تجربة الفلتر الرياضى على سيارة بيتلز 1970

**reddragonmezo** · 12-06-2013 05:34 PM

مبدئيا ياجماعة انا كنت عامل موضوع علن الفلتر الرياضى فى قسم الكماليات وفجأة الادارة كتبت عليه منقول (مش عارف ازاى مع انه تجربة شخصية)وقفلت الموضوع

خلينا فى المهم وهو تجربة الفلتر الرياضى على السيارة البيتلز
نبدأ بحالة الماتور ومشكلته قبل تركيب الفلتر
الماتور اتعمله عمرة كاملة فى سنة 2010 كاملة بمعنى تغيير كل شئ بالقطع الالمانية او البرازيلية المهم اتكلف تقريبا 6 الاف جنيه
مشى من ساعتها بالتليين وكله 25000 كيلو
المشكلة انى كنت بغير طقم الكهرباء واظبط الكربراتير ويبقى كله تمام وحتى بعد التليين وتحس ان العربية مخنوقة فيها عزم لكن متديش سرعة (العمة عندى كانت اللى هى فلتر الزيت) المهم وضبت طقم الكهرباء وبعد فترة فكيت الكربراتير ونزلت عند صلاح شاكر علشان اجيب قطع غيار (خرطوم بنزين - فلتر بنزين - جوانات)المهم لقيت نفسى جنب شارع دمشق رحت معدى اشوف انواع الفلتر الرياضى ممكن يكون الفلتر سبب الازمة
حسبتها قلت لو انا جبت العمة الاصلية بتاعتا بس الهوا مش الزيت ثمنها بـ 100 جنيه والفلتر الرياضى بـ 150 وممكن لو مافيش فرق ابع الفلتر الرياضى لكن مش هعرف ابيع الفلتر بتاعها
اتوكلت على الله وجبت الفلتر الرياضى
التجربة
اتجرب الاول فى عربية الحاج شاهين 2001 ماتور 1400 سى سى
النتائج
1- الصوت = مش واضح غير لما تبقى ماشى وتحرق على النقلة
2- التسارع = اتحسن بنسبة 20% عن الفلتر الاصلى بتاعها
3- السرعة القصوى = عملت انجاز ووصلت فى اخر مرة إلى 160 كيلو متر فى الساعة
التجربة على البيتلز ماتور 1300 سى سى
1- الصوت = لو زوت وهى واقفة واضح اكثر من الشاهين
2- التسارع = زاد بنسبة 25% عن الفلتر العادى
3- السرعة القصوى = هرفع الفيديو قريب على اليوتيوب وصلت لـ 130 كيلو متر فى الساعة وقلقت انى ازود تانى علشان الكاوتش عندى تعبان

حبيت انقل التجربة وياريت الادارة ماتقولش عليه منقول تانى
اى حد عايز اى استفسار عن اى حاجة حصلت فى العربية بعد تركيب الفلتر انا موجود

**S O P H O S** · 12-06-2013 05:49 PM

جميل

**medosamir** · 12-06-2013 06:28 PM

يعنى فعلا حسيت بفرق ......طب سرعة العربيه قبل الفلتر كانت بتوصل كاااااااااااااام؟ وده يركب على128 ....1300 ولا لا؟

**Muahmmad Honda** · 12-06-2013 06:42 PM

ما شاء الله :) ربنا يباركلك فيها

**reddragonmezo** · 13-06-2013 09:23 AM

المشاركة الأصلية كتبت بواسطة medosamir

يعنى فعلا حسيت بفرق ......طب سرعة العربيه قبل الفلتر كانت بتوصل كاااااااااااااام؟ وده يركب على128 ....1300 ولا لا؟

بالنسبة للشاهين السرعة القصوى ليها قبل الفلتر = 140 كيلو متر فى الساعة بس قدامك خمسة ستة كيلو تتسارع فيهم براحتك
بالنسبة للبيتلز السرعة القصوى قبل تركيب الفلتر = 110 كيلو متر فى الساعة وبتموت بعد كدة
المشلكة فى الـ 128 ان حوض الماتور ضيق جدا والفلتر لازم او يستحسن يتحط فى مكان بعيد عن الحرارة وفى نفس الوقت يكون واصله تيار هوا كويس على الطريق المفتوح