السلام عليكم
طبعا كلنا سامعين عن ازمة البنزين والسولار الموجودة دلوقتى
انا كل ما اخرج اراقب البنزينات اللى حواليا علشان خلاص التانك كان بيفضى بس للاسف بلاقى طوابيـــــــر طويــــــلة او بلاقى البنزينة قافلة اصلا ومافيهاش بنزين
النهاردة كنت نازلة وقلت اشوف اى بنزينة وأقف فى الطابور وامرى لله
رحت البنزينة اللى بعد فلفلة واحنا راجعين من ميدان الرماية
اكيد سكان الهرم يعرفوها
هى بنزينة كبيرة وفيها on the run
المهم وقفت طبعا طابور كبير فضلت تقريبا نص ساعه او ساعه الا ربع
اول ما قربت خلاص على ماكنة البنزين كان ادامى عربية واحده لاقيت عامل من العمال واقف جنبى
المهم بسأله هى الازمة دى هاتفضل لحد امتى كده ؟
قاللى بالنص
قاللى يا مدام احنا اللى عاملين الازمة
قلتله ازاى ؟
قاللى انتى معدية على كام بنزينة وانتى جاية
قلتله بصراحة انا جايه عليكم على طول بس امبارح عديت على كذا بنزينة فى شارع الهرم منهم اللى فيها طوابير اد كده منها اللى كانت قافلة اصلا
قاللى بالظبط
المشكلة فى اللى قافلة اصلا دى
قاللى احنا سلبيين
قلتله المفروض اعمل ايه يعنى
قاللى بلغى
قلتله ابلغ عن ايه ومين
قالى بصى يا مدام احنا ربنا مدينا وزير تموين زى الفل ومش مقصر فى شغله ده بيمشى يوزع ارقام تليفوناته الشخصية على الناس و المساعدين والمندوبين اللى فى الوزراة كلهم بتلاقيهم فى الشارع هما والمفتشين بس الناس دى مش هاتشتغل لوحدها ..البنزينة اللى قافلة دى ممكن تكون بتبيع حصتها فى السوق السودا يا مدام الوزارة بتنزل بنزين ومنتظمة بس التجار واللى شغالين فى البنزينة بياكلوا فى جيبوهم واحنا بالسكوت بتاعنا ده بنساعدهم على كده
مفيش حاجة اسمها بنزينة تقفل
دى يا اما اخدت حصتها وبتوزعها سوق سودا
يا اما ممتنعه عن الاستلام لظروف بأه انا معرفهاش
اللى اعرفه ان فى بنزين ومفيش ازمة بس اللى زى دول وغيرهم هما اللى بيعملوا الازمة اتصلى بلغى وهما هايبعتوا مفتش ولو ثبت انها بتاخد حصتها وبتبيعها سوق سودا هايتعمل لها محضر
قلتله تمام جزاك الله خيرا انا فعلا هابلغ
انا نقلت لكم الحوار اللى حصل بالظبط لانى حسيت انها امانة
انا رجعت ومقررة انى فعلا هاجيب رقم مباحث التموين وابلغ عن اى بنزينة قافلة ومش هاسكت
ده الخط الساخن انا هاكلمهم بكرة
19468
ياريت محدش يسكت لو شاف بنزينة قافلة
ممنوع استخدام اللون الأحمر في الكتابة حيث أنه مخصص فقط للمداخلات الإدارية، تم تغيير لون الكتابة.
يرجى مراجعة قواعد المنتدى
3 ب
5:56 PM
2013/6/14