق باليد اليمين فلك أن تتخيل ماشى بين الناس إزاي حاجة خرافية ولما شوفت كده قلت لنفسي طيب لما بأكون سايق واتعصب علي تصرفات الناس فى السواقه أكيد هذه النماذج منتشره علشان كده لازم نحاول الصبر والذكر وان شاء الله ربنا يهدينا للصراط المستقيم

:-d :-d

**د.محمدعبدالعال** · 26-05-2013 06:51 AM

فكرة سيئة طبعا .. هتبهدلك انت والعربية .. احسنلك هات جهاز انذار حساس قوي

**beshomilan** · 26-05-2013 08:16 AM

و ممكن تركب سبويلر عشان محدش يقعد على الشنطة

انا عندى فى العربيه وبيكون اريح فى القعده كتير لانه مبيزحلقش اللى قاعد
انا كنت بعانى من نفس المشكله وريحت دماغى ووديتها جراج وانتهى الموضوع تماما واخيرا عرفت انام مرتاح البال :)
يابخت اللى عندهم ماتركس وكارنز وهيونداى i10 لان محدش يقدر يقعد عندهم :)