الموضوع: استفسار بخصوص سوزوكي التو 2007

اهلا و سهلا بيك معانا

بخصوص العربية اعتقد انك معاك الشكل اللي نزل قبل 2008 و مباشرة و قطع الغيار هتلاقيها متوافرة ان شاء الله في كذا مكان لو خارج التوكيل يبقي عندك ليدرز في الدقي 43 ش ايران أ محمد رفعت
و سوزوكي سنتر التوفيقية فوق اسماك ابو غالي أ هاني هاشم
فيه محلات في مصر الجديدة بس اسعارهم اغلي
عايز استيراد عندك احمد حلمي و عزبة شلبي و مرجحش تجيب قطع غيار جديدة من هناك

بخصوص الزيت ايه قبل ما ارد لازم اعرف ايه الزيت المستخدم و العربية ماشية كام الف كيلو ؟؟

و اخبار الصيانات ايه ؟؟

طب بالنسبة الكمية مش متأكد بصراحة لاختلاف المواتير و ان كنت اعتقد 3 و نص بس ممكن لما تغير تخليه يحط 3 لتر و يقيس متخليهوش يفتي عليك تشوف بنفسك
الزيوت فيه شل و كاسترول و فيسكو و فيه وولف لسه نازل جديد
و يفضل طبعا الزيت التخليقي ثم النصف تخليقي ثم المعدني عشان كده سألتك ايه الزيت المستخدم

و واضح من كلامك انك لسه جايب العربية مستعملة و معملتش حاجة فللعلم فيه صيانات وقائية لازم تعملها لأنك متعرفش المالك السابق عملها و لا لأ و هي كالآتي :


غير سير الكاتينة و الميكانيكي يبص ع بلية الكاتينة لو محتاجة تتغير و يفضل تتغير مع كل تغييرة
اكشف ع سير الدينامو

غير فلاتر هوا و بنزين

و اكشف ع طقم الكهربا و خاصة البوجيهات و اسلاكها

طبعا زيت الموتور و الفلتر مفروغ منه و فلتر الزيت يتغير مع كل تغييرة زيت و تستخدم النوع النضيف زي فلتر سوزوكي او تشوف الفلاتر الياباني زي زيوركس و تويوتا و هكذا بلاش الانواع الرخيصة الللي يقولك بتقعد 5000 كل القصة ان خامتها اي كلام فمش بتستحمل اوي و تلاقيها في حدود 10-15 ج اما الانضف و خاماته افضل زي الياباني هتلاقيه في حدود 20-25 ج

زيت الفتيس كذلك يتغير برده شل لزوجة 75w90 او 80w90 و بيتغير بعد كده كل 20-30 الف ك و اوعي حد يقولك زيت الفتيس مبيتغيرش و بيتزود لو نقص ده معناه ان فيه تسريب عندك و اوعي تخلي حد يعبي من الطرمبة البرتقالي لأن فيها بلاوي و بواقي الزيت في اماكن كتيير لكن اللي يعبي يستخدم رداخ و يحطلك من الجيركن المتبرشم و يفضل تعبيه في البنزينة

مية الريداتير تتغير و تحط مية ريداتير سواء خضرا او زرقا المهم تكون مية نضيفة زي موبيل او ادكو او اي نوعية مجربة و ديه بتتغير كل سنتين او 40 الف ك تقريبيا

زيت الفرامل يتغير برده كل سنتين عشان بيفقد خواصه و الشوائب و برده اوعي حد يقولك مبيتغيرش و بيتزود نقص يعني فيه تسريب سواء ماستر عمومي او فرعي ضارب او التيل خلصان و تستخدم نوعية كويسة زي بيندكس او لوكهيد او اس ال
و تخلي الميكانيكي ينزل الزيت اللي في الدورة كلها الأول و بعدين ينضف الدورة بالزيت الجديدة و ينزل الزيت الجديدة من كل فردة و بعدين يملي ع نضافة و ياخد هوا من الدورة اوعي يخلط او مينضفش الدورة عشان ممكن الماستر يضرب لو كذا نوع ع بعضه

شوف مية البطارية لو سايلة و اعملها صيانة كل شهر

نضف البوابة و رجلش دواسة البنزين و زييت دواسات البنزين و الفرامل و الدبرياج و بالمرة خلي الميكانيكي يبصلك ع طقم الدبرياج

لو كربراتير ينضف الكربراتير مع البوابة طبعا
لو العربية انجيكشن استخدم منظف انجيشكن بيتحط في التانك زي منظف انجيكشن STP او منظف دورة الوقود برده STP و ده تفوول التانك و تفضي العبوة ع التانك و تاخد العربية مشوار طويل و تحرق ع الغيارات شوية و هكذا لحد ما التانك يقرب يفضي و ساعتها تفوول تاني و هتشوف الفرق في الاستهلاك و تجميع العربية و بعدها تنضف فلتر البنزين لو غيرته او تركب الجديد

و زيت مفصلات الابواب و الشنطة و الكبوت و ربط مسامير العربية كلها

و ظبط زوايا و ربط عفشة ممكن قبل تربيط العفشة تغسل العربية من تحت و ترش wd-40 ع العفشة او تقول العامل و هو عارف هيرش فين و بعدها بيوم تروح تغسلها من تحت تاني و ترش شحم ابيض ع العفشة و تروح تربط بعدها العفشة هترجع كأنها جديدة

وممكن تكشف بالمرة ع اي حاجة شاكك فيها في العربية

بس كده يا باشا و اي استفسار اتفضل اهم حاجة متنسناش بالتقارير عن اي حاجة تعملها في العربية للافادة :)