الموضوع: مواطن من مطروح يرسل خطاباً إلي «مبارك»: سيدي الرئيس.. تنازل عن عرشك

اللي أنا أعرفه
اللي مش قد مسئولية حاجة ........ لا يقتنيها
يعني اللي مش قادر يصرف على عيال كتير ........ يخلف على أده

بلاش موضوع تحديد النسل ده لان الله جل فى علاه مش بيتعاند

تحديد النسل والانجاب شى حلو قبل عشرين سنه لكن الان عدم الانجاب افضل

من عشرين سنه كان لما حد يخلف تؤائم تقول سبحان الله بقى عنده طفلين فجاءه

الان الحمد لله الانجاب بقى بالخمسه والسبعه فى بطن واحده والموضوع انتشر جدا وكانها حكمه من الله
يعنى الواحد يقول هخلف بس طفلين عشان اقدر اصرف عليهم واعيشهم كويس
هووووووووب يلاقى المدام حامل فى 3 و 5 ولا 7

مش ذنب الراجل انه اب لثمانى اطفال
ذنبه الوحيد فى بطاقته الشخصيه (( الجنسيه مصرى ))

السلام عليكم و رحمة الله و بركاته
إلى كل الأخوة المختلفين معي في الرأي
يا جماعة أنا لا بعاند ربنا ......... و لا أقدر حتى أفكر ......... و لا أي حد يقدر يفكر يعاند المولى عز و جل
الموضوع عقلي بحت و إقتصادي و تحكيم للعقل اللي ربنا فرقنا بيه عن الحيوانات

بس
و موضوع إن لو ربنا كاتب لواحد يخلف 10 عيال و أصلا الراجل مش عايز يخلف
يبقى الراجل هايخلف يعني هايخلف
و محدش يقدر يمنع قدر ربنا
إنما الموضوع مش قاعدة ........... و الدنيا مش سبهلله و كل شئ و له نظام و له قواعد و له حدود
و يجب على كل إنسان أن يعرف حدوده و يخطط حياته حسب مقدرته


و الموضوع أصلا مش موضوع الراجل بتاع مطروح
الموضوع أكبر من كدا بكتير و مشكلة بلد بحالها مش مشكلة فردية

و اللي عايز يخلف علشان القبيلة أو العيلة في الصعيد تبقى مبسوطة و العيلة أو القبيلة تكبر علشان هيبتها تكبر و تبقى ليها أسم و الكلام الفاضي ده
ميجيش يندب و يقول أصل أنا عندي 10 عيال و مش لاقي أوكلهم
أنا آسف يا جماعة .......... ده مش منطق !!!!!

الدولة أه مش ماشية مظبوط ........
بس الدولة ......... مش الحكومة بس
لاءة حكومة ............. و شعب عايز حرقه بجاز

و محدش يزعل مني ............ علشان أنا مش بتبلى على حد و لا بألف كلام من عندي

و بالنسبة للراجل أنا معاه إن ربنا يرزقه و يساعده على تربية عياله تربية إسلامية صحيحة


-----------------------------------------------------------------------

بس فيه حد دلوقتي بيخلف عيال و في دماغه الإسلام ؟؟؟
لاءة و دي إجابة قاعطعة للأغلبية العظمى
لأن الأغلبية العظمى بتخلف كتير علشان العزوة بتاعة الأسرة الصغيرة أو العيلة الكبيرة أو القبيلة و لزوم الخناق و ضرب النار

و السلام عليكم و رحمة الله وبركاته

بمناسبة مقولة العناد مع المولى عز و جل

--------------------------------------------------------------
أليس ربط حزام الأمان فيه عناد للقدر القادم إليك مهما حصل !!!
أليس الحرص و الإدخار للمستقبل فيه عناد للقدر و ترتيبات الله لك في المستقبل !!!!
و هناك أمثلة كثيرة ............
و أرجوا أن تتفهموا ما أصبوا إليه ....
و شكرا لكم جميعا

والله ربنا يتولاه برحمته وفعلا راتب قليل جدا
بس 8 عيال كتير اوي
والمثل ببيقول على قد لحافك مد رجليك
ومحدش يقولي حديث الرسول "تكاثروا فاني مباهي بكم الامم" او الحديث التاني (ده ان كانن حديث صحيح اصلا) "كل طفل يولد برزقه"
لان "ولا تلقوا بايديكم في التهلكه"
مصر بيتزيد سنويا بمعدل 2 مليون (حسب احصائيات مكتب الاستخبارات الامريكي Cia و 1.9 مليون حسب مكتب الاحصائيات المصري في وزاره التضامن) .... 2 مليون عاطل في السنه ... تخيل الرقم
ومش هيشتغلوا ومش علشان دي مصر
لان دوله زي امريكا لما بيجيبو 130 الف وظيفه (حكوميه وخاصه) كل 3 شهور (520 الف وظيفه في االسنه ) بيبقا رئيسها دا راجل ناجح جدا جدا جدا
وفي عهد بوش وصلوا انهم بقو يجيبو 40 الف وظيفه كل ربع سنه يعني ما سوازي 160 الف وظيفه ...
تخيل لما تتقارن امريكا و الارضيه الخصبه للاستثمار و الابحاث و االعلوم
مع مصر
ده حتى لو في تطور (وهو مش موجود اصلا) هيتشفط ومش هيبان له اثر ... لو في ارباح و زياده في ميزانيه الدوله فهي تم القضاء عليها مقدما ...
اتنين مليون بني آدم زياده سنويه يعني بيحتاجو ما يعادل 200 مليار دولار في السنه(مقارنه مع دوله زي الامارات )
يعني مش ذنب مصر ان شعبها مش خايف على نففسه
ومش ذنب الحكومه برضو ان الشعب مش خايف على نفسه
لما الشعب بيحرق ما يوازي 9 مليار دولار في السنه (حسب منظمه الصحه العالميه) في السجاير فقط (من غير لا شيشه ولا مخدرات) يعني ما يوازي 2-3% من ميزانيه مصر العامه
من غير بقا ما نحسب نفقات العلاج على الدوله نتيجه الامراض السرطانيه الناتجه عن ده
وتيجي تكلم الناس تقلها التدخين مضر وبيقتل و تحط لهم صوره ... يقولك : بس بس ماحنا عارفين
طيب يعني الشعب بيموت نفسه وهوا "عارفين" .... يبقا محدش يزعل
نفس الكلام لما يقولك تحديد نسل ويا جماعه قللوا الخلفه و عيل وواحد او اتنين كفايه و تلاقي الاب مش لاقي ياكل نفسه هوا شخصيا(وعندك مثال الاب ده بـ45 جنيه في الشهر) وجايب فريقين كوره ويقعد يقولك اصل حكومه بنت معرفش مين و حكومه معرفش عامله ازاي
دول العالم المتقدم نسبه الزياده فيها بتبقا بالكتير 0.7% واحنا في مصر والهند وصلنا2.5 - 4%
اكيد ده مش دلاله على تحسن مستوى صحه بقدر ما هو دلاله على شعب عايز يضيع نفسه وهو "عارفين" ان ده بيضرهم من الاول
وفي حديث بيقول بما معناه :"لان تترك اولادك اغنياء خير لهم من ان تتركهم عاله يتكففون الناس" .... واعتقد الحديث واضح انه برضه متخلفش عيال كتير عاله يتكففون الناس
تنظيم الاسره ده واجب وفرض في الوقت الحالي وان شاء الله هيبقا قانون في وقت قريب زي القانون الصيني بطفل واحد فقط على نفقه الدوله (طبعا مع تعديله مع ما يناسب مصر وتعدادها بطفلين او ثلاثه بحد اقصى) غير كدا مياخدش لا تعليم مجاني ولا صحه مجانيه و لا دعم على الغذاء ولا الطاقه ولا اي شكل من اشكال الدعم (ويستثنى حالات الحمل الطبيعي -غير اطفال الانابيب او التلقيح الصناعي- اللي ينتج عنها اكثر من جنين -توائم-)
بالشكل ده تبقا كل اسره عندها طفل واحد تربيه صح وتأكله صح و تشربه صح و تعلمه صح وياخد دعم وصحه بشكل صحيح وساعتها تختفي من عندنا عادات الجاهليه بتاعت خلفه الصبيان والبنات و الكتره عزوه و خلافها من الافكار الغير متناسبه باي شكل مع الزمن الحالي