مشكلة سحب في الايزيه مع التكيف

**engmina2013** · 03-06-2013 09:24 PM

انا استلمت العربية من أسبوع تقريبا و عملت بالعربية حوالي ٦٠٠ كيلو الملحوظة الوحيدة علي العربية أن التكيف بتاعها في مشكلة بيحمل أوي علي العربية خصوصا في الزحمة الطويلة لدرجة أن العربية مش بتستجيب للبنزين و مش بتتحرك عالطول و العيب ده موجود في عربيات اتنين من زمايلي في الشغل استلموا العربية معاية
انا لسه معملتش صيانة الألف و بقول لنفسي أن ده بسبب التلين
لكن هو فعلا حاجة غير طبيعية أن التكيف في الجو الحر و الزحمة بيفصل و يشتغل مروحة فقط لحد ما العربية تتحرك تاني و تأخذ سرعة معينة فيرجع يسقع تاني
غير كده العربية ممتازة و ثابتة علي الارض

**horas3000** · 03-06-2013 09:45 PM

اولا الف مبروك
و ربنا يديك خيرها و يكفيك شرها
و متنساناش في التقرير عنها

اما بقي في موضوع السحب فصعب تحكم علي العربية قبل التليين و قبل اول صيانه
و المفروض تبص علي المانوال و تشوف التعليمات بتاعت التليين و هل ينفع تشغل التكيف اصلا خلال الفتره ده و لا لا
و عموما السحب بيتحسن مع الوقت

**MoH.SaLaDiN** · 03-06-2013 10:32 PM

المشاركة الأصلية كتبت بواسطة engmina2013

انا استلمت العربية من أسبوع تقريبا و عملت بالعربية حوالي ٦٠٠ كيلو الملحوظة الوحيدة علي العربية أن التكيف بتاعها في مشكلة بيحمل أوي علي العربية خصوصا في الزحمة الطويلة لدرجة أن العربية مش بتستجيب للبنزين و مش بتتحرك عالطول و العيب ده موجود في عربيات اتنين من زمايلي في الشغل استلموا العربية معاية
انا لسه معملتش صيانة الألف و بقول لنفسي أن ده بسبب التلين
لكن هو فعلا حاجة غير طبيعية أن التكيف في الجو الحر و الزحمة بيفصل و يشتغل مروحة فقط لحد ما العربية تتحرك تاني و تأخذ سرعة معينة فيرجع يسقع تاني
غير كده العربية ممتازة و ثابتة علي الارض

معلش انت اشترتها من انهى معرض وعلى كام

**Land_Cruiser** · 03-06-2013 10:39 PM

لسه يا فندم العربيه بتلين . استني عليها لحد ال ١٠٠٠ كيلو علشان الموتور يكون اتفتح شويه

**الجنرال** · 03-06-2013 11:26 PM

ياااااااااااااه اخيرا حد استلم الاليزيه :d

الف مبروك طبعا الاول ويارب تكون كويسة معاك وربنا يديك خيرها ويكفيك شرها

ثانيا انت كده هتخوفني منها .. بس مش عارف حاسس ان الموضوع نسبي لان الناس اللى استلمت البيجو لم تشتكي خالص من الموضوع ده فمش عارف

ثالثا .. ياريت تحاول تفضي من وقتك نص ساعة تكتبلنا تقرير عن العربية لحد دلوقتى .. لان انا شخصيا قرار الشراء متوقف على اللى هتكتبه انت والاعضاء الاخرين اللى اشتروا العربية

رابعا حتة ان التكييف يفصل لفترة وبعدين يرجع يسقع .. فلو انت مش عاملة على ماكس فاعتقد ده طبيعي وبيحصل معايا فى الكيا

خامسا: ايه اخبار استهلاك البنزين معاك؟؟

سادسا: ياريت تفيدنا فى حتة التوكيل سواء انت رحت او حد من اصحابك علشان نعرف التوكيل ايه اخباره مع العربية دي خصوصا انها جديدة عليه

ثامنا: بخصوص موضوع التكييف فى الحر .. هل العربية سخنت؟؟ درجة الحرارة بتاعتها عاملة ايه؟؟

تاسعا: هل انت حاسس ان فى مشكلة فى الفتيس؟؟ يعنى لو قفلت التكييف الفتيس بيستجيب بسرعة وبيديك عزم وتجميع سريع ولا المشكلة برضه موجودة حتى وانت قافل التكييف؟

**Fo1Fo** · 04-06-2013 12:58 PM

هى العربيه مانيوال ولا أوتو ؟ فى الأشارات والعربيه سيلانسيه بيبقى التكييف مش قوى فى عدد كبير من العربيات بأستثناء اليابانى والعربيات الأعلى من 2000سى سى اما وأنت ماشى حتى بسرعه 20او 10كم بيكون فعال وثانيا وانت واقف وعلى السيلانسيه وتشغل التكييف السيلنسيه بيعلى لوحده من غير ماتدوس على البنزين ولا لأ؟ لأن الحكايه دى بيتم تفعيلها بعد التليين بمعر فه الصيانه ومن غيرها العربيه بتزهق اما الكومبريسور يفصل لمده 10-20 ثانيه ده طبيعى لعدم تكوين الصقيع ( الثلج) على السربنتينه............. أسف نسيت أقولك ألف مبروك وربنا يديك خيرها ويكفيك شرها وعلى فكره انا معايا ستروين من 18 سنه وناوى على الأليزيه ان شاء الله