حل مشكلة عوامة البنزين (ابيزا 98)
أعضاء قسم السيات الكرام وكل أعضاء نايل موتورز اللى طرمبة بنزين عربيتهم تتشابه مع طرمبة بنزين عربيتى
مساء الخيرات
أنا كنت بشتكى من انى لما أفول التانك للأخر بلاقى المؤشر مش بيوصل للأخر لدرجة انى اول مرة حصل معايا الموضوع ده اتخانقت مع الراجل فى البنزينة عشان قولتله يفول وقاللى انه فول وافتكرته بيشتغلنى وفتحلى غطاء التنك ولقيت البنزين واصل لحد أول الزور
وبما انى مخاصم الميكانيكية, فقررت انى اعمل الموضوع بنفسى وساعدنى فى طريقة الفك والتركيب موضوع SYD عن http://www.nilemotors.net/Nile/27739...post3874173610
بعد ما بتفك الطرمبة وتخرجها بره التانك هتشوف المنظر ده
http://nileup.com/up/uploads/nilemotors_13719388631.jpg
المشكلة كلها فى الجزء اللى داخل المربع فى الصورة
ده عبارة عن سوستة
اللى بيحصل ان التانك لما بيكون مش مليان للأخر بتكون الطرمبة زى ما انتم شايفينها فى الصورة مفرودة
ولما بتفول بتلاقيها بتنكمش فى بعضها وده لأن الطرمبة بتطفو على وش البنزين فبالتالى البنزين بيزوقها لفوق وطبعا مفيش مكان تطلع منه فبالتالى السوستة بتقفل وتنكمش فى بعضها
جرب تمسك الطرمبة بأيديك الأتنين من فوق ومن تحت وضمها بين ايديك هتعرف انا قصدى ايه
هتلاحظ ان الحركة مش سلسة وفيه شوية عصلجة وتزييق وده نتيجة ان البلاستيك بينشف وبيحك فى بعضه والاحتكاك ده بيسبب التزيق والتقل فى الحركة
وده بسبب اننا دايما بنفضل ماشيين والتنك فاضى والبنزين مش بيوصل للجزء ده وبالتالى البلاستيك بينشف
هتجيب wd40 وترش فى المٍجر (جمع مجرى) عشان تزيتها وتبقى سلسة فى الحركة
http://nileup.com/up/uploads/nilemotors_13719396841.jpg
وهنا كمان
http://nileup.com/up/uploads/nilemotors_13719396842.jpg
وبعدين هتلينها بأيدك قبل ماتحطها تانى فى التنك عن طريق انك تضم وتسيب عشان السوستة تتلين
http://nileup.com/up/uploads/nilemotors_13719396843.jpg
هتلاحظ ان الحركة بقت أسهل ومبقاش فيه صوت تزييق
هتركب الطرمبة فى التنك ونطلع نفول عشان نتأكد ان كله تمام
متنساش تظبط على الزومبة عشان العوامة ما تخلفش معاك فى القراية
http://nileup.com/up/uploads/nilemotors_13719396844.jpg
هتحسس بصوبعك فى المكان اللى شايفينه فى الصورة لحد ما تلاقى حتة بارزة ودى هتظبط عليها السهم اللى مرسوم على وش الطرمبة
قبل ما أروح أفول قولت بالمرة أغير فلتر البنزين
طبعا فلتر البنزين تحت العربية فوق الدنجل فى مكان صعب ولازم ترفع العربية وتنام تحتها عشان توصله (الألمان دول عليهم حاجات :N_no[1]: )
http://nileup.com/up/uploads/nilemotors_13719416101.jpg
هتفك الكلبسين من الجنب زى كلبسات خراطيم الطرمبة
نصائح مهمة جدا قبل الفك:
الأفضل انك تهوى المسمار اللى فى النص اللى ماسك الفلتر عشان تعرف تملك الخراطيم أفضل
اوعى تنام تحت الفلتر لأنك بمجرد ما هتفك الخراطيم هتلاقى البنزين هينزل عليك
وده المنظر بعد الفك
http://nileup.com/up/uploads/nilemotors_13719416102.jpg
وده شكل علبة الفلتر الجديد
http://nileup.com/up/uploads/nilemotors_13719409492.jpg
فلتر دايوو بـ 25 جنيه والدايو الأصلى بـ 40 جنيه :10D5C8w1107:
http://nileup.com/up/uploads/nilemotors_13719409493.jpg
نصائح مهمة أثناء التركيب:
خلى بالك من اتجاه تركيب الفلتر
فتحة دخول البنزين غير فتحة خروجه
والسهم اللى على الفلتر بيبين اتجاه سير البنزين
الخرطوم اللى من ناحية زور التانك هو الداخل
والخرطوم التانى هو الخارج
وخلى بالك لازم وانت بتركب الخراطيم لازم تضغط عليها جامد لغاية ما تسمع صوت تكة كلبس الخرطوم
الحمد لله تمت العملية بنجاح وطلعت على البنزينة فولت ودى صورة العداد بعد التفويل
http://nileup.com/up/uploads/nilemotors_13719420271.jpg
والى اللقاء فى جريمة أخرى :inlove: