الموضوع: سكودا رابيد 2013 أول تقرير حصرى من الواقع بالصور من المصريه للسيارات حصريا

المشاركة الأصلية كتبت بواسطة sameh_fouad

اولا : تسلم ايدك ياباشا على التقرير الجميل دة والممتاز واللى فعلا من افضل التقارير الموجودة

ثانيا : انا قريت تقريبا كل التعليقات , وعرفت ملاك الكورى بيفكروا ازاى وملاك الاوروبى بيفكروا ازاى

من الاخر , ملاك الكورى تفكيرهم كلة او مناقشتهم كلها كانت بتدور حول شكل الصالون والاوبشن وسابوا بقى ( الاعتمادية - الثبات - الخامات - التقفيل - الراحة )

وملاك الاوروبى نظرتهم للسيارة فى ما لا يفكر فية ملاك الكورى

طيب تقييمى على السيارة سكودا رابيد من خلال الصور ومقارنتها بالكورى

1 - من حيث المحرك 1600 سى سى بقوة 105 حصان صافى دة شىء ممتاز جدااا , مش زى اللى بيقولوا انا ماتورى 125 حصان او 130 حصان وفى الاخر الماتور يصفى على 90 حصان وان جابهم

2- عربية زى دية بالعفشة دية وبالابعاد دية طبيعى هتبقى انعم بكتيير من عفشة الكورى اللى مكسر ظهر ناس كتير زى السيراتو والريو اللى الشركات بتفرح العميل وتنزل العربية بجنط 17 عشان يحسنوا شكل العربية على حسب راحة العميل فى ارض بلد بالمنظر اللى احنا شايفينة دة , يبقى كدة الرابيد بردة تفوقت فى الراحة

3- الثبات : طبعا مش هنتكلم عن ثبات الاسكودا ومدى قوة هذة السيارة وثباتها فى المنحنيات , بعكس الكورى اللى تجيب بية 130-140 ولازم تمسك الطارة بأيدك وسنانك

4- الخامات والتقفيل : معلش يعنى كل الناس عارفة تقفيل الاسكودا بيكون عامل ازاى وتقفيل الكورى بيكون عامل ازاى


انتوا بقى مش عاجبكوا شكل ال interior لل rabid طيب ماتتفرجوا كدة على الفيديو دة

škoda rapid 2013 - interior - youtube

وعلى فكرة هو هو التابلوة بس ال cd هو اللى متغير , وطبعا التكييف تاتش

لان الصورة بتاعة الكيا ريو اللى موجودة فى التعليقات بتاعة الخارج من اللى عندنا هنا , وعلى فكرة انا مش عاجبنى تماما تصميم تابلوة الريو اصلا

ولنا تكملة ان شاء الله عشان بس ماطولش عليكما

مع احترامى ليك يا باشا بس عندك شوية حاجات مغلوطة فى كلامك مش عارف ازاى عدت عليك !!!
اولا ايه 105 حصان صافى دا ؟!! من امتى الكلام دا ان شاء الله
على كدا الفانتازيا كانت 102 حصان صافى باردوا !!
وبعدين يا سيدى متزعلش نفسك ادى السيراتو 124 حصان .. الصافى على الدينو 100 حصان لعربية عاملة فوق الـ 90 الف كيلو

وبعدين موتور الريو اه 1400 بس ممتاز ومتحسش ابدا انه سعته صغيرة غير على السرعات العالية غير كدا لو اللى سايق مش بيمشى بيحرق على العالى او اخره 140 مثلا مش هيحس بفرق

وبعدين ايه موضوع ملاك الكورى والاوربى والكلام دا !!
هو لازم دلوقتى نصنف الناس
على كلامك كدا ملاك الكورى يا سيدى حمير وجهلة مش بيعرفوا يركبوا يعنى وملاك الاوربى دول بقى الطبقة المثقفة اللى على راسهم ريشة ولا ايه

نيجى لتانى نقطة
اولا التوكيل مش بينزل الريو بجنوط 17 .. هما 15 .. الـ 17 دا بتاع الخليجى وبينشف اى عربية مش الريو ولا الكورى بس يعنى المفروض انت راجل ركيب وعارف الكلام دا مش محتاج انا اللى اقولك عليه .. ولو انت كان كلامك ان الريو ناشفة بالجنط الـ 15 يبقى معلش اسمحلى بس يبقى انت مركبتش العربية اصلا

هتقولى الثبات .. ايه ممكن الرابيد اثبت بس مش لدرجة انى بمسك فى الريو ولا السيراتو بأيدى وسنانى فى 130 او 140 .. بلاش مبالغة

وفى رأى المتواضع ان العربية الرابيد دى مش هتكون افضل من الريو فى اى حاجة غير جزئية الثيات بس ومش بالفرق الخرافى يعنى هيكون الموضوع عادى

خامات تقفيل .. مشفتش الرابيد دى فى اى حتة بصراحة عشان اشوف خامتها ولو على التقفيل يا سيدى تقفيل الريو ممتاز .. اركب كدا الريو او السيراتو الجديدة مقلا من جوا وطلعلى غلطة واحدة او عيب فى تقفيل مثلا

وبعدبن اللى عاجبه العربية يا سيدى يشتريها بس بلاش اسلوب الكيل بمكيالين دا .. يعنى متجبليش عربية على قدها بـ 160 الف جنيه وتقعد تمدح فيها تقولى دى جميلة ومش مهم الاوبشنز والكلام دا .. كل دا عشان تحمل علامة سكودا .. وزعلانين اوى عشان السيراتو بقت بـ 190 الف

ولو الكماليات مش مهمة ماكنوش عملوا فئات ويا فرحتى بعربية اثبت شوية بس فاضية ومانيوال ومع واحد 90% من وقته فى العربية واقف فى الزحمة ... يا راجل دا انا بسوق اتوماتيك وبقيت اكره نفسى من كتر ما بقف فى الزحمة وبقيت اشيل هم المشوار اللى هعمله فى نص اليوم

وياريت محدش يجيب سيرة السيراتو الجديدة مع الرابيد لان لو مثلا انا لو اتحطيت فى موقف اختار بينهم استحالة افكر فى الرابيد اصلا

انا شايف ان اللى هيمدح فى العربية يخليه فيها هى بس .. امدح فى كمالياتها وتجهيزاتها .. امدح فى موتورها المتطور مثلا .. او الفتيس الجديد .. او تقييمها وتجربة فعلية ... لكن محدش ليه دعوة بعربيات تانية إلا لو هيعمل مقارنة عقلانيه لكن كلام دا وخلاص مينفعش