الموضوع: أشتري شاليه في الساحل الشمالي ولا المعمورة ... محتاج مشورتكم

المشاركة الأصلية كتبت بواسطة shnory

لو ناوي تأجره وتكسب من وراه يبقي في المعموره
لو عاوزه لروقان البال يبقي في الساحل

مفيش أحسن من راحة البال ياحج شنوري .

المشاركة الأصلية كتبت بواسطة masterzmind

بص يا باشا فى شاليهات فى القرى الاتية 1- اميجو 2- تيوليب كل دول على الطريق العين السخنة بعيد عن طريق الزعفران تمام خوش على موقع http://dubizzle.com واكتب شاليهات بالعين السخنة بس انا اضمن القرى اللى انا كتبها دى من امن وصيانة وصيف شتاء الامن متواجد قرية اميجو تتراوح بين 300 ال 450 من شقق اما تيوليب تترواح من 400 الى 650 شاليهات وانت وشطرتك فى البيع عموما الى معاة قرش الان هو الصياد البلد فى حالة ركود وناس كتير بتبيع بخصارة عشان مفيش حركة بيع لو البلد استقرت اضرب الاسعار فى 2

أشكرك لأهتمامك وأنا كنت عاوز حاجة قريبة لأن أنا من أسكندرية ... وعموماً مراقيا حلوة وكل حاجة عيبها الوحيد أنها بتبقى شبه مهجورة في الشتاء ولكن خدماتها معقولة وفيها أمن كويس .

المشاركة الأصلية كتبت بواسطة eslamrace

انا واخد فى قريه عايده فى الساحل القريه بتطور وممكن بنص المبلغ اللى معاك تاخد شاليه هناك متشطب هاى لوكس بس القريه فيها مشكله ان المبانى عباره عن كمبوندات كل كمبوند له شكل خاص بيه بس غير كده بصراحه كل سنه الاداره بتعمل خدمات جديده " حمامات سباحه ، بحيره صناعيه ، سفلته ورصف وهكذا " بس برضه للعلم ان الفندق جوه القريه اداره مستقله .
وعندك قري مرسيليا 1 ، 2، لاند قرى محترمه جدا جدا وكل قريه فيها مول وسينيمات واماكن ماركت" هايبر " وممكن بالمبلغ اللى معاك تاخد حاجه كويسه ولو فى جزء زياده بيقسطوا بدون فوايد والقرى بتاعتهم نظيفه جدا والديزاين واحد وعندهم حاجات استلام فورى
اللى مش حتلاقيه كويس الكمبوندات اللى جمب سيدى كرير القوات المسلحه بتكون عباره عن عماير بدون اى خدمات ولا امن ولا صيانه
وفى قرى سيدى عبد الرحمن " مراسي ، امواج" قري ممتازه بس المشكله انها بعد الكيلو 120 على حد علمى فانا اعتبرتها بعيده جدا ولكن اللى اعرفه ان عروضهم حلوه وتقسيم القرى ممتاز بس كاسعار مسألتش علشان بعد المسافه وسمعت ان البحر هناك غطس والله اعلم صدق المعلومه
قريه ماربيلا لو تقدر تزود المبلغ اللى معاك وتاخد شاليه هناك تبقى بجد خير انتقاء القريه هناك خدماتها ممتازه ومن القرى القليله اللى فيها حاجز امواج وتقسيم القريه والمساحات الخضراء تريح الاعصاب بصراحه بس فى بعض اصدقائي لما كنا هناك اشتكوا انها صغيره مش واسعه بس انا محستش بده خالص .

وعلى العموم الساحل كبير ولو دورت هتلاقى اللى تحتاجه وعلى زوقك وقد فلوسك واحتياجاتك وعلى فكره كاستثمار حلو جدا فى اوقات فى الصيف الناس مبتلقيش اوضه فى الساحل فاضيه ولو بسعر خيالى .
ربنا يوفقك فى الاختيار وتحت امرك فى اى استفسار .

طيب ماتكلمنا شوية عن عايدة بما أنك واخد فيها أيه نظام الفلل هناك وهل ليها مستقبل ولا لأ ولو في موقع ليها على الفيس ولا على النت يبقى كويس مستويات الخدمات والأمن هناك مستويات الملاك أيه يعني هاي ليفيل - ميد ليفيل ... في ماركت كبير هناك ولا مفيش جاهزة ولا لسة مخلصتش ولو لسة قدامها أيه ... معلش أسئلة كتيرة بس الواحد يتأكد من أخلاق عايدة قبل مايناسبها .

المشاركة الأصلية كتبت بواسطة eslamrace

لا طبعا من حقك قبل متختار تعرف هتناسب مين ههههههههههههه
هى القريه من اقدم قرى الساحل يمكن من السبعينات على ما اعتقد وهى اصلا عباره عن ارض مساحتها حوالى كيلو طول و600 متر شاطئ ملك جمعيه اسمها مصر الجديده وعلشان كده هى اسمها الورقى " مصر الجديده " ولكن علشان جواها فندق عايده من اشهر واقدم الفنادق فى الساحل فاصبح اسمها المتداول "عايده " الفندق زى مقولتلك اداره منفصله عن اداره القريه والفندق 4 نجوم ومستواه عالى جدا من جوه كخدمه واستايل واتعمل فيه برنامج "مكانش يومك " رمضان قبل اللى فات .

القريه متقسمه قطع اراضى ومملوكه لناس من الجمعيه الجزء اللى من اول الفندق لحد الشاطئ فلل دور واحد وروف فقط ودول الملاك القدام قوى واغلبهم هاى ليفيل من بعد الفندق ولحد اخر صف فى القريه شاليهات بتتدرج دورين وتلات ادوار حد اقصى واخر صف شقق اربع ادوار وكل اللى بيبنى لازم يلتزم بالارتفاعات المحدده ونسبه البناء والحدائق اظن 60% من مساحه القطعه بناء والباقى اما حدائق او حمام سباحه خاص طبعا هى من 5 سنين بالظبط كان البناء واصل لحد بعد الفندق بصف واحد انما بدأت الشغل فيها واتطورت جدا فى السنوات الاخيره فاتعمل حمام سباحه للكبار واخر للاطفال وبحيره صناعيه وشماسي على البحر وحمام السباحه وتم تجديد اعمده النور فى المدخل واعاده رصفه وزياده تشجير الطرق الرئيسيه و مكان للعب الاطفال و كافيتريا على الشاطئ وكافتريا على حمام السباحه
الخدمات جوه القريه فيها 2 سوبر ماركت موفرين كل حاجه ومحل لبيع الاسماك ومسجد و سمعت والله اعلم ان فى كنيسه او مكان تابع للكنيسه جوه القريه

طبعا فى السنوات الاخيره اتبنى كمبوندات كتيره جدا اللى بحديقه خاصه واللى بحمام سباحه خاص واللى بحديقه مشتركه و اللى بيملك الروف مع الدور الاخير بسلم داخلى و اختيارات كتير .

الاسعار فى القريه متفاوته بطريقه رهيبه ففى الفلل بالملايين والشاليهات من 200 الف جنيه الى 750 الف جنيه والشقق بصراحه مسألتش عنها
الايجارات هناك من200 الى 750 جنيه انتقالا من الشاليهات للفلل
العيوب ان القريه فيها اجزاء مش متسفلته " ولكن كل سنه بيتك دكها " ودى اداره القريه قالت انها مش حتسفلت الا لما يخلص البناء فى اغلب القريه ، المشكله التانيه ان فى الشتاء بيكون فى اعمال بناء وتطوير القريه فبتكون الى حد ما مزعجه ولكن بيتمنع العمال من الدخول من 20/6 الى بدايه شهر 11 وفى الاعياد والمناسبات " عيد الاضحى ، شم النسيم وهكذا " السوبر ماركت بيفضل شغال فى الشتاء لخدمه الناس ، وموضوع ان الاشكال مش شبه بعض برضه بيدايق بعض الناس.
بالنسبه للمستقبل انا شايفها استسمار كويس جدا خصوصا لو القريه مشت بالمعدل اللى بتمشي بيه فى اخر سنتين تلاته فقدامها حوالى من 3-4 سنين بالكتير وحتكون اتقفلت واتغيرت ملامحها بشكل كبير خصوصا ان ادارتها حاليا بصراحه شغاله جامد جدا ولكن العيوب اللى قولتها بتخللى كتير من الناس تقلق منها دلوقتى .
المخطط حسب علمى للقريه انه حيتعمل مول تجارى كبير جوه القريه واتحدد بالفعل مكانه بس لسه مشتغلش وحيتعمل حمام سباحه على الشاطئ وحتتسفلت وتترصف بالكامل وحيتعمل سينما واول مروحت القريه حد قاللى المفروض المسجد حيتجدد ويتعمل مسجد تانى وسط القريه والمفروض ان كان فى اجتماع لاتحاد الملاك من فتره قريبه بس انا محضرتش فمش عارف اتفقوا على ايه تانى بس ان شاء الله اعرف اليومين الجايين.
بصراحه اظن دى كل المعلومات اللى اعرفها حسب معلوماتى ولو افتكرت حاجه تانى حقولك عليها .
بس لانى من عشاق ماربيلا بعيدا عن كل القرى اللى قعدت فيها فمش عايزك تقارن دى بدى خالص لان ماربيلا فيها كلام تانى خالص.
وتحت امرك فى اى استفسار.

10 على 10 الصراحة تسلم أيدك واضح أنك متابع جامد التطورات في عايدة وبصراحة كفيت ووفيت .

@Eslamrace

الف شكر على التوضيح و المعلومات

لو مفيهاش تعب بدل انت بتحب ماربيلا اوى كده ممكن توفينا بمعلومات برضه ... تفصيليه ان امكن

الف شكر