ماربيلا من القري الهاديه جدا وتقسيمها حلو قوى فهى من اول البحر عباره عن شاليهات لحد اخر صف قبل البوابه عباره عن شقق والقريه متقسمه ل5 شوارع رئيسيه بالطول وشارع واحد بالعرض بيربط بينهم بالنسبه لطول القريه بصراحه مقيستوش بالظبط بس ممكن تقول حوالى نص كيلو طول و حوالى 750 متر عرض القريه هاديه جدا جدا فيها عدد 2 حمام سباحه على الشاطئ ولسان داخل البحر لهواه الصيد وحاجز امواج " ودول مش موجودين فى اغلب القرى اللى دخلتها" وفيها مول تجاى بقعدات جواه وفى محلات " 3 سوبر ماركت وبتاع مشويات و2 بتوع بيتزا و صيدليه وحلوانى و4 محلات فاست فود و3 كافتريات داخل المول ومكان لايجار العجل ومكتبه للجرايد والكتب " وفيها سينما صيفى خارج المول وفى كيدز ايريا فيها ملاهى للاطفال كهربائيه وعاديه وفيها ملعبين كوره داخل القريه ومسجد .
القريه فيها اماكن للباركينج جنب كل مجموعه شاليهات ودى حاجه ممتازه لانك مش بتدور على ركنه لان عدد الباركينج اريا على عدد الشاليهات انا شايفهم كتير جدا فدى تعتبر ميزه مهمه وافضل حاجه برضه فى الشاليهات ان مساحاتها حلوه جدا حتى الغرفتين وصاله مساحتهم كبيره جدا وديزاين القريه من جوه عباره عن مجموعات كل مجموعه نصف دايره وقدامها حديقه واسعه متقسمه بشكل مميز وموحد وفيها جوه الحدائق مكان للمشى والعجل فممكن الاولاد يلعبوا قدام الشاليه فى مكان مفتوح وبرضه عينك تبقى عليهم والقريه واخده ميل ناحيه البحر علشان معظم الشاليهات تشوف البحر .
بصراحه اسعار التمليك هناك عاليه جدا علشان القريه تعتبر صغيره لان المساحه اغلبها حدائق ولكن سبحان الله الشركه عند الحاجه كانوا واخدين الشاليهات بتاعتهم فى التمانينات ب 34 الف جنيه بالقسط دلوقتى مسمعينهم فوق 850 الف انما بصراحه كاسعار الشقق والشاليهات المختلفه مش عارف وصلت كام دلوقتى .
الايجارات هناك حسب اخر مره سالت فيها كانت ناحيه البوابه بحوالى 400 جنيه انما حاليا مش عارف والله .
وعلى فكره دلوقتى فى مشروع ماربيلا جاردنز تبع نفس الشركه اللى بانياها بس جنوب الطريق وجوه الصحراء شويه بس منظمه برضه وبيكون ليك الحق تدخل القريه على البحر واسعارهم متوسطه وتصميم القريه دى حسب اللى بيقولوه حتبقى حلوه برضه .
اظن دى كل المعلومات اللى اعرفها عن القريه ولو افتكرت حاجه تانيه حقولك.