يا جماعة انا بفكر ابيع الميجان و اجيب ميني كوبر مستعملة 2005 ولا حاجة كدة محدش عندة اي فكرة عن قطع غيارها انا قلبت الدنيا و موصلتش لحاجة في الاخر انتو اية رايكوا انا الميني دية عجباني اوي بس خايف منها
عرض للطباعة
يا جماعة انا بفكر ابيع الميجان و اجيب ميني كوبر مستعملة 2005 ولا حاجة كدة محدش عندة اي فكرة عن قطع غيارها انا قلبت الدنيا و موصلتش لحاجة في الاخر انتو اية رايكوا انا الميني دية عجباني اوي بس خايف منها
قطع غيار الميني كوبر نار
غطا العربيه لوحده من التوكيل 3500 جنيه (وده حته غطا لا راح ولا جه)
ودي بقى مش هتلاقي ليها قطع غيار في التوفيقيه وشارع دمشق والجو ده
يعني من الاخر الميني كوبر عاوزه واحد مش فارقه معاه الفلوس
لو النقطه دي مش فارقه معاك يبقى توكل على الله بس متجيبش أقل من ميني كوبر اس عشان تحس انك بجد راكب ميني غير كده يبقى بلاش
وعلى العموم شوف برضوا راي الناس ايه ممكن يفيدوك أكتر
و الله انا بفكر في الاس اسعارهم حلوة بس محدش جايب سرتها في اي مكان بس انا نفسي اعرف اسعار الصيانات و الكلام ده
فيه واحد زميلي في الشغل كان قالي عن اصحابه بيقابلوا مشاكل كتير في الكوبر s .. سألتوا على العادية .. قالي لا اللي معاهم العادية مقابلوش اي مشاكل
بس متطرقتش معاه في تفاصيل المشاكل اللي واجهتهم في ال s
نقلتلك الموضوع قسم بي ام عشان يعرفو اكتر عنها
كانت مع واحد صاحبي ال S
قبل ما يشتري كان في التوكيل وكان عاملها Special Order فامية وعلم بريطانيا عال سقف وجنوط وباي زينون.
كان ناوي عال عادية وكان بيتكلم مع مدير التوكيل أيامها مش فاكر أسمه دلوقتي كان الكلام دا في 2007
قاله بالنص " الميني كوبر يا تركبها S يا متركبهاش "
وبصراحة الفرق كان واضح ويستاهل.. الميني العادية منظر وأي عربية تطلع منها,
أما ال S كانت بتفرك بينا من الثبات لحد 60 كيلو,
وما بين الغرز لما كنا ندوس كيك داون كانت بتاخد الغرزة وتطلع منها وهيا بتفرك في الأرض..
والعربية مكنش فيها أي مشاكل, وصيانتها في التوكيل كانت في رينج صيانة ال BMW 320 تقريباً
شكرا ا يا باشا لنقل الموضوع
شكرا يا باشا لافادة بس طيب رنج ال320 ده الي هو ايه بالظبط انا الي يهمني حتي لو غالية تبقي اعتمادية علشان انا بسافر كتير و بعيد عن التوكيل و هل ليها حجات في الحرفين و كدا و شكرا ليك مرة تانية
خلي بالك الشنطة صغيرة جدا 160 لتر بس والاعدة ورا انا جربت اعد ضيقة جدا في السفر هتبقي متعبة اوي للي قاعدين ورا انما هيا كثبات وهاندلنج ومتعة قيادة ممتازة
هقول لحضرتك حاجه العربيه مينى كوبر ماشاء الله عليها فى الجرى و الشكل والثبات مفيش كلام يقدر يوصفه قمه فى الثبات و كل حاجه وبالنسبه لقطع الغيار زى ما الاخ الفاضل قالك هتبقى فى حدود اسعار ال e90 و ممكن تبقى اقل شويه لان حضرتك بتتكلم على موديل 2005 و الاسعار هتكون فى المتوسط يعنى مثلا تيل الفرامل ممكن يعمله فى حدود 600 جنيه (ده افتراض والله اعلم) و قطع غيارها فى كل حته فى الحرفين عادى جدا ... اى تاجر bmw (موديلات بعد 2000) عنده قطع غيار مينى ولو حضرتك دخلت الحرفيين و كملت على طول هتلاقى قبل حاتم واحد متخصص مينى و لو خليت حاتم على يمينك و دخلت شمال فى اتجاه العالميه بتاع قطع غيار اليابانى هتلاقى واحد على اليمين كده عنده قطع استيراد مينى من كل حاجه و أعذرنى مش متذكر اسماء
وبالنسبه للاعتماديه ... هى العربيه ألمانى فمش هيقابلك اى مشاكل لو حافظت عليها و عملت صيانات فى مواعيدها و اهتميت بيها لكن حضرتك بتقول بتسافر كتير فدى مشكله فى اعاده البيع لان معظم الناس مش بيحبو يجيبوا مينى ماشيه كتير و بيهتموا أوى بالعداد عامل كام كيلو و ده نفس الكلام إلى انا هقولوا لحضرتك علشان تجيب واحده
وطبعا ابعد عن المينى كوبر و لازم تبقى Mini cooper S علشان تحس فعلا انك راكب مينى .... لان الفرق فى الاداء شاسع و رهيييب بين الاتنين و انا عن نفسى بعتبر المينى العاديه مجرد شكل و اسما ان العربيه مينى و تتجاب لبنات مثلا إلى كل هيهمهم الشكل و مش فارقه الاداء
يعنى حضرتك لو عايز تجيب واحده و مش عايز يحصل مشاكل فيها يبقى لازم تجيب حاجه نضيفه و هتتفضل تدور كتير مش مشكله بس تجيب حاجه كويسه و اهم حاجه الكشف ثم الكشف ثم الكشف فى التوكيل علشان يطلعلك تقرير كامل عن حالتها و أهم حاجه تتأكد انها مش نصين أو متهربه لان الفتره إلى فاتت المينى النصين زادت أوى لان تقطيعها و تلحيمها مفيش اسهل منه
فنهايه الكلام لو حضرتك مش هتفرق معاك حجم العربيه (لانها مش عائليه نهائى عن تجربه) و محتاج ثبات و عربيه محترمه فى كل حاجه يبقى أتوكل على الله