الموضوع: عمرة للعفشة 2

لو تفتكروا, كان عندى مشاكل فى العفشه فى الموضوع ده
http://www.nilemotors.net/Nile/359897-a.html
المهم, أنا كنت محتاج أغير معظم العفشة قدام
امبارح سألت عندنا فى الزيتون, عند واحد بتاع استيراد, قالى هايدينى الجنبين ب 700 جنيه
قلتله هاجيلك بكره أخدهم, بس بصراحة, الاستيراد مهما كان أصلى, برضه زى البطيخة وبيركب على التجربة, فقلت أروح لواحد عفشجى واجيبه معايا ينقى الحاجة بنفسه
المهم روحت النهارده, وكشف على العربية, قلنا مبدائيا محتاجين
- كبالن + 2 كاوتشه
-بطاحات
-سوست
-بيض مقص
- مساعدين (احتمال)
-2 كاوتشه علبة دركسيون
المهم, لقيته بيقولى نجيب كله جديد ماعدا الكبالن, لقيت الموضوع فتح جامد قوى وانا كدا كدا بلزق الحاجة, قفشت عليه وحسيته بيشتغلنى, قلتله لأ أروح اجيب الجنبين ب 700 جنيه
قفش هوا كمان عليا وقالى روح هاتهم انت, انا هاركب بس, المفروض الحاجات دى بتستهلك, ماينفعش يجوا مستعملين
المهم, دورتها كدا فى دماغى, قلت ماجتش من 200 - 300 جنية زيادة, والواحد يركب حاجة جديدة ويشترى دماغه, وقد كان
روحنا روكسى, جنب شارع دمشق كده, جبنا 2 بطاحات - 2 كاوتشة كوبلن fibi - 2 كاوتشة علبة دركسيون fibi - 2 بيض مقص, دول عملوا 360 جند
والعفشجى كان عنده سوست جداد أخدتهم على 200 و 2 راس كوبلن أخدتهم على 240
المهم الكلام ده كله ركب وحسيت بفرق فعلا فى المطبات, والعربية عليت لفوق, السوست طالعين مضغوطين جامد قوى وبيض المقص طالع دايب خالص وال 2 كوبلن طلعوا فاضيين من الشحم خالص وكاوتشاتهم متقطعه
لسه العربيه عايزه شغل فى علبة الدركسيون, يأما هانجيب بارات بس, يأما علبه كامله, وعشان كده مركبناش كاوتشات علبة الدركسيون, الحمد لله على كل شىء
العربيه كان حالها وحش قوى بس الحمد لله
أنا باكتب الموضوع ده بس عشان أقول
- أعتقد كل ما هو كاوتش أو مطاط, يستحسن يجى جديد, والاستيراد برضه مش مضمون قوى
- من حين لأخر لازم الواحد يبص على كاوتشه الكوبلن ,بنفسه حتى, يتطمن انها مش مطلعه شحم حواليها ومش متقطعه
- شكرا لرجاله المنتدى اللى ساعدونى جدا عشان الواحد يفهم شويه عشان غش السوق