الموضوع: بجد محتاجه رايكم

مربح نسبة الربح تعتمد على قيمة العقد بينك وبين الشركة وشروط العقد

يعني هل العقد شامل الصيانه ولا لا شامل السائق ولا لا وقيمة كام

اعتقد ان الشركات اللى بتأجر السيارات بعقود سنويه
لهم شروط ومن اهمها وسع العربيه وعلشان كده لها موديلات معينه بتختارها
وممكن تاخد السياره لوحدها او ممكن يكون صاحبها هوه السواق عليها
كمان فى العقد شروط الصيانه على مين وهكذا.....
الخلاصه ان الشركات مش هبله هيه بتاخد خير العربيه
اول سنتين تلاته وبعدين تاخد واحده جديده

أنا كنت فكرت أعمل الموضوع ده قبل كده ودوست فيه جامد .. وكنت شارط إن أنا اللي أسوق عربيتي ( إسبرانزا 516 موديل 2012 ) وبالفعل إشتغلت بيها مع شركة مقاولات لمدة 4 شهور ب 2500 جنيه والبنزين عليهم والصيانه عليا .. ومن خلال التجربه أقولك بلاش أحسن للأسبابا التاليه :
1 ) العربيه بتستهلك جامد ( مش أقل من 120 كيلو يوميا )
2 ) المبلغ مش مجازي بعد ماتخصمي منه 860 قسط + 300 ع الأقل مصاريف صيانه يبقى الصافي 1340 جنيه ف الشهر يعني ف السنه 16080 جنيه .. نخصم منهم كمان 3000 تأمين وتراخيص يبقى الصافي ف السنه 13080 جنيه ... ولو جيتي تبيعي العربيه بعد سنه وهيا ماشاء الله ماشيه حوالي 40000 كيلو تخسر أكتر من ال 13080 دول .. يبقى مافيهاش أي مكسب ليكي غير سداد القسط وبس .
3) العربيه لأني أنا اللي كنت سايقها كنت بحافظ عليها لو غيري ركبها عمره ماهيصونها زيي .. وسيبك من كلام الإعلانات أنك هتستلمي العربيه بعد مدة العقد زي ما سلمتيها وأي حاجه هما مسؤولين عنها والكلام بتاع جر الرجل ده لأن بتوع الإعلانات بتاعت الوسيط دول كلهم نصابين وهمهم الشهر العموله اللي بياخده منك .
4) كمان لو هتأجريها لشركه عن طريق مكتب لازم تعرفي أنه هياخد شهر عموله وممكن يكون هو اللي بيقبض من الشركه ويبقضك كمان .
5) ظروف البلد زفت .. والموضوع مايطمنش إنك تسيبي العربيه لحد .. وكمان التأمين مش بيصرفلك المبلغ غير لو إنتي اللي سايقه العربيه وقت الحادثه وإلا مالكيش ولامليم .. والشركه يوم ما العربيه تتخبط لاقدر الله هترميها لك وتقولك منك للتأمين وخلصنا .
الموضوع بتاع عربيه أأجرها ده ينفع فك زنقه لفتره معينه كام شهر كده لغاية لما أضبط مشروع أو شغل أو سفر لكن يبقى مشروع على طول ... لا أنصحك إطلاقا الموضوع مخاطرته كبيره فعلا .