السلام عليكم ورحمة الله

لأول مرة فى المنتدى يتعمل مقابلة لقسم سيات فى الأسكندرية + لأول مرة تكون المقابلة لسيات وفولكس مع بعض برده فى الأسكندرية

كنا نتمنى حضور أعضاء القسم اللى من القاهرة بس الموضوع ده محتاج ترتيب وتنسيق لأن مقابلة فى اسكندرية يعنى بحر وسمك ومصيف وان شاء الله نرتب الموضوع فى مقابلتنا بتاعت الجمعة اللى جاية فى القاهرة

بما أن المقابلة الرسمية للقسم هتكون الجمعة اللى جاية فى 6 أكتوبر القاهرة http://www.nilemotors.net/Nile/356424-2013.html فكان الهدف من المقابلة دى كذا حاجة:
أولا: مش معقول نكون فى مدينة واحدة ومساحتها مش كبيرة زى القاهرة وبنكلم بعض على المنتدى ومنعرفش بعض لو اتقابلنا صدفة فى الطريق
ثانيا: التنسيق مع بعض عشان نشوف مين هيطلع مقابلة القاهرة وهنطلع ازاى
ثالثا: الناس اللى مش هتقدر تحضر مقابلات القاهرة حبينا نجيبلهم المقابلة لحد عندهم

أسماء الحضور وأنواع سياراتهم: (حسب أسبقية الحضور)

Mstfun محمد سمير - سيات ابيزا فرانى 2001 1.6SR
Karim Ibiza كريم ابيزا - سيات ابيزا سوداء 98 1.6AFT
hamada_elzayat محمد الزيات - فولكس بولو فوكس زرقاء 95 1.3ADX
bogyman123 أحمد مصطفى - سيات ابيزا فيرانى 94 1.3AAV
mido_antouhh محمد حسن - فولكس بولو فضى 2001 1.4 16V AUA

اليوم بدأ بأتصال من مصطفى شعلان dodgecharger بعد صلاة الجمعة بيعتذر عن حضوره من القاهرة لأنه كان مواعدنى انه جاى المقابلة بس ظروف شغل جدت وان شاء الله تتعوض

بعديها قابلت محمد سمير على الفيس بوك وبيأكد انه جاى
وبعدها استلمت مكالمة من حمادة الزيات وميدو بيأكدوا على المقابلة والميعاد والمكان

بصراحة الواحد مبسوط انه اتعرف على ناس محترمة وقضى وقت لطيف

وكعادة مقابلات قسم سيات اللى بتنفرد بيها عن باقى الأقسام وهى اننا لازم نشحم ايدينا
بصراحة حاولت أخلى ايدى تفضل نضيفة لأطول فترة ممكنة بس للأسف هى نص ساعة وكانت لون القميص

أسيبكم مع الصور:

المنظر من مكان المقابلة (احنا كنا واقفين فى حتة أعلى من مستوى الطريق وده يخليك تكشف معظم طريق الكورنيش من فوق + منظر البحر + منظر الغروب) يعنى كان فاضلنا شجرة و 2 عصير ليمون



الأسماء بالترتيب من اليسار:
أحمد مصطفى
حماده الزيات
كريم ابيزا
محمد سمير
ميدو



لقطة من الجهة المعاكسة بعكس الترتيب السابق



صورة عن قرب لأن الوشوش مكانتش باينة فى الصور اللى فاتت (بنفس الترتيب الأول)



أحب أشكر حماده الزيات على دور الحاجة الساقعة (بصراحة جت فى وقتها لأن الجو فظيع) وأقوله مش كنت تجيب معاهم سندوتشين

فى النهاية أحب أقول انى اتبسط بمعرفة الناس دى ولو شفتهم على طريق البحر مش هسيبهم

وكل مقابلة وأنتم بخير