الموضوع: هاركن صف تاني ومحدش هيتضايق

المشاركة الأصلية كتبت بواسطة janagabr

في الاماكن المزدحمة ساعات الناس بتضطر تركن صف تاني عشان تخلص مشوار سريع وترجع تاني والمشوار الصغير ده تلاقية يخلص في 10 دقائق او نصف ساعة بالكتير وطبعا بفضل نجاح موظفينا وتفانيهم في عملهم تلاقي المشوار قلب ب 3 أو 4 ساعات وتنسي عربيتك وتنسي انك قافل علي حد وهكذا بس المهم متكونش قافل الشارع ولا سادد فتحة باركينج او ملف
فنقوم جايبين نص ورقة فلوسكاب ونكتب عليها ( نعتذر عن التاخير ونكتب رقم الموبايل ) ونحطها علي التابلوه بتاع العربية وياريت لو ورقتين وحدة علي التابلوه وواحدة علي الشباك عشان محدش يقولك انا مختش بالي
والراجل صاحب العربية اللي قافلين عليه يجي يلاقي الورقة فيتصل بيك وتقوله اه عربيتي انا اسف جدا وجايلك في خلال 3 دقائق ونروح نعتذر للراجل ونشيل العربية وده التصرف الطبيعي المتوقع من الانسان المتزن عقليا
ممكن بقي بفضل ذكاء ولاد بالادنا تلاقي
تلاقي اللي بيرن عليك عشان تكلمه (عشان ثمن 30 ثانية ) ويكون فكره ليه اتحمل مكالمة المفروض هو اللي غلطان ويتحملها برده نقول معلش ومنزعلش منه عشان احنا اللي غلطانين برده فنقول متصلين بيه وبردة نعتذرله
وممكن واحد يبعتلك رسالة – واللي يكلمك علي الفايبر - ...............
ولو انت راجل نحس تقع مع واحد معهوش رصيد
وياسلام لما تقع مع واحد دماغه حلزونية لولبية يجرحلك العربية وبعدين يتصل بيك وانت هتيجي بسرعة عشان تنقل العربية ومش هتاخد بالك من التجريح الا بعد ما يطلع
ومحدش يزعل من حوارات التجريح والاذية بتاعت الناس لان الناس دة بتبقي ذخيرة لينا يوم القيامة تلاقي واحد بيبوس رجلك عشان ترحمه بس ساعتها نفسي نفسي وتاخد حسناته حتي ترضي دة ان لقيت عنده حسنات اصلا
غير ان ربنا في الدنيا بيصلت عليه من ياخد حقك بس من ناحيه تانيه يعني مش لازم في عربيته ممكن مديره يفصله من الشغل او ابنه يتضرب بسكينه او الة حادة زي اللي جرحلك بيها العربية
(مَنْ عَمِلَ صَالِحًا فَلِنَفْسِهِ وَمَنْ أَسَاءَ فَعَلَيْهَا وَمَا رَبُّكَ بِظَلاَّمٍ لِّلْعَبِيدِ ) صدق الله العظيم
انا معرفش حد عمل التجربة ده في مصر
بس نجرب برده يمكن تساعدنا وتحل مشاكل كتير وتمنع مصايب كانت هتقع بين الطرفين :b4_388:
الصراحة التجربة دة ناجحة جدا جدا برة مصر
وطبعا الناس بره مصر بتتصل بيك محدش بيرن ولا الاختراعات اللي عندنا

وربنا يهدي الناس ويرزقها الرشاد

بص انا فكرت فى كلامك ٣ ثوان بالظبط
نظريا كويس
عمليا متخيل نفسى راجع الاقى واحد كاتب لى على كابوت العربية بمفك ولا يهمك يا حبيبى اتأخر براحتك

مش بعرف بصراحة
اقف صف تاني واسيب العربية
لان الناس هتتضايق وانا كمان

فى الاماكن الزحمة بشتري دماغي واشوف سايس اركن العربية ويمسحها ويحط عينه عليها علشان متفلسعش منه فبيبقى واخد باله من كل العربيات وتديله 5 جنيه او 10 جنيه وبصراحة الناس دي بتحل الازمه

انا ضد موضوع ركن الصف التاني ده اللي لو فكرنا بالراحه هنلاقي ان بيبقي في دائما حل تاني غيره بس بعيد شويه في اغلبيه الاحوال و لذلك الناس بتستسهل تمشي و تقوم قافله علي واحد راكن في امان الله ملوش اي ذنب و وارد جدا كمان و حضرتك نازل من العربيه باب من أبواب عربيتك يحك في عربيته و يجرحها له و برضه ملوش اي ذنب و ممكن يكون مستعجل او في ظرف طارئ و محتاج يتحرك بسرعه و حضرتك قافل عليه و قد يكون ليس معه موبايل او ليس معه رصيد مثلا فمش عارف يكلمك علشان يطلب منك تيجي تشيل عربيتك و حتي لو معاه رصيد هو ذنبه ايه فعلا هو اللي يتصل ؟ الراجل مش غلطان في حاجه و المفروض اللي يتصل هو اللي راكن صف تاني لان المكالمه نتيجه خطؤه هو . ببساطه حضرتك حط نفسك مكان اللي عربيته بيتقفل عليها و ما اعتقدش ساعتها الموضوع هيبقي ظريف خالص لكن هيبقي فيه نوع من حرقه الدم و الأذي و عمر ما التصرف الخاطيء يبقي صح ابدا