الموضوع: هوندا سيفيك si 1992

المشاركة الأصلية كتبت بواسطة mohamedgoda265

اولا السلام عليكم و رحمة الله و بركاته

الحمد لله اشتريت هوندا سيفيك بعد رحلة بحث اكتر من اسبوعين بصراحة الواحد بيحب شكلها من زمان خاصة الجيل الخامس المهم انا كنت راكب صني 2010 سوبر صالون و عملت حادثة و الحمد لله تمام ما طولش عليكم ملاحظتي الاولية على العربية :
1. صوت الموتور عالي (سمعت ان ده عادي من المواتير الهوندا مش عارف صح و لاغلط)
2. التكيف ضعيف نسبيا
3. الفرامل مش بقوة النيسان
دي العيوب اللي لاحظتها
كنت عاوز اعرف ميكانيكي كويس بيشتغل في الهوندا و ياريت يكون قريب من مصر الجديدة او مدينة نصر و هل ينفع الواحد يكشف على العربية في التوكيل (هوندا الفطيم) و يصاين معاه
ايه افضل زيت يتحط للموتور بتعها ؟اللي كانت معاه بيقولي انه بيحط زيت شل 5000 و انه لسه عاملها سيرفيس كامل

معلش هتعبكوا معايا شوية بس انا حسيت بتعاون جميل في القسم هنا

ياباشا الف مبروك اولا : واليك اجابات الاسئلة بالترتيب

1- هو لو الماتور اللى عندك Si ال 2 كامة , دة هيبقى صوتة عالى شوية , بس اهم حاجة يكون مظبوط تاكيهات صح , هتلاقى الصوت هدى شوية وبقى انعم

2- التكييف ضعيف نسبيا : محتاج منك الاول شوية صيانات خفيفة ( تنظيف السربنتينة بماء ضغط ضعيف - التأكد من شحن الفريون على الضغط المناسب - طبعا نوعية الفريون بتفرق ) دية الحاجات الخفيفة اللى مش مكلفة
- ولو اتعملت الحاجات دية ولقيت تحسن بسيط , يبقى كدة معناة ان العربية دية لازم يتعملها تنظيف شامل ( غسيل الكويل - تنظيف ال dryer او تغيرة - تنظيف داخلى للسربنتينة - فريون يكون اوروبى ) وان شاء الله هتلاقى تلاجة معاك

3- الفرامل بتاعة العربية دية ممتازة جدااا , بس عموما لازم تعمل الاتى :

1- اخذ هواء فقط من الاربع مساتر فى حالة عدم وجود تسريب زيت باكم

2- الكشف على التيل الامامى والخلفى وتشوف نوعهم اية لان ممكن البائع يكون مركب سير صينى او تايوانى فطبعا اداءة ضعيف ( ويتم استبدالة بواحد يابانى محترم او الاصلى ) وهتلاقى فرامل ممتازة معاك ان شاء الله

3- ميكانيكى كويس فية كتير ( محمد على ودة شغال فى توكيل هوندا اصلا - عصام - جاسم ) دول افضل ثلاثة موجودين فى الحرفيين ممكن تجربهم الثلاثة وتختار اللى تستريح معاة

4- ممكن تكشف على العربية فى التوكيل وتعمل صياناتك بس طبعا هياخدوا مبلغ وقدرة

5- ممكن تحط شل 7000 اللى هو البلس , تمنة 215 جنية وبيتغير عند 7000 كيلو بس انت نزلة بدرى شوية حسب طبيعة سواقتك ودة نصف تخليقة ولازم تغير معاة الفلتر الاصلى وتمنة 50 جنية

واى سؤال ياباشا احنا موجودين ولو فية حاجة ضرورى رقمى موجود فى ال profile