عرفت ليه إللي بيجرب الفانتازيا بيقول عالkick down ضعييف!

**شاهين - بنز** · 10-06-2013 12:56 AM

كان دايما أما حد بيجرب ال a5 ويكون مش من مالكها بينتقد الكيك داون وبيقول ضعييف والسبب إنه مبياخدش باله إن لسه في تكة كمان في دواسة البنزين زي ماحنا عارفيين إن دواسة البنزين فيها تكة في الآخر وعارفين فايدتها لكن إللي بيجرب العربية من أول مرة ممكن مايخدش باله منها وللتذكير هي ليها فايدتين :
1- تسقيط عدد نقلات أكتر يعني لو كبست بنزين للآخر العربية حتسقط نقلتين مثلا لكن لو زودت للتكة حتسقط ثلاثة بدلا من إتنين أو أربع نقلات بدلا من ثلاثة وحتاخد الآداء الأقصى من المتور

2- تسقيط النقلات للحد الأقصى عندما يكون الفتيس على وضعية التبترونيك
مثلا لو إنت حاط أي غيار وكبست عالبنزين مش حتسقط غير أما إنت تعمل داون شيفت لكن لو كملت دواسة البنزين للتكة العربية حتسقط تلقائي من غير ماتعمل داون شيفت بنفسك.

**inspiron** · 10-06-2013 02:05 AM

معلش ليا تعقيب .. أولاً التكة اللي في آخر الدواسة دي فعلاً بتسقط النقلة..لكن مش يتزود تسارع العربية في الـ kick down بالعكس..لو جربت تمشي 80 مثلاً علي السادس.وعملت كيك داون لآخر الدواسة بالتكة الأخيرة دي..العربية مش هتسحب معاك نهائي بالشكل المتوقع .. لأن ساعتها هتسقط علي النقلة التالتة وهتعمل high revving عالي ( تدخل علي الـ red zone ) ومش هتلاقي غير خنقة في السحب..في حين إنك لو كررت التجربة وعملت كيك داون من غير ما تعدي التكة دي.العربية هتسقط للنقلة الرابعة وهتطلع عزمها كله في الحركة وساعتها هتحس بقوة السحب.
وده من الأسباب اللي مدية ناس كتير فكرة غلط عن أداء العربية..إنهم بيتعاملوا معاها زي الكوري والياباني في الحتة دي.وطبعاً النتيجة عكسية..بإختصار شديد..دواسة بنزين الأوكتافيا لها مفهوم تاني..لو إتعاملت معاها صح..تاخد أحسن أداء من العربية..
يعني أنا من كام يوم كنت مع الأخ الفاضل الأستاذ عمرو moratoz وعجبني أسلوب قيادته للعربية لأنه كان بيطبق الكلام ده.وكنت راكب جانبه علي الدائري وكنت بحس فعلاً بسحب العربية في الكيك داون بتاعها.

وده فيديو يوضح كلامي..لاحظ صوت التكة دي..وشوف الخنقة في السحب

https://www.youtube.com/watch?v=bWp9tvqcb1Q

**inspiron** · 10-06-2013 02:49 AM

المشاركة الأصلية كتبت بواسطة شاهين - بنز

اسمحلي ياأستاذ إنسبايرون أختلف معاك تماما في النقطة دي
يعني أكيد أما أكون ماشي على سرعة 150 ومديها غيار رابع حتتسارع أكيد أحسن من إني أكون مديها خامس
وأنا مجرب الإتنين كتيير بالتكة الأخيرة ومن غير وطبعا الفرق بينهم رهيب لصالح الأخيرة
وأكيد هما مش عاملين التكة دي عشان تخنق العربية عاملينها عشان وقت اللزم تسقط أكتر غيارات ممكنة للوصول لأحسن تسارع
يعني مثلا والعربية مدية تالت على سرعة 40 وعملت كيك داون العربية مش حتسقط أصلا وحتكمل على نفس الغيار إلى لو كملت للتكة إياها حتلاقيها نزلت تاني
نفس الكلام لو إنت ماشي على سرعة فوق ال 160 العربية عمرها ماحتسقط من سادس لخامس إلا لو جبتها للتكة
وياريت حد يفيدنا في النقطة دي ياجماعة

جايز كلام حضرتك صحيح..وعامةً أنا عمري ما جيبت التكة دي إطلاقاً غير مرتين تلاتة ولما لاحظت موضوع الخنقة دي مبقتش أجيبها خالص..ولما قارنت في الأداء بين إني أوصل لها أو لا طلعت بالنتائج التالية

ده كده آخر الدواسة :-

https://www.youtube.com/watch?v=4tPnfPYRXKk

https://www.youtube.com/watch?v=eeQDaPhwOBk

ده بدون التكة الأخيرة :-

https://www.youtube.com/watch?v=FLR2dpnySXk

https://www.youtube.com/watch?v=DdgKxCv4LlU

بطبعاً الفرق الملحوظ ده أيد وجهة نظري..وفي إنتظار آراء ملاك السيارة

**Omar.Shawki** · 10-06-2013 10:14 AM

وانا مع تجربتى مع العربية فعلا لما بكبس جامد مرة واحدة بحس بالتسارع مش قد كده وصوت الماتور عالى على الفاضى عكس لما بحرق على الغيار التسارع بيكون احسن وتسقط نقلة واحدة بس

**Moratoz** · 10-06-2013 03:50 PM

انا مع رأي inspiron ولكن كل واحد ليه اسلوب قيادة وطريقته في استخلاص الأداء المطلوب من العربيه ومننساش ان ساعات صوت العربيه بيبقي خادع احيانا في ايصال احساس السرعه يعني انا العربيه لو سايستها جامد انا بتخنق منها ولو كبستلها جامد هي بتتخنق مني وفي النص بقي في وضعين للسحب الأول هو حرق بسيط علي الغيار والثاني تبتدي تحس بتوغل العربيه في سحبها وعامه هوا دا الأداء ئل انا ببقي عاوزة اما التكه الأخيرة بحس ان العربيه صوتها عالي قوي وانا مبستريحس في الوضوع دا الا علي السرعات البطيئه .

**mo7a_mo7a** · 10-06-2013 11:51 PM

ببساطة العزم بيتناسب عكسيا مع السرعة
فالدواسة ليها نظامين الاول (المستوى الاعلى للدواسة) بيديك تسارع اعلى علي حساب العزم
المستوى لثانى للدواسة (التكة) بيديك اعلي عزم ممكن علي حساب السرعة

بس كده

تحياتي