الموضوع: اقتراحات واستفسارات لتظبيط فيات 127 توب ايطالي

السلام عليكم ورحمه الله
عندي عربيه 127 توب الايطالي دي موديل 1974
حاليا انا ظبطها من حيث الميكانيكه وناقص تظبيط بصيط في العفشه
العربيه بحالتها الاساسيه من حيث جنوط وكاوتشات وكراسي
انا عاوز افكار منكم علشان عاوز اجنطها ومش عارف المقاس بتاعها كام
غير كده الكراسي الي فيها بتزيق ومش عاجباني فيها لحامات كتير
انا مش عارف بقا اجيب جوز كراسي ريكارو ولا اشتري الكراسي بتاعتها من الوكاله او اي مكان
والدهان من برا العربيه محتاجه سمكره بسيطه جدا عاوز ارشها لون احمر ميتال
وبالنسبه لطقم الصوت ف انا عاوز منكم اقتراحات بقا انا عندي كاسيت تعبان جدا هغيرو وسماعتين مش بطالين بس عاوز احطهم قدام واجيب ورا سماعتين نضاف علي كاسيت حلو بس مش عارف اسعار

وفي مشكله اخيره مجننننناااااني لما تبقي العربيه واخده غيار 1 واجي اديها التاني اول ما ادوس بنزين كده اسمع صوت تقطقه من الموتو وتروح علي طول غالبا القاعده بس الميكانيكي قالي مافهاش حاجه

ولما اكون ماشي سريع وادوس فرامل بحس بغربله ورعشه في الدريكسيون

والمساعد اليمين فيه تحجير بسيط ف انا مش عارف المشاكل دي ايه حلها وربنا يكرمكم

والسلام عليكم ورحمه الله

المشاركة الأصلية كتبت بواسطة mohamedfx79

السلام عليكم ورحمه الله

عندي عربيه 127 توب الايطالي دي موديل 1974
حاليا انا ظبطها من حيث الميكانيكه وناقص تظبيط بصيط في العفشه

بما انى من ملاك ال127 التوب الايطالى مو 76 اسمح لى احاول اساعد
العربيه بحالتها الاساسيه من حيث جنوط وكاوتشات وكراسي
انا عاوز افكار منكم علشان عاوز اجنطها ومش عارف المقاس بتاعها كام
الجنوط سبور مقاس 13 كويس قوى عليها و كاوتش اعرض من الاصلى حاجه بسيطه علشان مايبوظش العفشه
غير كده الكراسي الي فيها بتزيق ومش عاجباني فيها لحامات كتير
انا مش عارف بقا اجيب جوز كراسي ريكارو ولا اشتري الكراسي بتاعتها من الوكاله او اي مكان
روح لسروجى محترم يفك الكراسى و يشيل الفرش و بعدين اى حداد يلحم الشاسيه بتاع الكراسى
والدهان من برا العربيه محتاجه سمكره بسيطه جدا عاوز ارشها لون احمر ميتال
ربنا معاك
وبالنسبه لطقم الصوت ف انا عاوز منكم اقتراحات بقا انا عندي كاسيت تعبان جدا هغيرو وسماعتين مش بطالين بس عاوز احطهم قدام واجيب ورا سماعتين نضاف علي كاسيت حلو بس مش عارف اسعار

على حسب الميزانية لكن حط في حسابك ان صالون العربيه صغير و اى سماعتين 150 وات مع جهاز من ابو 200 جنيه حيعمل شغل مش بطال خالص - و انا عملت فكرة جديدة بالنسبة للسماعات قدام - فكيت علبة التكييف البلاستيك السوده الى بتكون واصله من حجرة الموتور و داخله على الصالون لانها كانت مش شغالة- و سديت مكانها من عند الموتور بعازل علشان الصهد و بعدين وصلت سماعه واحدة كبيره تحت التابلوه بحيث الصوت يطلع من مكان الهوايتين الى في التابلوه و عامله احلى شغل

وفي مشكله اخيره مجننننناااااني لما تبقي العربيه واخده غيار 1 واجي اديها التاني اول ما ادوس بنزين كده اسمع صوت تقطقه من الموتو وتروح علي طول غالبا القاعده بس الميكانيكي قالي مافهاش حاجه

الحقيقه ما بحبش افتى في حاجة مش عارفها لكن غالبا قاعدة موتور او فتيس - ربط كل حاجه عند عفشجى و ربنا يسهل

ولما اكون ماشي سريع وادوس فرامل بحس بغربله ورعشه في الدريكسيون

غير التيل ممكن يبقى مش متساوى و احتمال كبير تحتاج تمسح الطنابير عند الخراط

والمساعد اليمين فيه تحجير بسيط ف انا مش عارف المشاكل دي ايه حلها وربنا يكرمكم

اياك ثم اياك من المساعدين المحجره لان المرحله الجايه حتلاقيك بتشتكى من شروخ او كسر في الشاسيه من ناحية المساعد المحجر - غيره فورا و بفضل الجديد ( بحوالى 350) الجوز

والسلام عليكم ورحمه الله

و عليكم السلام و رحمة الله و بركاته