مطلوب نصيحة لماتور الفيليشيا - اعزكم الله

السلام عليكم و رحمة الله و بركاته

مساء الفل لكل الفيلشاويه
بصوا يا جماعه انا تعبان جدا من ماكنة الفيليشيا 95 عملتلها عمرة كاملة من سنة و نصف و جبت و ش سلندر جديد ولسه بردوا بتسخن و دلوقتى المشكله انها جايبه طقم شمبر يعنى بتاكل زيت و بترزع و حرارتها بتعلى بسرعه و توصل فوق التسعين حوالى 92 وانا ماشى الصبح يعنى مش حر اوى و ماشى على 100/110 ولو زودت تزيد الحرارة و العربيه فيها تكييف و خايف استخدمه من السخونية
فبرجاء الافادة اعمل ايه

اجيب ماكنة فيليشا شورت كت ولا اجيب ماكنه نوع تانى اقوى مثلا 1600 او 1500 علشان التكييف و ايه المكن اللى ممكن ينزل على نفس القواعد علشان تترخص و الاسعار عامله كام

لو سمحتم حاولو تفيدونى شكـــــــــــــــــــــــ ـــــــــــــرا

http://www.nilemotors.net/Nile/183321-a.html

http://www.nilemotors.net/Nile/292828-90.html

اقتباس:

---

المشاركة الأصلية كتبت بواسطة acc-mgamal

السلام عليكم و رحمة الله و بركاته
وعليكم السلام ورحمة الله وبركاتة
مساء الفل لكل الفيلشاويه
بصوا يا جماعه انا تعبان جدا من ماكنة الفيليشيا 95 عملتلها عمرة كاملة من سنة و نصف و جبت و ش سلندر جديد ولسه بردوا بتسخن
بص ياصديقي العزيز وعن اقتناع بالبلدي ماكنة الفليشيا مبتتعمرش ودة لية
علشان العمرة بتاعتها بتتكلف جدأ بتوصل لتمن موتور استيراد ومش اي ميكانيكي يقدر يعملها والنتيجة فى الاخر مش مضمونة علشان كدة بقولك الموتور مبيتعمرش فــ الاسهل تجيب موتور استيراد مقفول احسن بدل عك الصنايعية
و دلوقتى المشكله انها جايبه طقم شمبر يعنى بتاكل زيت و بترزع و حرارتها بتعلى بسرعه و توصل فوق التسعين حوالى 92 وانا ماشى الصبح يعنى مش حر اوى و ماشى على 100/110 ولو زودت تزيد الحرارة و العربيه فيها تكييف و خايف استخدمه من السخونية
فبرجاء الافادة اعمل ايه

أوعي تشغل التكييف الايام دي لو حتي الموتور سليم فما باللك بحالة الموتور بتاعك أنا أصلا مش مقتنع بتركيب تكييف على موتور 1300 سي سي لو حالته فوق 90 % لان العربية مش ناقصة تكتيف وسخونية علشان التكييف بيأثر على سحب العربية وكمان العربية بتسخن بسرعة وكمان أداء التكييف مش هتكون سعيد بيه

اجيب ماكنة فيليشا شورت كت ولا اجيب ماكنه نوع تانى اقوى مثلا 1600 او 1500 علشان التكييف و ايه المكن اللى ممكن ينزل على نفس القواعد علشان تترخص و الاسعار عامله كام

هات موتور استيراد لو مستغني عن التكييف هات موتور 1300 سي سي
لو محتاجة ضروري يفضل تجيب موتور 1600 بس اسمع ان قطع غيارة مش متوافرة أوي والله أعلم وكمان اكيد هتغير الفتيس كمان بفتيس 1600

يارب أكون قدمتلك معلومة مفيدة وتقبل تحياتي
لو سمحتم حاولو تفيدونى شكـــــــــــــــــــــــ ـــــــــــــرا

---

شكرا يا باشا على اهتمامك و مساعدتك

بس لو عايز اخلص من دوشة موتور الاسكودا بصفة عامة حد ممكن ينصحنى اجيب ماكنة ايه و الاسهار دلوقتى ايه ( ماكنة كاملة - تكييف - باور )

و لو سمحتم اللى يعرف ميبخلش بالكلام جزاكم الله خير

اقتباس:

---

المشاركة الأصلية كتبت بواسطة acc-mgamal

شكرا يا باشا على اهتمامك و مساعدتك

بس لو عايز اخلص من دوشة موتور الاسكودا بصفة عامة حد ممكن ينصحنى اجيب ماكنة ايه و الاسهار دلوقتى ايه ( ماكنة كاملة - تكييف - باور )

و لو سمحتم اللى يعرف ميبخلش بالكلام جزاكم الله خير

---

منتظر الاجابة
انا كمان

اقتباس:

---

المشاركة الأصلية كتبت بواسطة acc-mgamal

شكرا يا باشا على اهتمامك و مساعدتك

بس لو عايز اخلص من دوشة موتور الاسكودا بصفة عامة حد ممكن ينصحنى اجيب ماكنة ايه و الاسهار دلوقتى ايه ( ماكنة كاملة - تكييف - باور )

و لو سمحتم اللى يعرف ميبخلش بالكلام جزاكم الله خير

---

انا جايب موتور استيراد 2002 حقن

بس انا اشتريت العربية والموتور كان راكب

وكان الموتور بالفتيس بــ 3500

كان من شركة فى مدينة نصر اسمها أنا للاستيراد

انتظر ردود باقي الاعضاء واعتقد لازم يكون معاك ميكانيكي كويس

اقتباس:

---

المشاركة الأصلية كتبت بواسطة ابوابراهيم323

منتظر الاجابة
انا كمان

---

خير يا استاذ ابراهيم


طمنا عليك وقولنا اخبار العربية اية معاك وملاحظاتك اية على الحرارة

متابع

هل موتور فولكس ينفع زي البورا مثلا او سيات ابيزا
متابع
ربنا يوفقك

اقتباس:

---

المشاركة الأصلية كتبت بواسطة أحمد جودة

خير يا استاذ ابراهيم


طمنا عليك وقولنا اخبار العربية اية معاك وملاحظاتك اية على الحرارة

متابع

---

أ / احمد جوده
انا ابوابراهيم (:
ثانيا والله حتى الان ما شاء الله لا قوه الابالله
فى الساعة 2 ظهرا وزحمة الطريق الحرارة كانت بين الــ 70و ال 90 ولكنها لم تصل الى ال90
علبه الدريكسيون فعلا بتخبط بس فى المطبات والارض المكسره
العربيه مش عارف حاسس انها بتجرى يمكن لانى كان عندى 27
ولسه بتعرف عليها يوم بعد يوم

تركيب موتور عربية على عربية أخرى لا يجوز مروريا وقانونيا
يعني مش هيتم ترخيص الموتوربتاع هوندا مثلا على عربيتك سكودا
إنما لو عاوز تحط في عربية فيليشيا موتور فيفوريت او فابيا او اي سكودا فده ممكن مروريا.
بالنسبة للفنيات فمن الصعب تركيب موتور عربية على عربة تانية تختلف عنها جوهريا.
انصح حضرتك توفيرا للنفقات والمجهود وحفاظا على الدم ميتحرقش من الصنايعية والتجار إنك تركب موتور فيليشيا كامل كامل بكل مشتملاته بالفيتيس (استيراد)مرة واحدة
موتور الفيليشيا 1300 الكربريتور اغلى من الانجكشن بحوالي 500ج.م تمنه حوالي من 3500-4000ج.م
وطبعا ممكن تلاقي موتور 1600 بس افتكر إنك هتتعب جدا في توفير قطع غيار له خلال الاستخدام والصيانات لأم مصر منزلش فيها فيليشيا 1600
لو عاوز موتور 1600 ممكن تركب موتور أوكتافيا 1 اللي هي اواخر التسعينات بس الموضوع عاوز احترافية وبال ووقت ومصاريف وهتغير ضفيرة وهتعمل حاجات كتير بس هيكون عليها نفاثة وقطع غياره موجود وحوض الفيليشيا يساعد بس نصيحتي خليك في موتورها

اقتباس:

---

المشاركة الأصلية كتبت بواسطة benmatar

تركيب موتور عربية على عربية أخرى لا يجوز مروريا وقانونيا
يعني مش هيتم ترخيص الموتوربتاع هوندا مثلا على عربيتك سكودا
إنما لو عاوز تحط في عربية فيليشيا موتور فيفوريت او فابيا او اي سكودا فده ممكن مروريا.
بالنسبة للفنيات فمن الصعب تركيب موتور عربية على عربة تانية تختلف عنها جوهريا.
انصح حضرتك توفيرا للنفقات والمجهود وحفاظا على الدم ميتحرقش من الصنايعية والتجار إنك تركب موتور فيليشيا كامل كامل بكل مشتملاته بالفيتيس (استيراد)مرة واحدة
موتور الفيليشيا 1300 الكربريتور اغلى من الانجكشن بحوالي 500ج.م تمنه حوالي من 3500-4000ج.م
وطبعا ممكن تلاقي موتور 1600 بس افتكر إنك هتتعب جدا في توفير قطع غيار له خلال الاستخدام والصيانات لأم مصر منزلش فيها فيليشيا 1600
لو عاوز موتور 1600 ممكن تركب موتور أوكتافيا 1 اللي هي اواخر التسعينات بس الموضوع عاوز احترافية وبال ووقت ومصاريف وهتغير ضفيرة وهتعمل حاجات كتير بس هيكون عليها نفاثة وقطع غياره موجود وحوض الفيليشيا يساعد بس نصيحتي خليك في موتورها

---

شكرا على الرد

طب الموتور 1300 فيليشيا كاربيراتير افضل و لا انجيكشن
وانهى و احد ممكن اشغل عليه تكييف


على فكرة انا سألت فى المرور و مدير المرور قاللى ممكن تنزل اى نوع ماكنة بس المهم تنزل على نفس القواعد فانا مش عارف كلام حضرتك معناه انه مفيش ماكنة نوع تانى هتنزل على نفس القواعد و لا قصدك ايه

برجاء سرعة الرد لانى كنت ناوى انزل ماكنة بولو 1400

اقتباس:

---

المشاركة الأصلية كتبت بواسطة acc-mgamal

شكرا على الرد

طب الموتور 1300 فيليشيا كاربيراتير افضل و لا انجيكشن
وانهى و احد ممكن اشغل عليه تكييف


على فكرة انا سألت فى المرور و مدير المرور قاللى ممكن تنزل اى نوع ماكنة بس المهم تنزل على نفس القواعد فانا مش عارف كلام حضرتك معناه انه مفيش ماكنة نوع تانى هتنزل على نفس القواعد و لا قصدك ايه

برجاء سرعة الرد لانى كنت ناوى انزل ماكنة بولو 1400

---

موتور فيليشيا كربريتور يمتاز بسهولة الصيانة وقلة الأعطال وتقبله لأي نوع وقود (من 80 وطالع) ومعدل كفائته حتى مع الوقود الردئ جيدة مع توافر قطع الغيار ورخصها عشان كده هتلاحظ إنه أغلى!!!
طبعا موتور الحقن الألكتروني مش هتحطله اقل من 90 عشان نسب إنضغاطه، ووحدة الحقن الألكتروني (الانجكشن) مش الكل بيصلحها (خيبة صنايعية) بس عزمه أقوى واستهلاكه للوقود اقل (بنسبة بسيطة لأنها بطبيعتها موفرة) وممكن يكون افضل لو عاوز تكييف، لأن في كل الحالات لو تكييف يبقى متحطش 80 بالأخص لو استخداماتك كلها داخل المدينة وزحام ومطالع وكباري، والموتور برضه 1300
أما بالنسبة لحكاية أي موتور يركب بشرط ابعاد القواعد فدي جديدة جدا وبرضه الله أعلم بس انا شخصيا استبعد الكلام ده بتاتا، بالإضافة لأن حضرتك مستحيل تلاقي عربية نقس ابعاد قواعد الموتور بتاعها متشابهة ومتطابقة مع عربية تانية خالص!!! والحكاية مش بس ابعاد قواعد موتور وإنما توفيق كبالن وفيتيس واتياش وآلات جر وعلبة دركسيون (لو باور قصة تانية) ودياولووووو!
لو غاوي ومستعد اسأل على تركيب موتور أوكتافيا1 (اواخر التسعينات 1600) ينفع ولا لأ. بس تسأل خبير سكودا فني فاهم ومحترم واللي هيقوم بالعملية مش مجرد إبداء آراء وساعة الجد متلاقيش حد.
وفي الآخر ارجع واقول لحضرتك لو موتور1300 عادي سليم وحالته كويسة مع ردياتير جديد زيرو ومروحة أمامية زيادة قوية ودرة تبريد وكهرباء مظبوطة، العربية هتبقى تمام معاك.
أنا دوشتك بس من شهرين كنت في زيارة للمنصورة، وفي منطقة الحسينية (زي الوكالة وأشد) لاقيت مستعمرات سكودا وكميات من فيليشيا وانصاص وعربيات كاملة ومواتير تفتح النفس بس كنت مستعجل مسألتش على حاجة، ممكن تروح وتشوف بنفسك الكم المهول اللي هناك، واكيد هيدلوك على الصح،،، وبالتوفيق