الحراره جابت اخر الامبير - يوم مرعب
الخميس اللى فات لقيت امبير الحراره على اخره ركنت بسرعه و فتحت الكبوت سخونه مش طبيعيه و لقيت غطا القربه المياه بينفس هوا بمياه بتغلى معرفتش اعمل ايه المهم سبتها نص كده و دورتها و زودت مياه طبعا القربه فاضيه و مشيت شويه الحراره جابت الاخر تانى المهم كررت الموضوع ده لحد لما وصلت الحرفيين اخيرا
المهم قعدت فى الورشه لحد لما تبرد و قاللى المشكله فى الريدياتير روحت لواحد هناك فك الاكصدام و المروحه والسربنتينه و المروحه التانيه و كانت المفاجئه علبه الريدياتير مسدوده كميه شوائب عامله زى رمل البحر وكمل تسليك و تنضيف و ركبت كل الهيصه ده و طلعت على الورشه الاوبل قاللى يا فالح كنت زقيت العربيه علشان كده العربيه سخنه معاك 5 ساعات كده تبرد و قاللي لو كبست مياه والعربيه سخنه تجيب وش سلندر المهم قاللى تسريب المياه من الريدياتير و بتاع الريدياتير رجعتله و بيأكد انه مش من الريدياتير و قاللى لو عايز تريح نفسك فى بودره بتتحط فى المياه بتسد اى خرم المهم خوفت و مرضتشى كانت الساعه 1 بالليل و انا من 2 الظهر محتاس معاها قلت اروح و نكمل بعدين
الحسنه الوحيده غسل السربنتينه عدل المكيف
غسل الريدياتير و تسليكه صحصح العربيه جامد
المروحه الاماميه كانت نص نص غيرتها بالمره
اتعلمت افك الاكصدام
