تقرير صيانة 65000 (خمسة وستين ألف) صني 2010 في أوتو إيجبت
السلام عليكم
إزيكم يا شباب ... يارب تكونوا جميعا بخير...
تقرير عن صيانة خمسة وستين ألف كيلو لنيسان صني 2010 أوتوماتيك إي أكس في أوتو إيجب أبو رواش ...
تم الإتصال يوم الخميس 23/5/2013 لحجز موعد للصيانة وكان الموعد يوم الثلاثاء 28/5/2013 الساعة التاسعة صباحا.
وصلت لمركز الصيانة الساعة 9 إلا خمسة وأخذت رقم .. وجاء دوري تقريبا الساعه 9 وربع.
كان المطلوب صيانة خمسة وستين ألف من غير تغيير زيت مع غسل الماتور بالفوم وأبلغت مهندس الإستقبال بأن معي استيكر نايل موتورز للحصول على الخصم فطلب مني لصقه على السيارة للحصول على الخصم وتم ذلك وطلبت من المهندس الإتصال بي في حاجة وجود أي شيء إضافي في السيارة وقلت هروح لشغلي في القرية الذكية ةهستلم السيارة أخر النهار بعد الساعة أربعه فأخبرني بأنها ستكون جاهزة بالكتير على 12 وفعلا دخلت السيارة الورشة على 9 ونص وانا روحت شغلي.
اتصل بي مهندس الاستقبال وقالي إن الطنابير الأمامية محتاجة تغيير والتيل فيه 3 مم وده ممكن يمشيني حوالي 1500 كيلو وإن هيه ده المشاكل ال في السيارة وكان ردي إني هستنى 1500 كيلو وبعدين أغير التيل والطنابير الأمامية عشان كمان عايز أغير الكاوتش معاهم.
روحت التوكيل عشان استلم السيارة ووصلت تقريبا الساعة خمسة إلا عشرة وبدأ مهندس الإستقبال في شرح التقرير وهكتب النقاط إل قالها مع ملاحظاتي عليها:
1. التيل الإمامي فيه 3 مم ويمشيني 1500 ك ولازم يتغير مع الطنابير (وده بلغني بيها في التلفون وأنا قلت هأجل التغيير لبعد 1500 ك.)
2. كاوتشة أحد الكبالن فيها قطع وتسريب شحم. وده لم يبلغني بيها بالتلفون واتضايقت جدا لأن ده انا شايف انها مهمة جدا جدا ولا تنتظر ولازم تتعمل فورا) ولما لمته على عدم ابلاغي كان رده عشان منفكش مرتين وخلينا نركب الكوتشه لما نفك عشان نركب التيل والطنابير ... مع ان كل واحد منهم ليه مصنعيه منفصله ومش لازم اكون بفك التييل والطنابير عشان اغير كاوتشة كوبلن.
الكوبل ممكن يبوظ واغيره كله خلال 1500 ك الجايين. بصراحة أنا مستاء جدا من الموقف والرد.
3. صوت في المارش. (وده لم يبلغني بيها بالتلفون برده) ولما سألت مهندس الإستقبال كان رده غريب بردو ... قلتله أنتو عرفتو منين ان صوت المارش عالي وفيه مشكلة ... قالي من صوت العربية وهي بتدور ... قلتله طيب كشفته عليه في قسم الكهرباء وعرفتوا مشكلته ايه بالضبط ... قالي قسم الكهرباء بالحجز ولا زم تحجزله في يوم تاني (مع إن السيارة قعدت عندهم يوم كامل من 9 ونص لحد خمسة). قلتله يعني إنته كاتب إن المارش فيه مشكلة ولم تفحصه في قسم الكهرباء ... قالي لازم تيجي تاني ... قلتله ولو جيت تاني هتفحصه وتعمل ايه ... قالي احنا هنا مبنصلحش المارش ... هنغيره كله وتمنه حوالي 3000 .... الخلاصة وللمرة الثانية استهتار وعدم اهتمام ...
4. الملاحظة الأخيرة ان انتاج الكاوتش من 2009 . وده معلومة بيكتبوها في تقرير كل صيانة.
الخلاصة في 3 مشاكل رئيسية ... تم ابلاغي بواحده فقط واستهتار كامل بالمشكلتين مع ان واحده منهم كان لازم تتعمل (كاوتشة الكوبلن) والتانية كان لازم يحدد فعلا المارش فيه مشكلة ولا لاء...
ملاحظة أخيرة ... من تعاملي مع أتوإجيبت في كل مرة صيانة بتتكتب ملاحظات مختلفة على حسب الصنايعي ال مسك العربية ومفيش سيستم واضح لفحص أجزاء العربية ... مثال لكده في الصيانة ال قبلها كتبوا في التقرير ان في قطع في كاوتش احد قواعد الماتور والقطع بسيط وهنغير القاعده في الصيانة ال بعدها ... ودلوقتي وانا في صيانة الخمسة وستين محدش جاب سيرة قاعدة الماتور ومعرفش وضعها خالص وهل هيه محتاجة تغيير ولا ممكن امشي بيها ... من الأخر الفني مبصش خالص على الحتة ده أو الفني في الصيانة ال قبله كان كاتب حاجة غلط ....
تكاليف الصيانة ...
100 جنيه مصنعية صيانة 65 ألف
24 غسيل الماتور بالفوم
20 شحوم وسوائل sundries
5 جنيه كلبس للماتور (معرفش ليه)
15 جنيه ضريبة
إجمالي 164
إجمالي بعد خصم نايل موتورز 146