السلام عليكم
ياريت تقبلونى صديق معاكو فى قسم السكودا
انا جبت فليشيا 95 من اسبوعين
وعندى بعض المشاكل
اولا العدادات اللى بتحسب عدد الكيلوات اللى بتمشيها العربيه مش شغاله وطبعا ديه حاجه مهمة عشان غيار الزيت بالاضافه ان مؤشر البنزين مش مظبوط فى قرايته بيطلع وبينزل بمزاجه وملوش علاقه بكمية البنزين فى العربيه
ثانيا العربيه بتسخن كل مالسرعه تزيد بيكون المؤشر فى النص بين ال90 وال 110 بس عمرها مازادت عن كده ومبتوصلش لل110 واما اكون ماشى ببطئ فى الزحمه بينزل تحت ال 90 وبحس ان المروحه مش بتبطل خالص طول مانا ماشى وبعد اما اقف بتفضل شغاله حوالى 5 دقايق وبعد كده تفصل
ثالثا العربيه بتنقص زيت كل حوالى 1000 كيلو بتنقص نص كيلو مع العلم ان فيه ترشيحات زيت بسيطه بشوفها
رابعا السحب مش عاجبنى يعنى بتاخد وقت على ماتوصل ال 100 و 120 واللى ورايا بيبقى مستعجلنى
خامسا العربيه مش بتدور غير لما اديها سنه بنزين كل مره سواء صبح او وسط اليوم وصوت المارش مش عاجبنى
سادسا وانا بعمل ترصيص للعجل الراجل هز فى العحل وهيا مرفوعه وقالى البطاحات بايظه ولازم تغيرها عشان خطر رحت لبتاع العفشه قالى متغيرهاش ديه الاصليه ومفيش بطاحات كويسه فى السوق
سابعا الفتيس بمزاجه ساعات يبقى كويس وساعات يعلق وخصوصا فى الغيار الخامس
ثامنا مجموعه الزراير اللى جمب بعضها اللى فيها زرار الانتظار مش شغاله ومش بتدخل ولا بتخرج مش عارف بقى عايزة تنضيف ولا ايه
تاسعا كل اما ادوس فرامل اول ما اشيل رجلى من عالدواسه اسمع صوت ونه معدنيه
عاشرا الكوالين بتاعه العربيه خربانه والباب بيفتح بالمفتاح لكن مبيقفلش بالمفتاح لازم اقفل المسوجر من الباب الخلفى وبعد كده اقفل الباب الخلفى ياترى الكوالين ديه بتتصلح ولا بتتغير وبتجاب منين
العربيه فيها تكييف بس مش شغال مش عارف بقى اروح اصلحه ولا هيزود معايا مشكله السخونه

اسف عالاطاله علما انا مغير سير الدينامو وفلترين البنزين والبطاريه والبوجيهات والاسكاترا ولحمت الردياتير وبحطلها بنزين 80 وزيت موبيل 1 ال 3000 ومركب عليتين لادا عشان كنت حاسس ان العربيه واطيه من ورا

وشكرا على صبركم معايا