الموضوع: الفرق بين هوندا سيفك 1997 و 2000

المشاركة الأصلية كتبت بواسطة blazer

ما شاء الله
شكرا على الشرح الواافى
العربيه دى كان نفسى الاقى موديل 99-2000 فئه ال vti

هيا موجودة بس قليلة للأسف وربنا يرزقك بواحدة قريب ان شاء الله

المشاركة الأصلية كتبت بواسطة cogy

شكرا ياباشا علي الشرح الوافي دا انتا كدا فهمتني هل قطع الغيار واحدة بالنسبة للماتور والعفشة للموديل 97 و 2000 هل نفس الماتور ونفس العفشة ونفس مكونات التكييف سوال اخير هل الاتوماتيك في الجيلين دول 97 و 2000 لية مشاكل او عيوب واية هية الصيانة الدورية بتاعتوة وهل تنفع السيارة لو حالتها كويسة للمسافات الطويلة واعرف منين ازا كان الفتيس الاتوماتيك بتاعها كويس او لا معلش طولت عليكم لاني ناوي اشتريها ان شاء الله واول مرة اركب اتوماتيك لسة مشوفتش مشاكلوة

شكراً وده المهم ان المعلومة وصلتك واستفادت بالنسبة لقطع الغيار واحدة للماتور والعفشه وكل حاجه :)

الفتيس ملهوش مشاكل ولا أعطال طلما حالته جيدة وأنت بتحافظ على صياناته وبتغير الزيت في ميعاده وبتستخدمة بشكل طبيعى .. انما لو بتأخر الزيت وبتعمل كيك دون كتير ده هيأثر على الفتيس وهيبوظ مع الوقت، وتسافر بيها مسافات طويلة عادى جداً بس تعمل صياناتك في مواعيدها ده المهم

الزيت الاصلى لفتيس الهوندا بيتغير كل 25-30 ألف كم لو زيت تانى زى موبيل وشل يفضل تغيره ما بين كل 15 الى 20 ألف كم

الكشف على الفتيس الاوتوماتيك

أولاً : تكشف على مستوى الزيت وبعد كدة تشوف لونه وتشم ريحته .. لو لونه فاتح وشفاف وريحته مش محروق يبقى تمام بعد كدة تمسح مقاس الزيت وتحطه تانى وتسحبه وتمسح الزيت في ورقه منديل ابيض شوف هل الزيت خالي من الرواسب المعدنيه واي شوائب موجوده فيه لو مافيش يبقى ممتاز فيه يبقى سىء

ثانياً : هتركب العربية وتحطها على Parking وتدور العربية هتضغط فرامل وتنزل الهاند وتجيب على وضع Drive وتشوف النقلة المفروض ان النقلة تكون بدون اي رزعه او نتشه في العربيه يعني بكل سلاسه بعد كدة تنقل على (P) تانى وشوف برضه سلاسه النقل بعد كدة تكرر نفس الخطوات ما بين (R) والى (P) كل ده وأنت لسه رجلك على الفرامل وتتابع لو في نتش أو رزعه وسلاسه النقلة وهل بتتأخر ولا بتأخذ ثانية مثلاً وتنقل على طول ..

ثالثاً : هتسوق وتطلع بالعربية وفي المرحلة دى حاول تكون مركز مع rpm مع الدوس العادى المفروض الأول بينقل عند 2500 rpm على سرعة 20 كم/س التانى نفس الار بى ام على سرعة 40 الثالث شرحه على سرعة 60 والرابع شرحه على سرعة 80 وشوف في تأخر في السحب او تأخر في النقلات ولا كله تمام

تركز ما بين سرعة 40 الى 70 لو هتلقى وجود رعشه في العربيه أو هزه ... طبعاً لازم تجرب كل النقلات اللى في الفتيس وتشوفها شغالة ولا في حاجه بتعلق بالاضافة لى الـ D4 في D3 وفي 2

لما تكون على سرعة 60 كم/س أعمل كيك دون تجيب دواسه البنزين على الأخر وشوف استجابة الفتيس

بعد الخطوات دى كلها تقدر تحكم وتقيم بشكل كبير على كفاءة الفتيس الأوتو اذا كان جيد أو سىء

وبالتوفيق ان شاء الله