الموضوع: بيجو 301 ما بين الاختيار وال 100كم الاولي

بسم الله الرحمن الرحيم في البدايه وقبل البدء في تقييمي للعربيه احب اوضح كام نقط مهمين وهما اني انا عامل الموضوع ده من وجهة نظري انا كشخص اشتري العربيه وجربها , ومش جاي هنا اهاجم اي ماركات تانيه او اقول انها السياره الخارقه بس انا هحاول اكون محايد بدرجه كبيره . انا حبيت اوضح واقول الكلمتين دول الاول عشان لاحظت في الفتره الاخيره في عدة موضوعات الهجوم الشديد علي اي حد يقول الماركه الفلانيه مش عاجباني او اصلي العربيه ده مصنعه في كذا وكذا . عذراًًً للإطاله ولكن وجب التنويه حتي لا يتهمني احد . وانا عامل الموضوع عشان اساعد اللي بيفكر في العربيه ومتردد .

من حوالي شهرين كده بعت عربيتي القديمه ماركة ستروين اكسارا ٢٠٠١ وبدأت رحلة البحث عن سيارة مستعمله افضل حالاًً واحدث تكنولوجياًً وامتع في القيادة . وفي ظل الارتفاع الجنوني للمدعو الدولار وجدت اسعار سوق المستعمل زادت بدرجه رهيب بسبب عزوف الكثيرين عن فكرة التجديد لسيارة جديده . الكل بقي بيفكر طب انا هبيع عربيتي بكام وهركب بكام حيث اصبح الفارق رهيباً , وكل اللي كان معاه عربيه مستعمله نضيفه فكر في الابقاء عليها . واصبح كل المستعمل في السوق اما لتاجر يريد اعلي سعر ومع ذلك فبضاعته غير جيده . او شخص عادي ذو استعمال سيء للسيارة ومع ذلك يريد اعلي سعر لكي يلحق بقطار اسعار الجديد قبل ان يفوته .

ومن منطلق كل هذا فكرت اخيرا في شراء المدعو بالزيرو رغم تحفظي عليه في عدة اشياء ولكن لامحال , اجيب عربيه ابقي انا اول واحد اركبها واهي هنقعد معايا فترة قبل ما يظهر عليها اعراض المرض والشيخوخه .

بدأت افكر فيما يناسبني في ظل هذا السوق المجنون والمتهور . انحصر بحثي في البدايه عن السيارات التي تحمل اسم الاوربي فلم اركب من قبل المدعو بالكوري والصيني . في نفس الوقت الذي اعلم فيه بانه صعب الاقي عربيه اوربي بالفلوس اللي معايا. ففكرت بالبروتون رغم انها ماليزي اي نعم ولكن تحمل تحت غطائها محرك انجليزي , ف انا احب المدعوه بال جين تو سياره احبها منذ وقت طويل واحترمها للغايه فذهبت لكي اري منها موديل ٢٠١٣ لعل وعسي بها بالداخل شئ جديد غير الشكل الخارجي اللي بقاله اكتر من ٦ سنوات الان ويا ريتني ما شوفتها خامات رديئه جدا بابها ولا كأنوا باب فيات ١٣٢ لازم ترزعه جامد جدا عشان يقفل , حسيتها عربيه مستعمله رغم اني شكلها من بره حلو والموديلات القديمه ما كونتش بحس انها فقيره كده .
بعد كده قلت اشوف حاجه تانيه اتجهت الي رينو سانديرو وجدتها اشبه بالميكروباص السوزوكي ده بالاضافة لسعرها اللي زاد بشكل رهيب , انا شوفت السانديرو دي اول ما نزلت مصر ٢٠١٠ علي ما اظن وكانت نازله فئتين وكانت الفئه الاعلي علي ما اتذكر ب ٦٨٠٠٠ شوفوا النهارده بكام بقي .
بعد كده اتجهت مضطراً للاوبترا و قد سبق لي ان استعرتها من احد الاقارب من قبل لثلاث ايام . سياره جيده تقفيل جيد جدا قطع غيار متوفره وسياره بسيطه وتوكيل قوي جدا ولكن حسيت اني لو اشتريتها هحس باني اشتريت عربيه مستعمله نضيفه نظراً لقدم الشكل وموديل العربيه .
قولت لنفسي ازود المبلغ شويه عشان اخد حاجه نضيفه فوجدت اسعار الاوروبي كله معدي ال ١٤٠ وانت طالع فا اصبت بالاحباط الشديد . فوجدت كل من حولي يشجعني علي عم السوق الجديد الكوري كيا وهيونداي . قلت امري لله نشوف رغم رفضي للهيونداي والكيا من زمان بحس انهم عربيات بيبان عليها الشيخوخة المبكره سريعا كنت بشوف قرايبي اللي معاهم عربيات كوري بقالها كام سنه ومنها اللي محتاجه عمره او شورت بلوك وكنت بشوف عربيتي الستروين اللي قربت علي ال ٣٠٠ الف كيلو والموتور لسه متفتحش كنت بحس بالفرق قوي ساعتها بين الكوري والاوروبي . كمان لما كنت بشوف عربيه كوري عدي عليها ٥ او ٦ سنين شكل الموديل اتغير ٤ مرات ومع نزول موديل جديد بحس بمدي قدم الموديل القديم وهذا مالا كنت اشعر به مع السيارات الاوروبي فحتي مع نزول موديل جديد يظل للقديم رونقه والامثله كثيره زي الميجان والجولف والبولو وال ٣٠٧ وال c4 وغيرهم حد بقي يفتكرلي عربيه كوري او صيني سابت علامه عند الناس ؟؟!! اشك .
المهم قررت انزل وادور تاني عن حاجه غير الاوروبي لعلي وعسي اجد في الكوري ضالتي , فنصحني البعض بالنيسان الصني الجديدة اهو شكلها جديد وتحمل العلامه اليابنيه الشهيرة مع تحفظي علي الياباني الذي يخلو من غني التجهيزات ويميل الي البساطه الشديده والعمليه وده واضح في الكورولا والياريس وكل موديلات الصني القديمه . المهم قولت اشوف الصني ويا ريتني ما شوفتها , تابلوه الشاهين لايفرق عنها كثيرا مع ردأة المكونات ، المهم قفلتني بجد. قولت اشوف الجراند بونتو الجديده عربيه كويسه جدااا وعارفها كويس وسبق ليا استخدامها لفتره ولكن ما كان يعيبها في وجهة نظري عدم توافرها والفئات الكتير اللي نازلة بيها بسعر متفاوت ومبالغ فيه جداا, المهم رحت دورت عليها عند شيرين كار فاجأني بان الفئة الموجودة حاليا هي اللي ب ١٢٠٠٠٠ والموجود منها عربيتين او تلاته ولو عاوز فئه معينه اقل او اعلي احجز واستلم كمان شهر ونص ... ايه ,,,, كل ده عشان جران بونتو اللي كانت قبل ارتفاع الدولار الكامله اوتوماتيك من لا تتعدي المئة الف وكان ميركبهاش غير اللي عاوزها وميفكرش يبيعها علي طوول عشان سعر اعادة البيع.

المهم انا عارف اني طولت عليكو اوي ونفسكو اوصل بقي للجميله ٣٠١ . حاضر خلاص هانت بس لازم تعرفو اللي عانيته هههه .
كان لي أحد الاصدقاء من حوالي ١٠ شهور اشتري الكيا الريو الجديده . اعجبتني جدا بتصميمها الجرئ ومحركها الموفر وجنطها ال ١٧ وكمالياتها الكثيره جداااا .
فقررت الذهاب لرؤية الكيا ريو ..ذهبت الي معرض سمير ريان و لقيتها واستقريت علي الفئة التانيه اوتوماتيك توكيل اللي بتنزل بجنوط . بصراحه العربيه حلوه غيرت رأيي عن الكوري بجد حسيت فيها اني كيا عملت مجهود عشان تعمل الطفره ده في عربيتها من التجهيزات الكتير اللي فيها وجودة التقفيل وشياكة التصميم ولكن يعيبها صاجها الخفيف و صالونها الضيق اوي , وعوامل الامان القليله او المنعدمه تقريبا عدا فئة الهاي لاين حتي مفهاش abs المهم حجزت الكيا وانتظرت موافقة البنك عشان هقسط جزء بعد ما عليت عن الباكدج اللي معايا . واخترت اللون وقلت لنفسي ربنا يسهل والموافقه تيجي بسرعه واستلم وبصراحه وجدتها احسن الاختيارات المتاحه توكيلها كويس وسعر اعادة بيعها هيبقي احسن من غيرها واهو اركب مره بقي زي مالسوق عاوز مش زي ما انا عاوز .
واستني يوم واتنين وتلاته دخلنا في اسبوع عشر ايام وفيه مشكله في الموافقه , وفي اليوم ال١١ تقريبا كلمني مندوب المبيعات في المعرض لاستكمال بعض الاوراق . اذ بي افاجأ عند ذهابي بالحسناء الفرنسيه ال ٣٠١ التي ظننتها في البدايه من بعيد ال ٥٠٨ اختها الكبري . كنت قد سمعت من فتره عنها وعن اختها الستروين ولكن معظم التوقعات كانت بتتوقع سعر عالي ليها في ظل ارتفاع الدولار . فلم افكر في انتظارها .
كانت ال ٣٠١ الموجوده من فئة الهاي لاين . بهرني تصميمها وشبكتها الاماميه الكبيره المطعمه بالكروم وعلي مقدمتها علامة الاسد الفرنسي الشهيير .
قلتله بكام ده وفين اختها الستروين عاوز اشوفها قالي ب ١٣٦ الف والاقل من ب ١٢٦ الف والستروين لسه منزلتش .
قلتله بعت منها حاجه ولا لسه قالي ابيع ايه هو حد يعرف عنها حاجه دي لسه جايالي النهارده ,,
فتحت بابها ودخلت ،،، اكثر ما ابهرني بصراحة وسعهااا الغريييب ما شاء الله والطابلوه المطعم بالكروم والكاست البلت ان والتكييف الاوتوماتيك وعصا الفتيس المطعمه بالكروم وشنطنها الواسعة جدااااا دماغي لفت . لقيت المندوب كانه بيقرأ افكاري خليك في الريو يا حاج توكيل وقطع غيار و سعر اعادة بيع افضل . قولتله ماشي سلمته الاوراق المطلوبه ورجعت البيت وكل اللي بيدور في دماغي اهو جالك اللي انت عاوزه وبسعر تمام وصلت البيت وانا في قمة الحيره اعمل ايه . بدأت برحلة البحث علي النت عنها.
عرفت انها ظهرت في معرض باريس للسيارات الاخير وانها فرنسية المنشأ اسبانية التجميع وانها تكنولوجيا قديمه بعض الشئ ( أي بالنسبه لبيجو وباقي سياراتها لم تضف شئ جديد ) مع الفارق السعري طبعاً حيث انها صنعت لتكون سيارة اقتصاديه لتسويقها في روسيا وبعض دول اوروبا الشرقيه وتركيا والشرق الاوط وشمال افريقيا .
في البدايه اقلقني هذا الكلام بصراحة . عشان انا بخاف من النوع ده من العربيات اللي بتكون موجهة لينا كعالم ثالث وهنا في توكيلاتنا التوكيل بيجيب العربيه وهو لا يعلم عنها الكثير ويكون هذا النوع من السيارات داخل التوكيل زي ما المثل بيقول لا طلت عنب الشام ولا بلح اليمن . المقصود انك بتكون دافع مبلغ عشان تركب عربيه للماركه الشهيره واذ بك تفاجأ بعدها كثيراً عن بقية السيارات التي تحمل نفس العلامه ، مع اصرار التوكيل علي معاملة انك من الصفوة . علي عكس السيارات الكوري كالكيا مثلاً اللي تحس اني الشركة المصنعه لها تعبت عشان تعمل العربيه وعاوزه تثبت هي والتوكيل بانها تستحق الثقة وتحاول تنافس غيرها . وهذا هو الفارق الذي اقلقني كثيرا في البدايه . خصوصا اني ليا تجربه مع الفولكس البوينتر اللي كانت قطع غيارها زيها زي الجولف في التوكيل وكان توكيلها لا يعلم عن اشياء بالسياره وكان بيعجز في بعض الاحيان عن استيراد بعض قطع غيارها . عربيه توكيلها مش باصص لها ومركز للكبار اللي عنده .
كانت دي اهم مخاوفي ولكن بعض فحص وتمحيص وجدت اختلاف بعض الشئ بين هذا وذاك ف ال ٣٠١ ظهرت في معرض باريس والنت ملئ بالكثير عن هذه السياره وانها ستسوق في العديد من الدول اللي بصراحه اعلي شأناً مننا بكثير . علي عكس البوينتر مثلا اللي كان النت ميعرفش عنها حاجه اصلا الا بعض المواقع المجهوله . ولكني وجدت في ال ٣٠١ برامج اجنبيه كثيره تقوم بعمل اختبار قياده لها هي والستروين .
المهم توكلت علي الله وعقدت العزم اني اغير واشتري اللي انا بحبه وطول عمري احب اركبه وابعض عن قصة الكوري ده وافكني من كلام السوق . حاسيت اني ابقي راكب بيجو احلي كتير . انا عارف اني مش ده المقياس الصح طبعاً اللي يخليني اختار بيه عربيه بس ده طبعاً نظراً لعدم تجربة ال ٣٠١ بعد . وانا متأكد اني لو كنت اشتريت الكيا مكنتش هندم . بس مع البيجو انا فرحان اكتر . ربنا يخليهالي .
جاءت موافقة البنك اخيرا وكنت قد ابلغت المعرض بأنو يحجزلي البيجو ولم اكن اتوقع هذا الهجوم عليها .. فوجئت عند وصولي للمعرض انه تم بيع الهاي لاين وخلصت ولم يتبقي سوي الفئه الاولي اوتوماتيك. والتي تأتي بتكيف عادي مش اوتوماتيك وطاسات ومفيهاش سنسور وطاره عاديه مش جلد وكاست عادي مش بلت ان . وقالولي اني كل الدفعة اللي وصلت اتباعت خلال ٤ ايام وانهم جابولي دي بالعافية . قلت خلاص امري لله مش مهم هاي لاين كده كده الفلوس كانت مزنقه معايا .والفرق حوالي ١٠٠٠٠٠. دفعت الفلوس وخلصت بقيت الورق واستلمت العربية ودورت ومشيت كانت عامله وانا بستلمها ٢٠ كم ودلوقتي هيا عامله ١٠٠ كم اقدر من خلالهم اقول الحمد لله العربيه ما شاء الله صوتها هادي جداً بعيد عن كل ما يشاع اني صوتها عالي لدرجة والله كنت مدورها في المعرض وجه واحد بيسألني عليها ويباركلي قعد جانبي وانا مدور وبنتكلم لقيتوا بيقولي ممكن تدرورها قلتله ما هي دايره . ماكنش مصدق مع العلم انو راكب نيسان صني . شغلت التكييف وبدأت اتحرك بيها العزل بتاعها ممتاز جداً وتكييفها انا شايفوا والله كويس اوي الكلام ده الساعة ٤ العصر وكنت مشغله علي السرعة ٢ وكان كويس جداً وصوت الموتور هيهدا كمان اكيد . وحتي الان انطلقت بيها علي طريق مفتوح مشيت بيها علي سرعة ١٠٠-١١٠ مش عاوز اقرص عليها دلوقتي الاوتوماتيك بتاعها جيد جدا ومش بحس بالنقلات غير علي السرعات الهاديه . عفشتها جميله مش ناشفه ومش ناعمه اوي بس اتوقع بعد ما اظبط ضغط الهوا في الكاوتش هتظبط الدنيا. لو خيروني هشتريها تاني بس نصيحه للكل اشتري الهاي لاين اغني واحلي في تجهيزاتها . من الواضح انهم كانوا عاوزين يوفروا جامد لدرجة انها نازلة ب ٢ سماعة فقط قدام . بصراحه ساوند سيستم متواضع جداًاً. معلش عارف اني طولت اووي اوي بس انا حكيت كل حاجه يمكن افيد بكلامي حد كان محتار زي بالظبط وان شاء الله هبقي اقولكو علي الاخبار اول ب اول


اسيبكو بقي مع صور بيجو ٣٠١ موديل ٢٠١٤ . وشكراً.