ارجوكم اللي يعرف يساعدني ، انا فعلا زهقت من العربية

**mahmou3d** · 21-06-2013 05:17 AM

السلام عليكم و رحمة الله
اخواني الاعزاء
انا عندي سيارة فيات اونو 1400cc موديل 94
هي هاف انجكشن single point injection و كان عندي فيها مشكلة كبيرة عرضتها في الموضوع ده من فترة
( http://www.nilemotors.net/Nile/330136-uno-1400-cc.html )
الحمد لله على كل حال ، انا عملت نص عمرة للماتور و محصلش فرق (يعني فضلت المشكلة هي هي ) و بعدها بعشر ايام ، قدرا ، ان و انا على الطريق سير الكاتينة انقطع و كان المكانيكي هو اللي جايبو ، فروحت اتخانقت مع المكانيكي و غيرنا صبابين و سير كاتينة ، و الراجل عصر دماغو عشان يحاول يحل مشكلة الانجكشن و فعلا نجح انو يحلها
و ده كان عن طريق انو اخد توصيلة ارضي من single point injector و العربية بئت تمام التمام
لمدة مثلا شهرين او تلاته
الفكرة ان العربية رجعت تعمل حاجة تانية ، و انا ماشي العربية تتخنق تماما ، و كأن مافيهاش نقطة بنزين ( و انا مفوّلها ) و مجرد ما اشيل رجلي من على دواسة البنزين و احطها تاني ، العربية ( تهب ) و ترجع تتخنق تاني و هكذا ، فطبعا ببئى عمال انط بالعربية
لما روحت للمكانيكي اسألو ، بيئولي دي يا اما طرمبة البنزين يا اما الموبينا الالكتروني
طبعا انا مش عاجبني فكرة يااما و يا اما ، لانو عاوز يغيرهم الاتنين ، كمان انا حاسس انها مشكلة في الكهربا ، ارضي مهرب برضو ولا حاجة
انا بطلب منكم طلب ، رجااااااااااااااااااااء
لو حد يعرف ميكانيكي فيات ، فيااااااات شاطر ، رجاء يدلني عليه
لاني اقسم بالله زهقت من العربية دي و قرفت منها
انا موجود في الجيزة و المهندسين يوميا
رجاءا يا شباب ساعدوني ، و شكرا جدا مقدما
آسف على الاطالة

**aldesha989** · 21-06-2013 07:07 AM

بص يا باشا اول حاجه طرمبه البنزين كهرباء صح ؟

افتح الكونتاك وشيل خرطوم البنزين من الرشاش اللى بعد الطرمبه ويكون معاك واحد صحبك علشان يفتح ويقفل الكونتاك وبعدين هتكون محضر ازازه فاضيه وتحط فيها الخرطوم وتفتح كونتاك وشوف البنزين نازل منها خط مستقيم غير متقطع ولا لا دى حاجه من الحاجات اللى هتبين ليك ان الطرمبه سليمه ولا لا ده لو الطرمبه فى حوض العربيه انما لو الطرمبه تحت الكنبه دى بقى هتابع معاك الاعضاء هتقولك ايه وبرضه هيكون فى اختبار للموبينه بس غالبآ الموبينه لو مش مظبوطه هتقطع خالص وهتغلبك فى الدواره وممكن ما تخليش العربيه تدور نهائى لكن ما تخنقش العربيه كده

لان كان عندى نفس الموضوع بس انا كربراتير وكنت شاكك فى طرمبه البنزين والموبينه والاسبراتير واسلاك البوجيهات

لكن طلع من الكربراتير فى الاخر وغسلته مرتين وغيرت بيكات وكل حاجه اتظبطت

فا ممكن يكون كمان الرشاش عندك فيه مشكلة ومش بيرمى بنزين كويس

متابع معاك ان شاء الله

**mahmou3d** · 21-06-2013 02:40 PM

الف شكر يا ( aldesha989 ) باشا ،
الحقيقة انا عندي الطرمية تحت الكنبة ، المفروض اعمل ايه ؟؟
كمان بخصوص ان لو الموبينا لو فيها حاجة العربية ماتدورش خالص ، هي اوقات فعلا مش بتدور خالص ، بفتح الكبوت و اقعد اشيل الفيش بتاعت الانجكشن و اركبها تاني و فيش الاسبراتير و اركبها تاني و فيشة الموبينة و اركبها تاني و عادة العربية بتدور بعدها ، عشان كده انا شاكك اكتر انها كهربا
اتمنى حد يعرف يدلني على المشكلة او على ميكانيكي فيات شاطر او مركز صيانة

**graffittiii** · 21-06-2013 05:56 PM

طيب أنت متأكد أن البنزين تمام ؟

المشاركة الأصلية كتبت بواسطة aldesha989

بص يا باشا اول حاجه طرمبه البنزين كهرباء صح ؟

افتح الكونتاك وشيل خرطوم البنزين من الرشاش اللى بعد الطرمبه ويكون معاك واحد صحبك علشان يفتح ويقفل الكونتاك وبعدين هتكون محضر ازازه فاضيه وتحط فيها الخرطوم وتفتح كونتاك وشوف البنزين نازل منها خط مستقيم غير متقطع ولا لا دى حاجه من الحاجات اللى هتبين ليك ان الطرمبه سليمه ولا لا ده لو الطرمبه فى حوض العربيه انما لو الطرمبه تحت الكنبه دى بقى هتابع معاك الاعضاء هتقولك ايه

_نفس الكلام في الطرمبة اللي تحت الكنكة عادي

...
ماهو في الاخر لازم في خرطوم موصل للبوابة أيا كان مكان الطرمبة ..
هو هيفك الخرطوم اللي داخل علي البوابة ويفتح كونتاكت بردو ونفس الكلام .
أنا عندي الطرمبة تحت الكنكة وكان الميكانيكي بيعمل نفس الحجات دي .

هو مش عارف ليه ديما أنا بميل لإن المشكلة بتبقي في الرشاش معلق مثلا أو مابيضخش كمية بنزين كافية أو فك البوابة وتنضيفها بس أنا قولتلك الحل ده في الموضوع القديم ومجابش نتتيجة .
أنا كان عندي أعراض التنتيش دي زمان والميكانيكي قعد يهبل في البوابة والرشاش شوية وظبطت معاه بعد ماكان بيقول الرشاش بايظ
بالمناسبة الرشاش بردو له أختبار كده بيفكه يطلعو بره ويوصله ( تقريبا عن طريق سلكين أو مش فاكر وصله إزاي بالضبط ) بالبطارية ويشوف السن بيتحرك ولا لأ

بص الأعطال دي منتشرة في الأونو جدا أي ميكانيكي فيات هيظبطك إن شاء الله تابع مع الأعضاء يدلوك علي حد كويس .

وإن شاء الله يكون الموضوع بسيط .

**3mr Farrag** · 21-06-2013 06:22 PM

بص علي فلتر البنزين
لو متوسخ و قديم ممكن يخلي العربيه تبطل كل ما تشيل رجلك من علي البنزين
و موضوع الطرمبه مش لازم تكون بايظه
ممكن يكون الفلتر بتاعها و ده فلتر صغير بيبقي متركب فيها
يكون متوسخ و محتاج تنضيف
حصل معايا نفس الموقفين دول و ده الحل اللي كان معايا

**mahmou3d** · 21-06-2013 11:37 PM

السلام عليكم
اولا احب اشكر graffittiii و 3mr Farrag و aldesha989
عاوز اقوللك يا جرافيتي اني من طنطا اساسا برضو و بروح طنطا تقريبا مرة كل اسبوعين و يا عمرو انا برضو عند حمايا كل يوم في الجيزة ، فئشطة انا حاسس اني تحت التغطية دائما :) انما يا aldesha989 انا مش بصيف في اسكندرية بس بروحها اوقات في الشتا ، لانها ساحرة في الشتا بصراحة
المهم ، انا غيرت طلمبة البنزين ، غيرهالي بواحدة تانية بوش ، هي مش نفس الطول ، بس الميكانيكي ئالي انها ماتفرقش
و طلعت جربت العربية و العربية مش بتقطع ، بس انا مش يقتنع اوي بالتجربة السريعة دي ، لسه هيبان اذا كان المشكلة اتحلت ولا لا بالمشي ، خصوصا اني بسافر بالعربية كتير فكل حاجة بتبان على الطريق
و على فكرة يا عمرو و هو بيغير الطلمبة ، فعلا اجدت بالي ان ليها فلتر و كان باين فعلا انو مش نضيف اوي ، بس طبعا ماكنتش شوفت ردك ، فمسئلتوش انو ينضف الفلتر بتاعها الاول
عموما هي الطلمبة كانت عندو فعلا و اشتريتها منو بـ 250 جنية (جديدة) ، و اخد 50 جنيه مصنعية تركيب الطلمبة و كمان سحلتو معايا في تغيير لمبتين في الفانوس الخلفي
ربنا يستر و العربية تظبط شوية
و انا هوافيكم باخر الاخبار اول باول

**3mr Farrag** · 22-06-2013 01:30 AM

مش برضوا الطرمبه القديمه عندك؟؟
نضف الفلتر كويس بتاعها و ركبها
وان شاء الله هتمشي كويس
واديلوا اللي انت اخدتها و اديلوا علي دماغوا لو قالك انت شغلتها
هما بس الصنايعيه بيحبوا يعملوا شغل و بيستهبلوا او بيبقوا بهايم مش فاهمه حاجه

**mahmou3d** · 22-06-2013 05:30 PM

اليكم الجديد ،
انا روحت بيها الشغل انهاردة ، الطريق بياخد حوالي ساعة او ساعة و ربع عشان الزحمة ، حوالي 35 كيلو
المهم العربية كانت تماااااام جدا اول نص ساعة او ساعة الا ربع
و بعد كده رجعت تقطع تاني :(
الفكرة انها قبل لما اغير الطلمبة ، برضو كانت بتقطع بعد شوية من المشي