مطلوب منى اعمل cv ليا ..... حد يفهمنى اعمل ايه؟؟؟؟؟

**besso** · 08-06-2013 03:39 AM

دلوقتى كده بقى علشان انا مش فاهم اى حاجه خالص
انا مطلوب من اعمل cv اعمل ايه

الحكايه وما فيها انى خلصت السنه دى دبلوم خمس سنين اخيرا الحمد لله

قومت طلعت عديت على توكيل من توكيلات السيارت بدون ذكر اسماء علشان الحسد ههههههههههههههه
هو رينو او كيا (اليافطتين متعلقين على مركز واحد مش عارف ازاى او انا اللى مابشوفش) المهم
سألتهم هاى ازيكوا عندكوا تدريب او شغل الامن وصلنى بالمدير (شوفتوا انا مهم ازاى ههههه) قاللى اه محتاجين
هو كان فاكر ان المدرسه اللى بعتانى فكان عايز جواب تدريب من المدرسه
قولتلوا لا انا جاى من نفسى .....
قاللى خلاص اعمللى cv فيه عنوانك والمدرسه اللى انت فيها وورقه تفيد بأنك مقيد فى المدرسه دى(الورقه دى انا هاتصرف فيها)

دلوقتى بقى اعمل ايه فى الcv ده
اكتب بيانات ايه؟؟؟؟
شكله بيبقى عامل ازاى ... يعنى ورق مطبوع ولا مكتوب بالايد؟؟؟؟
طبعا اكيد بيبقى اول ورقه زى الغلاف مكتوب عليها المحتوى بتاع الشخص فلان الفلانى؟؟؟ الورقه شكلها ايه

من الاخر عايز افهم العمليه دى كلها من طأطأ لسلام عليكم

الله يخليوا ياجدعان علشان ده مستقبل ولو قبلت هاعملكوا ديسكاوند ههههههههههههههههه مش هاصلحلكوا ببلاش يعنى التوكيل مش بتاع ابويا ههههههههههههههههه

**Shocky** · 08-06-2013 04:13 AM

بسم الله الرحمن الرحيم

بالنسبة للـ CV دة بيكون ورقة مكتوبة على الـ Word مثلاً .. وبعد كدة بتطبعها على Printer

وبيكون مترتب كالتالى:
البيانات الأساسية:
إسمك
التليفون
الإيميل
العنوان

البيانات الشخصية:
تاريخ ميلادك
موقفك من التجنيد

التعليم:
بتكتب هنا المؤهل اللى انت حاصل علية .. وسنة كام .. والتخصص بتاعك

خبرات العمل:
بتكتب هنا الوظائف اللى إشتغلت فيها قبل كدة
وبتكون بالترتيب من الأحدث إلى الأقدم .. يعنى أخر حاجة اشتغلتها تكون أول حاجة تكتبها
وبتكتبها كدة:
المسمى الوظيفى
من فترة كذا إلى كذا
الشركة
أى إضافة تانية

المهارات:
ودى غالباً تكتب فيها مهارات إستخدام الحاسب الألى
زى مثلا بتعرف تستخدم أى نظام ويندوز .. أوفيس .. تتعامل مع أى برنامج تانى فى الكمبيوتر وتكتب مستواك فى كل الحاجات دى

اللغة:
بتكتب اللغات ومستواك فيها

دة كدة الـ CV بشكل بسيط أوى ..
انا ممكن ابعتلك نموذج فاضى وإنت تملاة بالبيانات بتاعتك
بس قولى انت هتكتبة عربى ولا إنجليزى

**أبو صلاح** · 08-06-2013 01:29 PM

خش ياباشا على الموضوع ده
http://www.nilemotors.net/Nile/81219-cv.html

**besso** · 08-06-2013 01:55 PM

هو عربى بس فيه حاجات انا شايف ملهاش لازمه
يعنى مهارات الكمبيوتر العربيات مالها ومال الكمبيوتر؟؟؟؟

والشغل اللى قبل كده كله حاجات اى كلام مش وظائف يعنى يبقى لازم اكتبهم بردو؟؟؟؟

**besso** · 08-06-2013 02:19 PM

بالنسبه لموقفى فى التجنيد ... هو مؤجل من المدرسه اكتب ايه مؤجل؟؟؟

واللغه انا مش عارف مستوايا بس كويس يعنى فوق المتوسط

اكتب ايه بردو

معلش اسألتى رخمه

**Shocky** · 08-06-2013 02:58 PM

المشاركة الأصلية كتبت بواسطة besso

هو عربى بس فيه حاجات انا شايف ملهاش لازمه
يعنى مهارات الكمبيوتر العربيات مالها ومال الكمبيوتر؟؟؟؟

والشغل اللى قبل كده كله حاجات اى كلام مش وظائف يعنى يبقى لازم اكتبهم بردو؟؟؟؟

المهارات مش شرط مهارات الكمبيوتر .. الأول بتكتب المهارات الخاصة بيك فى مهنتك

وبعد كدة مهارات الكمبيوتر إن كانت وظيفتك تتطلب ذلك (لإن وظائف كتير بتتطلب الكمبيوتر دلوقتى)

أما بخصوص الشغل .. بيتهيألى تسيبها فاضية بما إنك Fresh Graduate إلا إذا إشتغلت قبل كدة فى حاجة لها علاقة بالشغل الجديد

**Shocky** · 08-06-2013 03:01 PM

المشاركة الأصلية كتبت بواسطة besso

بالنسبه لموقفى فى التجنيد ... هو مؤجل من المدرسه اكتب ايه مؤجل؟؟؟

واللغه انا مش عارف مستوايا بس كويس يعنى فوق المتوسط

اكتب ايه بردو

معلش اسألتى رخمه

موقفك من التجنيد كدة تكتب إنة مؤجل

اللغة ممكن تكتبها كدة

Arabic: Mother Tounge
English: Intermediate

بالعربى:

اللغة العربية: اللغة الأساسية
اللغة الإنجليزية: متوسط