وقام فاتح فتحة السقف ولاقيتلك العلبة بتطير

**janagabr** · 27-05-2013 06:27 PM

كان ليا واحد صاحبي بيحب بفتح فتحة سقف العربية ويرمي منها كانز البيبسي او ازازة مياة بلاستيك وهو ماشي بالعربية بس مبيكونش حد وراه
وتلف الايام والسنين واقابلة بعدها ب 3 سنين واركب معاه العربية الاقيه حاطط كيس في الدواسة اقوله اه يابني الكيس دة وهنا كانت المفاجاة !!!!!!!!!

يقولي ده الكيس اللي برمي فيه الزباله انت بتهرج ولا ايه انت عايزني ارمي الزباله في الشارع

قولت الحمد لله الراجل ربنا هداه
قولتلوا ما انت طول عمرك بترميها في الشارع قالي لا يا عم الكلام ده ايام الغفلة دلوقتي انا بحط بتاع 10 – 15 كيس بلاستيك صغير من بتوع السوبرماركت في شنطة العربية ولما كيس بيتملي باخده معايا وارمية في اي باسكت في الشارع او في باسكت العمارة وانا مروح

وقالي انا كل ما افتكر لما كنت برمي الزبالة في الشارع كنت بستحقر نفسي جدا
وقالي انا حسبت اني كنت برمي زبالة في الشارع لمدة سنتين بمعدل ازازة في اليوم الواحد
فعملت لنفسي جدول اني لازم الم 5 كانز بيبسي او ازازة مياة بلاستيك في اليوم الواحد من الشارع وارميهم في الباسكت كاستغفار لنفسي ولمعاجة الشعور بالندم

وكتعويض للمجتمع اللي انا كنت بأذيه ( بغض النظر عن حالة مجتمعنا اللطيف )
وفي اخر اليوم اشوف انا لميت 5 ولا اكتر ولا اقل حسب الظروف واكتبها علي الكاليندر بتاعت الموبايل وفي اخر الشهر احسب انا لميت كام علبة
يبقي المفروض في خلال شهر تكون لميت 150 ازازة
وفي خلال 3 شهور تكون لميت 450 ازازة
وفي خلال 6 شهور تكون لميت 900 ازازة
يعني في خلال 6 شهور تكون عوضت زبالة سنتين ونصف تقريبا

وقالي مبخليش حد يرمي الزبالة في الشارع وهو راكب معايا العربية

فطبعا حل ما لوش حل
سهل وبسيط ومبيكلفش فلوس
وربنا يقدرنا علي فعل الخير

وربنا يجعلنا من الذين يستمعون القول فيتبعون احسنه

**mahmoud_anwar** · 27-05-2013 06:41 PM

والله حاجة جميلة بجد انا بقيت دلوقتي بكسف ارمي ورقة في الشارع
بصراحة النظافة حلوة ولزم كلنا نبداء بي نفسنا لي ان حرام علينا عامل النظافة الي بيطلع عينة وفي الاخر بياخد مرتب 200 ولا 300 جنية اخر الشهر وبنزلة انه يوطي ويشيل من الارض مع انها عملية سهلة ومش هتاخد مننا حاجة غير اننا نرمي الحاجة في مكانها الصحيح
بارك الله فيه

**shaddadfalcon1** · 27-05-2013 06:46 PM

ماشاء الله هي دي الناس المحترمه
الحمد لله الواحد متعود ومعودي عيالي علي كده حتي لو العربيه بقت صفيحة زباله بس مرميش حاجه في الشارع لدرجة اني بتكسف ارمي حاجه وانا عندي اهلي في الفلاحين يعني لاشارع هناك مفيش لانظافه ولا غيره ومليان تراب ومخلفات مواشي وارض وكل حاجه ومع ذلك مش بحب ارمي حاجه

ببقي ماشي الصبح علي البحر في الأسكندريه والاقي واحد باله مطلع ايديه من الشباك يرمي سجاره ولا الجزء المحروق فيها ولا منديل ولا كانز بفضل ارعشله وازمرله بس اللي بيبعمل كده متعود ومحتاج حد يكلمه

**mem** · 27-05-2013 06:58 PM

ربنا يجازيك خيرا
عمل نبيل تستحق عليه كل تقدير

**ketoo** · 27-05-2013 07:26 PM

ربنا يجازيه خيراً عن عمله

**aldesha989** · 27-05-2013 07:34 PM

فكره جميله والله النظافه من الايمان فعلآ

والله اوقات بكون واقف فى الشارع والاقى واحده جت رمت كيس الزباله قدام عربيتى ببقى عايز اكل دماغها وقتها طب حسى على دمك طب قدرى ان فى حد واقف مافيش ياريس

**moody_687** · 27-05-2013 07:56 PM

الحمدلله ان ف ناس كده الحمدلله انا بحس ان احنا هنتقدم ان شائ الله لو هنصلح من نفسنا الاول من حيث النظافة والرحمة بالحيوان والمودة بين البشر والاسلوب الكويس والكلمة الطيبة بين الناس

**Hondawy_2008** · 27-05-2013 07:57 PM

موضوع رائع

**forti** · 27-05-2013 08:19 PM

الحركة دى جامده فحت اما الواحد يبقى مهيبر و تشغل اغانى اجنبى بصوت عالى و تضرب الكانز على انو ازازة بيرة و هوووب تقوم راميها من فتحة السقف :d

لا بس ما شاء الله ربنا يباركله , كويس ان الواحد يبقى ضميره صاحى و سبحان مغير الاحوال

**horas3000** · 27-05-2013 08:45 PM

يااااااه اخيرا لقيت حد بيعمل زي
انا الموضوع ه متعود عليه من الكويت لان هناك رمي الزباله عليه مخالفه
ففكره الكيس ده الكل تقريبا عاملها هناك
و المغاسل هناك بتحط الاكياس ده بعد الغسيل منها نظافة و منها دعايه

و لما جيت مصر ايام الجامعة و عملت كده اصحابي اتريقوا عليا و علي لبس الحزام كمان لاني برضه كنت متعود عليه من الكويت
و لا زلت باعمل كده و لله الحمد
و مؤخرا جبت الباسكت الصغير اللي بيتحط علي ال transmision tunnle

الموضوع: وقام فاتح فتحة السقف ولاقيتلك العلبة بتطير

LinkBack

أدوات الموضوع

عرض

-

-

-

-

المواضيع المتشابهه

فتحة السقف

فتحة السقف

فتحة السقف...!!!

فتحة السقف ؟؟

فتحة السقف

الكلمات الدلالية لهذا الموضوع

المفضلات

المفضلات

ضوابط المشاركة