تغيير كرونه فتيس اتوماتيك نيسان صنى

**anasnora** · 19-06-2013 10:17 AM

فى حد يا جماعه مر بالقصه دى قبل كده او يعرف عنها حاجه .. الكرونه اللى داخل فيها الكوبلن الداخلى مبوشه فبتعمل رجه وهزه فالعربيه فى الجزء الامامى يمين ..برجاء الإفادة

**Lifz_Good** · 19-06-2013 02:55 PM

متابع الموضوع دا
بس عندنا مثلاً في تويوتا
مع الصيانات الكبيرة بيغيروا زيت الكرونة
فا أكيد لو عندك كدا هيقولولك لو فيها عيب لاحظوه

**Dr/ P.K.Sh** · 19-06-2013 10:35 PM

متابع

**Ramy Rateb** · 19-06-2013 11:40 PM

و حضرتك سألت فى التوكيل على القصة ديه و تكلفتها ؟ عربيتك حضرتك موديل كام ؟

**anasnora** · 20-06-2013 09:54 AM

حضرتك التوكيل مبيصلحش ..بيغير فتيس كامل ..العربيه نيسان صنى 2005

**khaledshaheen** · 20-06-2013 03:00 PM

أول مرة أسمع الموضوع ده ، لكن اللى أنا مريت بيه إن كاوتشة المساعد هى اللى عازية تتغير فبتعمل صوت فى المطبات

**Ramy Rateb** · 27-07-2013 05:24 PM

طمنا يا باشا .. لقيت حل للمشكلة ؟

**mony10** · 28-07-2013 11:30 AM

انا الفتيس عندي مانيوال بس كان حصل عندي مشكله فيها برده كانت بتعمل صوت عالي جدا والعربيه ماشيه بسبب اني ما غيرتش زيت الفتيس في ميعاده ودا سبب ان مجموعة رولمان البلي اتحرقت
حاولت اصلحه بس لقيت تكلفته عاليه وناس كتير نصحتني اني بعد ما اصلحه ويتكلف ممكن يبقى مش مظبوط واشتري واحد تاني برده
بالنسبه للأوتوماتيك مش عارف ينفع يتصلح ولا لأ
بس في جميع الاحوال الموضوع هيتكلف يبقى اشتري فتيس استعمال احسن خصوصا ان الاوتوماتيك متوفر جدا عن المانيوال وكان سعره في حدود 2000 جنيه يزيد شويه او يقل على حسب المحل والحاله طبعا اما المانيوال كان اغلى انا اشتريته ب 3100 جنيه

**WalidAdel** · 28-07-2013 02:50 PM

بص لو تعرف شارع احمد سعيد اللي في العباسيه ده ... في ناس هناك بتوع فتيس بيصلحوه تمام
و عندهم امانه لو هايعرف يصلحه هايقولك هاصلحه و لو مش هايعرف هايقولك بردوا ... انا مجربهم
بص انت هاتبقي في عند كوبري اللي قبل الكاتدرائيه ده و تنزل من يمين الكوبري ... هتلاقي بنزينه و شارع احمد سعيد بقي ... هاتمشي يمين مع الشارع في اتجاه صلاح سالم ... هاتمشي شويه كده هتلاقي ورشه داخله لجوه شويه علي اليمين كده (انا روحتها بالوصف مره واحده و للاسف مش فاكر اسمها) بس لو حابب ممكن اديك نمرتي و ابقي معاك علي التليفون وانت رايح لحد ماتوصل ان شاء الله