الموضوع: سكودا فليشيا 97

المشاركة الأصلية كتبت بواسطة tota_ys

انا بعت عربيتى فبريكه بره وجوه موديل 96 مكيفه وسنتر ومريات كهرباء بالعافيه ب27800
انا عايز اقولك على نصيحه بس بجد خايف حد يقولى انتى بتتجنى على العربيه دى بس هقول بقى
عربيه سحبها وحش جدا
كلها مشاكل انا كنت لما بشغل التكيف كانت الحرارة بتوصل ل110 درجة وكل كام شهر جوان وش سلندر وعملت كل حاجة علشان السخونه مافيش فيده حتى من غير تكيف كانت بتولع فى الحر
ولفيت على اكتر من ميكانيكى ولا حد فاهم فيهاحاجة لدرجة انى غيرة حساس الصباع بتاع الحرارة اللى فى الماتور وطبعا غيرت ترومستات ولاداتير صينى ركبته ومروحه 2 سرعه كل حاجة عملتها ومافيش فايدة والحل طبعا كان فى الاخر انى بعتها بسبب السخونه دى

انا هقولك بقى ليه تدفع 34 الف فى عربيه زى دى اعمل زى ما انا عملت كمل حاجات بسيطه وهات اكسنت
هى معايا دلوقتى سحب تمام اسعار قطع غيار رخيصه تكيف تلاجه وعربيه شيك وابعد عن وجع الدماغ
اما بقى لو الفليشا دى دخله دماغك اكتر من 30000 الف اوعى تدفع جنيه
لانك لو نزلت السوق بعد ما تشتريها مش هتجبلك اكتر من 28000 الف دى لو هى تمام اوى يعنى
ومافيش حاجة اسمها تاجر هيشتريها ب33000 الف دا كلام مش يخش الدماغ هيبعها بكام بقى يعنى

بص يا باشا كون عربيه حضرتك كان فيها المشاكل دي ومكنتش قادر على حلها دة مش معناة ان كل الاسكودا بتسخن
على سبيل المثال عربيتي الله أكبر عليها ربنا يحفظها عمرها ماسخنت معايا لاني مهتم بصيانتها جدا جدا ومشيت بيها فى أوعر الطرق واصعب الظروف الجوية يكفي اقولك كنت مسافر الشرقية فى الصيف فى أواخر شهر 7 الصيف اللى فات وطبعا مش هحكي عن درجة الحرارة بتاعت الجو اللى اكتر من 45 والزحام الفظيع اللى كان فى أجزاء من الطريق يعني كان يوم والعياذ يالله من جهنم والعربية بصراحة مخذلتنيش أخد الطريق في اربع ساعات ونصف والطبيعي باخد ساعتين ومع ذلك العربية مسخنتش اكتر من الطبيعي

دي تجربة والعربية بتاعتي اتحط فى اكتر من اختبار والحمد لله اثبتت كفاءة غير عادية من السير فى الطرق المكسرة والعربية فيها حمولة لا يستهان بها اشخاص وامتعة وبمجرد انك تمش على ارض اسفلت مستوي العربية تجري الله اكبر كأنها فاضية وتعدي الـــ 120 كيلو

تعالي قارنها بالاكسنت والاكسل طبعا العربيتين دول نعومة وسحب وتكييف مفيش كلام
بس تعالي قارنها بالفليشيا من ناحية الصاج وقوة تحمل الشاسية والثبات والعفشة القوية طبعا الفرق هيكون لصالح الفليشيا

وأخيرا أنا والله لما كنت بشتري كان قدامي الاكسنت والاكسل بس كل معمل مقارنة بينهم تكون لصالح الفليشيا

تقبل تحياتي والف مبروك للزميل العزيز توكل على بركة الله ومتنساش ان الاسعار غالية اليومين دول وحتي لو دفعت الفين ولا 3 زيادة فى حالة نضيفة احسن متوفرهم وتجيب حاجة فيها مشاكل كتير وبردو هتصرف عليها دة غير العطلة

مرة تانية الف مبروك وربنا يجعلها خير ليك وعليك ومتنساش لازم تعمل تدبح عليها علشان العين وربك الستار

أسف علي الاطالة

المشاركة الأصلية كتبت بواسطة ابوابراهيم323

اطاله ايه يا استاذ احمد
دا انت كلام حضرتك يوضع على الجرح يطيب (:
وحضرتك من اكثر الناس اللى حببونى فى الفليشيا

تسلم يا باشا على كلامك الجميل

توكل على الله ومش هتاخد أكتر من اللى مكتوبلك


وانصحك نصيحة اخوية أفتح قسم سكودا وخصوصاً فى الموضوعات المثبتة والموضوعات المشروحة بالصور واقرا وأعرف كل حاجة عن العربية هتستفاد جدا من الموضوعات دي
واوعي فى يوم تهمل فى صيانة العربية ......... الفليشيا عربية عزيزة النفس أوي وبتاخد على خاطرها ههههههه متزعلهاش

كل ماتهتم بصيانتها وتغير الزيوت والفلاتر فى معادها خد منها أحلي شغل وهتشرفك على الطريق

هتهمل فيها زعلها وحش أوي ومتلومش غير نفسك

واهلا بيك فارس جديد من فرسان الاسطورة (((( سكــــودا فليشيا ))))

وزي مافهمت من كلامك ماشاء الله العربية حالتها كويسةوبعد ماتشتري إن شاء الله هتعمل الاتي
تعمل تشيك سريع على الكاوتش لو محتاج يتزود وكمان اوعي تنسي الاستبن
1- قياس مستوي زيت الموتور ومدي لزوجتة ( ميكونش ناقص أو محروق وعامل زي الماية )
لو تقدر تكشف على زيت الفتيس وتتأكد من ضبط منسوبة وميكنش ناقص
تشوف فلتر الهواء وتنضفة ببلاور
لما تيجي تغير زيت ((( نصيحة وبعد تفكير وسماع تجارب الاخرين )))
لو كانت مشاوريك قليلة ومبتمشيش كتير بالعربية هتحط زيت شل الاحمر 3000 كيلو بيتغير عند 2.500
لو مشاوريك كتير وبتتحرك بالعربية كتير تحط زيت شل الاصفر 5000 ويتغير عند 4.500
وتغير فلتر الزيت كل تغيرتين
يعني مرة تغير زيت بالفلتر ومرة متغيرش الفلتر
مون العربية كل ماتقدر وتخليش العربية تسحب من اخر ربع فى التانك علشان ممكن تعملك مشاكل انتا فى غني عنها

لو افتكرت حاجة تاني هقولك

عموماً الفليشيا عربية يعتمد عليها واخدة متانة العربيات القديمة وواخدة شكل العربيات الحديثة شوية
ومتنساش اول حاجة تبدأ بيها تسمي الله وتشغل صورة البقرة فى العربية بإستمرار

وفى النهاية ربنا يستر طريقنا جميعا

واى إستفسار أنا فى خدمة الجميع متي استطعت ذلك بحكم خبرتي المتواضعة