الموضوع: دليلك لعلاج سخونة الفليشيا

حل مشكلة سخونة الفليشيا من الاخر

انا حبيت اعمل الموضوع عشان الي عايز يبيع فلشيته عشان بتسخن
ملحوظات:
• الفليشيا عربية حساسة للحرارة وده راجع لمعدن المصنوع منه متور العربية الانتمونيا وهو بيسخن اسرع من الزهر العادي ولكنه ايضا بيبرد اسرع وهو معدن صلد جدا ولكن يعيبه عدم تحمل الحرارة وده مصنوع منه البلوك بالكامل والله اعلم او وش السليندر في كل العربيات بيبقي مصنوع من الالومنيوم .
• العربية اخرها 145 ك/س واي زيادة الله يرحم الوش.
• العربية بتسخن مع التكييف زيادة وده طبيعي عشان حجم الردياتير صغير وادامه سربنتينه حاجزة الهوا عنه ناهيك عن عدم وجود مروحة للتكييف يعني مروحة للردياتير والتكييف .
• اي لعب او تغيير في نوع الترموستات يجب ازالة ترموستات الكوع لتفادي اختلاف درجات الفتح والقفل للترموساتين.
• مفيش داعي للردياتير النحاس نهائي اي رداتير المونيوم احسن مع مروحة قوية وهقول ليه بعد كده.
• الوضوع كله عن تجربة ومفيهوش افتكاسات او بطيخ زي ما بنقول
• تلف الوش او الجوان يجب تغيرة الجوان ومراعاة حالة الوش يعني يتغير او يتخرط ان لزم الامر
• درجة الحرارة
1-تحت 90 امان اوي.
2-90 بالزبط كويس .
3- 95 فوق الطبيعي.
4- عدت 100 اوقف علي جنب.
5- دخلت الخطوط الحمرا ده معناه الوش في خطر والمتور كله.


نبدأ يا مسهل انا عربيتي بتسخن
في الاول لازم نعرف العربية بتسخن امتي هل مع الجري ؟.هل في الزحمة ؟ .هل بتسخن اوقات وي اوقات؟ هل المشكلة ظهرت تدريجي ولا فجأة؟ .دي اسئلة هحاول اجاوب عليها ونحطلها حلول.
حاجات لازم اعملها عشان اتلافي مشكلة السخونة
1- متجريش اسرع من 140 ولوجريت يبقي نوع من التجربة لكن مش سفرمثلا.
2- اراعي منسوب المياة في القربة وتكون خضرا او حمرا.
3-اراعي تنظيف الردياتير كل 3 الي 6 شهور.
4-مراعاة ظبط الكهرباء والتكيهات.

ملحوظة :
معظم الي بيعانوا من مشكلة السخونة بيكونوا شرينها كده
طب انا عربتي مبتسخنش والحمد لله اعمل ايه عشان احافظ علي الوضع ده.
1- كل النقط اعلاه
2- التأكد من دورة التبريد سليمة من طرمبة ومروحة والترموستات بتعمل في معادها.

طب الي عربيته بتسخن يعمل ايه
الفحص الشامل والتأكد من الحاجات دي
1- لازم يتأكد انها بتسخن فعلن يعني ممكن الامبير بيخرف او صباع الحرارة خربان .
2-اكيد في ذكرة سيئة مثلا العربية مشيت بدون مياه وجوان الوش ضرب.
3- يعمل فحص ولو بنفسه
أ- فحص دورة التبريد
- طرمبة المياة : ضغطها كويس وده بيبان مع فك خرطوم الراجع
لو مفيش مياه ده معناه ان ترموستات الكوع مكسورة او في سدد كبير لو في مياه طالعة زود بنزين لو ضغط المياة بيزيد كده الطرمبة تمام.
- الترموستات الداخلية: الي راكبة في الردياتير ودي نوعين سرعة واحدة او سرعتين علي حسب المروحة الي راكبة .المكيفة سرعتين والعادية سرعة واحدة.
شوف المروحة هتشتغل والامبير علي كام وهتفصل والامبير علي كام ممكن تعمل الموضوع ده والعربية وقفة او مشية ولكن لو مشية افضل وهتعرف من صوت المروحة.
انواعها
السرعة واحدة
1- بتاعت الفيات 68-82 او 68-86
2- الاصلية مش عارف بالظبط بس درجة حرارة الفتح 88 .
السرعتين
1- بتاعت الجولف 80-90 ودي يعني تشتغل السرعة العالية عند 90 توصل ل 80 تشتغل السرعة الاقل.
2-الاصلية ويوجد نوعان
84-95 والتانية 95-105 بس طبعا خراب ديار واعتقد ليها علاقة بالموديل بس بتاعت 97 الاولنية .
طبعا انا قصدي الاصلية كا ارقام لكن في اصلي وفي صيني.
-الترموستات الي في الكوع: نعرف انها شغاله كويس بببساطة والعربية باردة المفروض تكون قافلة عشان تحبس المياة داخل المتور فيسخن اسرع يعني فك الخرطوم والعربية سخنه لو حسيت ان في ضعف في خروج المياة يبقي الترموستات بايظة.
الترموستات دي تتحط مع الترموستات الاصلية يا بلاش
وهي ليها 3 فوائد
1- سرعة عملية تسخين المحرك زي ما قولنا.
2- تثبيت درجة حرارة الموتور وده يضمن افضل اداء واطول عمر (كل ما الدرجة بتاعت المتور تقل بسبب التبريد تقلل المياة الخارجة فيسخن وهاكذا).
3- بتحافظ علي ثبات اداء الترموستات الداخلية وبتديها وقت كافي للأحساس بحرارة المحرك طبعا لو سليمة يعني بتزبط الموضوع مع الترموستات من الاخر ولكن يراع فكها مع تغيير الترموستات بواحدة غير الاصلية .
- الردياتير عادي الاصلي ممتاز والصيني ممتاز برده بس طبعا يراعي تنظيفة من حين لحين. الامونيوم بيمتص السخونه اسرع من النحاس ويفضل تركيب مروحة اقوي لسهوله تفريغ السخونة.
-المياة المبردة ودي مهمه اوي اوي وتقريبا الفليشيا بتاخد 6 لتر وبتمنع الصدا وبتخليك مش في حاجة لتنظيف الردياتير اصلا لو واظبت عليها.
-المروحة سرعة او سرعتين لازم تكون شغالها في معادها وصوتها وهواها يكون جامد دليل علي فاعليتها بلا ونه او زنة .
ب- فحص الوش
وده هيبان لو في خلط الزيت والمياه علي غطاء الزيت وبيدي نقط مياه في الاول وبعد كده لون طحيني والعربية تسخن وتولع مع الجري عشان المياه تهرب جوا المتور وفبضيع كفاءة الزيت والعربية تهبط وممكن القربة تنفس عشان جزء من الضغط بيخش القربا
ملحوظة عند تغيير الجوان متخليش صبي الميكانيكي يقرط عشان لازم يقرط بذارع بطول معين لاتلافي قطع الجوان او تغيير سماكته من الضغط المفرط.
ج-التكييف
1- لازم يشتغل مع السرعة العاليا ويكون فبريكا او الي ركبه فنان .
2-يجب تنظيف السربنتينة بالمياة والهواء عشان متحجزش الهوا عن الردياتير .
- ظبط الكهرباء
- ظبط التاكيهات

بعض التأكد وتصحيص الاجزاء العاطبة اكيد الوضع لازم يتحسن لو متحسنش يبقي لازم تعمل كده
1- شراء ترموستات فيات 128 اطالي بي 16 جنية سرعة واحدة 86-82 ووصلها بالسرعة العالية.
2-شراء ردياتير صيني شبه الاصلي الامونيوم بي 150 جنية.
3 - شراء مراوحة 6 ريشة الاصلية او شبه الاصلية نفس المقاس يعني عشان تركب مكنها .
4- شراء مروحة رفيعة خاصة للسربنتينةوتعمل مع التكييف فقط عشان متحملش علي المتور علي الفاضي .
5- شيل ترموسات الكوع.
6- متقصش اي اسلاك يعني خد من الفيش الاصلية كباري عشان تحافظ علي فبريكة العربية او لو حبيت ترجعها لي اصلها ودي حاجة مهمة جدا عشان لقد الله لو طلع كهربائي حمار تعرف ترجعها لي أصلها ومتبقاش موت وخراب ديار
والله والله والله ما هتسخن ان شاء الله
مع تغيير لهذا الوضع وتجربة في عربيتي الي كانت مبتسخنش اصلا وعربية اخري كانت بتسخن
بدون تكييف
1- المروحة هتشتغل اقل من 80 معرفش ازاي.
2- هتفصل عند 75 تقريبا او اقل سنه .
3-هتشتغل لمدة لا تزيد عن بضع دقائق (المروحة اصلية 6 ريشة سرعة عالية).
4-اقصي درجة توصلها العربية هي 80 في عز الزحمة او علي سرعة 110 كانت التجربة.
بالتكييف
1-الوضع لا يختلف كثيرا انما لاتزيد عن 80 - 85في اضيق الظروف.
نرجع للأسئلة الي في الاول
1-العربية بتسخن مع الجري
(مشكلة في جوان الوش او الوش نفسه - الطلمبة لاتعمل بكفائة )
2-العربية بتسخن في الزحمة
(غالبا مشكلة سد في الردياتير - الترموستات بتعلق - ترموستات الكوع بدأت تبوظ)
3- اوقات تسخن اوقا ت متسخنش
(مشكلة تخريف في الترموستات - او الكهربا مش مزبوطة)
4-تسخن علي طول
(كل الي فات - ضعف في المروحة- واخده هوا- ظبط تاكيهات)

ممتاز ياعم زيكو

وأحب أكد على شوية ثوابت دايما الصنايعية بيقولوا عكسها بس بالتجربه والبحث طلع كلامهم فى البطاطس

1- الرادياتير الألومينيوم الأصلى أو الصينى أحسن من الرادياتير النحاس كتير.
2- وجود ترموستات الكوع أحسن كتير من شيله. (على أن لا يكون بايز أو مكسور).
3- الحرارة المثلى للفيليشيا من 87 - 90 وجعل الحرارة فى حدود ال 70 (بتبكير عمل المروحة مع شيل ترموستات الكوع) بيقلل من أداء السيارة ويزيد من إستهلاك البنزين خصوصا فى الشتاء.
4- 80 -90 % التكييف اللى مش أصلى حايسخن العربية آن عاجلا أم آجلا حسب كفائة دورة التبريد وحرارة الجو المحيط : وحتى التكييف الأصلى مع أقل أقل مشكله فى دورة التبريد بينكشف خصوصا فى الجو الحار.


ودى شوية صور للتوضيح ولجعل الموضوع متكامل

صورة لدورة تبريد الفيليشيا



صورة لكوعة الفيليشيا 95 و 96




صورة لكوعة الفيليشيا من أول ال97











وربنا يوفق الجميع