تيريوس 99 و 2000 الحاضر الغائب

**Waleed_aboammar** · 25-08-2008 03:59 PM

رغم عيب مركز الثقل الشهير و عدم الثبات فى الملفات على سرعات عالية و لكن تظل تيريوس 99 و 2000 الحاضر الغائب لاصحاب البال الرايق و راغبى ارتياد سيارة عالية عن الطريق بميزانية متوسطة و لكن دون تأكيدات من اصحاب الخبرة فى الاعتمادية و دعم الوكيل الحالى لهذا الموديل القديم نوعا.
هل من يدلى بدلوه؟؟؟؟؟؟!!!!!!!!!!

**أبو عبدالله** · 27-08-2008 12:08 PM

كلام مظبوط وجميل
العربيه فعلا مع ان موضوع الثبات ده اشهر من النار على العلم
ومعروف للكل
الا ان العربيه دي ماسكه سعر لحد الأن مساوي لسعرها ايا ما نزلت اول مره
وهو في الخمسينات بزياده او نقص حسب الحاله

والغريب اني دائما الاقي العربيه حالتها كويسه يعني مثلا دايما بلاقيها لسه بالبويه بتاعت بلدها وتحس ان اصحابها دائما محافظين يعني تلاقي العربيه مش متبهدله قوي
طبعا فيه متبهدل بس انا بتكلم على اغلب اللي بشوفه انا

والغريب ان العربيه برضه ضيقه من الداخل وضيقه مش في القاعده ولكن في السعه الكامله لها يعني انت بتقعد مرتاح ولكن بتفرق في عدد الركاب

انا أظن من اللي انا شوفتهم ان العربيه اعتماديه جيده لأن العربيه لحد الأن لها سعر واغلب اللي بيشتروها مش بيعملوا او يصلحوا فيها حاجه

**mido777** · 27-08-2008 12:32 PM

كان معايا تريوس 99 وقعدت معايا حوالى سنة
وبصراحة مشفتش منها حاجة وحشة

بعتها علشان ضيقة من جوه وتحس ان اللى قاعد جانبك فى اى ملف ممكن يبقى على حجرك

**Dr_Smart** · 27-08-2008 05:16 PM

يا ريت والله اللي عنده معلومات اكتر عن العربية دي يفيدنا لأني بفكر اجيبها مستعمله 99 او 2000 ... واحتمال كبير اوتوماتيك

**M_55** · 02-09-2008 10:22 AM

ممكن معلومات اكتر عنها ، خاصة الاوتوماتيك

**pp900** · 17-09-2008 01:09 AM

فعلا العربيه دى انا بشوفها دايما فى الشارع بحاله ممتازة ,,, وليا زميله فى العمل عندها موديل 99 وبتقول انها من ساعه ما جبتها من 3 سنين ما صلحتش فيها حاجه غير التغيرات للزيت وتيل الفرامل والسير والحجات الطبيعيه ... ربنا يباركلها فيها ,, كمان هنا فى اسكندريه تجديدات الشوارع مكسرة الدنيا والعربيات والعفشه :( انا غيرت عفشتى للديهاتسو شاريد بسبب التكسيرات .. العربيه دى مناسبه جدا لشوارعنا وللمزانيات المتوسطه

بس حد يقولنا رايه وبصراحه هيا بحوالى 50 الف حسب حالتها صعودا او هبوطا فى السعر ,,, اللى عاوز يشترى ومعاه المبلغ ده يجيب جديد من العربيات الجديده اللى كلنا عارفنها صغيرة وبسعر مناسب ولا يجيب تيريوس مستعمل؟ ارجو الرد