رد وافي ومظبوط ...
عرض للطباعة
رد وافي ومظبوط ...
التضخم الرسمي في حدود 10% سنويا بس فعليا 15-20% ولو عايز الفلوس تحتفظ بقيمتها خزنها في صوره جنيهات أو سبايك دهب وسعر الدهب بيزيد بمتوسط سنوي 17% بس عيبه ان الزياده مش ثابته يعني سنه يزيد 7% وسنه يزيد 20% بس لو تحسب المتوسط لأخر 3 أو 5 سنين تلاقيه في حدود 17-18% سنويا. بس متنساش 2.5% سنويا للزكاه.
الحل الوحيد انك تشغلهم .. شوفلك مشروع او حاجة بتفهم فيها .. مشروع تشارك حد فيه او تشيله لوحدك و ربنا يكرم ..
الـ 100 ألف زمان كانوا مبلغ كبير النهاردة خمس اساتك من ام 200 و تشيلهم فى جيبك ..
و لسا ربنا يسترها على البلد دى
كنت درستها فى أحد الكورسات .
الموضوع ده له معادلات اقتصاديه و رسم بيانى تأريخى للمبلغ اللى معاك و القوة الشرائية .
بيسمى فى علم الاقتصاد القوة الشرائية .
مثلا القوة الشرائية لل1000 جنيه من 10 سنوات = القوة الشرائية لل 500 جنيه حاليا .
و بالمعادلات دى تقدر تحسب القوة الشرائية لأى مبلغ
و الذهب هو الحاجة الوحيدة اللى لا تنطبق عليه المعادلات دى لأن قيمته بتزيد طرديا .
فعلا النقود قيمتها مقارنة بالسلع بتقل بمرور الوقت لإننا إقتصاد غير منتج بوجه عام و كمان نتيجة لزيادة كمية النقود مقارنة بكمية السلع
و بالتالى الناس بيبقى معاها نقود و فى نفس الوقت مفيش سلع كفاية لشراءها
و فى الحالة دى السوق يبقى سوق البائع يعنى البائع نتيجة لإن الطلب على سلعته أكبر من المعروض عنده يبتدى يعزز سلعته بإنه يرفع ثمنها فاللى معاه فلوس أكتر هو إللى يقدر يشترى و من هنا يحصل التضخم
طبعا ممكن حد يرد عليا و يقولى : بس الناس فى مصر ممعاهاش نقود و فى نفس الوقت السلع تمنها بيزيد
أرجع و أقول الكلام ده مش دقيق لإن مصر إقتصاد كبير لكنه إقتصاد غير منتج و بالتالى كمية إنتاجه لا تكفى إستهلاكه فدايما الطلب أزيد من العرض
أمال لما الشعب المصرى مش بينتج بيجيب فلوس يشترى السلع الغالية منين ؟
الإقتصاد المصرى إقتصاد قايم على الجباية و الخدمات أكتر من الإنتاج يعنى الدخل القومى ناتج من عمل المصريين فى الخارج و رسوم قناة السويس و دخل السياحة (لاحظ إن كلها حاجات لا ينتج عنها سلع يمكن بيعها و لكنها كلها خدمات) بالإضافة لشوية منتجات أغلبها مواد خام أو محاصيل زراعية - هى دى إللى بتخلى المصريين يبقى معاهم فلوس أو نقود !!! لكن يشتروا بيها إيه بقى؟ إذا كان مفيش إنتاج ممكن يشتروه بالفلوس دى
حد لاحظ إن العربيات حاليا أغلبها بيتباع أوفر برايس يعنى بسعر أكبر من السعر المعلن من التوكيل ؟
ليه؟ علشان المشتريين أكتر من عدد العربيات المطروحة و غالبا الحجز عند الوكيل بيبقى بالشهور
ده رغم كل الضنك إللى إحنا حسين بيه و الحال الواقف إللى الأغلبية عايشة فيه
فمع الطلب الهائل و ضعف الإنتاج لازم يحصل تضخم إللى هو معناه إن قيمة النقود مقارنة بالسلع تقل مع مرور الوقت
أفضل طريقة لتجنب أثر التضخم على النقود هو إستثمارها
الإستثمار عملة متعددة الأوجه
الوجه الأول ربح أو زيادة فى القيمة
الوجه التانى مخاطرة
الوجه الثالث القابلية للتسييل (يعنى تحويل الإستثمار لنقود سائلة)
العلاقة بينهم طردية
كلما قلت المخاطرة و السيولة كلما كانت فرص الربح أقل و أبطأ
كلما زادة المخاطرة و السيولة كلما زادت فرص الربح و كانت أسرع
فمثلا إستثمار النقود فى مشروع تجارى المخاطرة هتكون كبيرة و سرعة تحويل النقود لسلع و العكس هتكون كمان كبيرة و أخيرا الأرباح هتكون كبيرة
أما إستثمار النقود فى عقار أو أرض المخاطرة هتكون قليلة و السيولة منعدمة تقريبا و الأرباح بطيئة و فى زمن الأزمات لا يصلح هذا الإستثمار لمواجهة الطوارىء (فاكرين أزمة الرهن العقارى فى أمريكا)
الذهب بقى بيتميز بإنه قليل المخاطرة سريع التسييل نسبيا و لكنة بطىء الربح و لكن بيغطى التضخم و هو أضمن مخزن للقيمة على وجه الأرض و يصلح للإستخدام فى أفضل و أحلك الظروف
الإستثمار فى ودائع بنكية بتمسك الموضوع من المنتصف و خصوصا فى مصر لإن الحكومة بتضمن ودائع البنوك و بالتالى المخاطرة قليلة و السيولة عالية جدا و لكن الربح يكاد يغطى أو أقل من معدل التضخم
آسف على الإطالة و أرجوا إنى أكون أفدت
يعنى دلوقتي اللى معاه 20 الف ج يحط فلوسه ف البنك ف نظام الودائع ولا يحطها ف مشروع صغير ولا يحطها ف دهب ولو دهب يشتري الدهب ع شكل ايه ويبيعه ازاى
الافضليه بين السبيكه والجنيه حسب المبلغ يعني ميزه السبيكه انك ممكن تجيب احجام كبيره عن ال 8 جرام بتوع الجنيه وميزه الجنيه انك لو مزنوق في مبلغ صغير تكيش جنيه بدل ما تكيش سبيكه يعني بتاخد على قد احتياجك بالظبط. لو هتبيع بره مصر السبيكه تتباع عن الجنيه.
طبعا ممكن يكون فيه مكسب على حسب المده اللي هتحتفظ بالدهب فيها. يعني لو سنه واحده ممكن تلاقي المكسب يادوب أد الفايده بتاعه البنك واحيانا أقل لكن لو 3 سنين وأكتر فالمكسب مضمون ان شاء الله وبأكتر من فايده البنك وحلال 100% بدون الدخول في متاهات.
زي الاخوة هنا قالوا لحضرتك
ده بيختلف حسب التضخم inflation rate وواوضاع السياسية سائدة
والتخصم شئ طبيعي لكن المشكلة في مصر حاليا بيزيد بشراسة
والتخصم باي حال لم يزيد عن 20 % سواء ارقام رسمية او حتي غير رسمية ..
وممكن حضرتك تخزن قيمة النقود في مشروع او عقار او دهب بس تاخد بالك وتطلع زكاتهم