حل مشكلة عوامة البنزين (ابيزا 98)

**Karim Ibiza** · 23-06-2013 02:06 AM

أعضاء قسم السيات الكرام وكل أعضاء نايل موتورز اللى طرمبة بنزين عربيتهم تتشابه مع طرمبة بنزين عربيتى

مساء الخيرات

أنا كنت بشتكى من انى لما أفول التانك للأخر بلاقى المؤشر مش بيوصل للأخر لدرجة انى اول مرة حصل معايا الموضوع ده اتخانقت مع الراجل فى البنزينة عشان قولتله يفول وقاللى انه فول وافتكرته بيشتغلنى وفتحلى غطاء التنك ولقيت البنزين واصل لحد أول الزور

وبما انى مخاصم الميكانيكية, فقررت انى اعمل الموضوع بنفسى وساعدنى فى طريقة الفك والتركيب موضوع SYD عن http://www.nilemotors.net/Nile/27739...post3874173610

بعد ما بتفك الطرمبة وتخرجها بره التانك هتشوف المنظر ده

المشكلة كلها فى الجزء اللى داخل المربع فى الصورة
ده عبارة عن سوستة
اللى بيحصل ان التانك لما بيكون مش مليان للأخر بتكون الطرمبة زى ما انتم شايفينها فى الصورة مفرودة
ولما بتفول بتلاقيها بتنكمش فى بعضها وده لأن الطرمبة بتطفو على وش البنزين فبالتالى البنزين بيزوقها لفوق وطبعا مفيش مكان تطلع منه فبالتالى السوستة بتقفل وتنكمش فى بعضها
جرب تمسك الطرمبة بأيديك الأتنين من فوق ومن تحت وضمها بين ايديك هتعرف انا قصدى ايه
هتلاحظ ان الحركة مش سلسة وفيه شوية عصلجة وتزييق وده نتيجة ان البلاستيك بينشف وبيحك فى بعضه والاحتكاك ده بيسبب التزيق والتقل فى الحركة
وده بسبب اننا دايما بنفضل ماشيين والتنك فاضى والبنزين مش بيوصل للجزء ده وبالتالى البلاستيك بينشف

هتجيب wd40 وترش فى المٍجر (جمع مجرى) عشان تزيتها وتبقى سلسة فى الحركة

وهنا كمان

وبعدين هتلينها بأيدك قبل ماتحطها تانى فى التنك عن طريق انك تضم وتسيب عشان السوستة تتلين

هتلاحظ ان الحركة بقت أسهل ومبقاش فيه صوت تزييق

هتركب الطرمبة فى التنك ونطلع نفول عشان نتأكد ان كله تمام
متنساش تظبط على الزومبة عشان العوامة ما تخلفش معاك فى القراية

هتحسس بصوبعك فى المكان اللى شايفينه فى الصورة لحد ما تلاقى حتة بارزة ودى هتظبط عليها السهم اللى مرسوم على وش الطرمبة

قبل ما أروح أفول قولت بالمرة أغير فلتر البنزين

طبعا فلتر البنزين تحت العربية فوق الدنجل فى مكان صعب ولازم ترفع العربية وتنام تحتها عشان توصله (الألمان دول عليهم حاجات )

هتفك الكلبسين من الجنب زى كلبسات خراطيم الطرمبة
نصائح مهمة جدا قبل الفك:
الأفضل انك تهوى المسمار اللى فى النص اللى ماسك الفلتر عشان تعرف تملك الخراطيم أفضل
اوعى تنام تحت الفلتر لأنك بمجرد ما هتفك الخراطيم هتلاقى البنزين هينزل عليك

وده المنظر بعد الفك

وده شكل علبة الفلتر الجديد

فلتر دايوو بـ 25 جنيه والدايو الأصلى بـ 40 جنيه

نصائح مهمة أثناء التركيب:
خلى بالك من اتجاه تركيب الفلتر
فتحة دخول البنزين غير فتحة خروجه
والسهم اللى على الفلتر بيبين اتجاه سير البنزين
الخرطوم اللى من ناحية زور التانك هو الداخل
والخرطوم التانى هو الخارج

وخلى بالك لازم وانت بتركب الخراطيم لازم تضغط عليها جامد لغاية ما تسمع صوت تكة كلبس الخرطوم

الحمد لله تمت العملية بنجاح وطلعت على البنزينة فولت ودى صورة العداد بعد التفويل

والى اللقاء فى جريمة أخرى

**Mstfun** · 23-06-2013 02:40 AM

ازااااي يا جدع..... فهمني دا احنا دافنينه سوا

**Karim Ibiza** · 23-06-2013 10:35 AM

المشاركة الأصلية كتبت بواسطة abb

بصراحه الله ينور عليك بس كان ليه سؤال صغير عندى نفس العوامه بس مشكلته بفول عادى والعداد بيطلع للاخر بس بيجى بعدها ممكن بيوم ينزل ربع الشرطه قبل الفول وممكن يرجع تانى لفوق وممكن لا فده ليه علاقه بلسوسته دى ولا ده موضوع تانى واسف للاطاله

وعليك ياباشا

من الواضح ان مشكلتك فى وضعية الطرمبة نفسها
الطرمبة ليها عدلة فى اتجاه معين عشان تديك القراية الصح
اظبط السهم على الزومبة

**Karim Ibiza** · 23-06-2013 10:36 AM

المشاركة الأصلية كتبت بواسطة Mstfun

ازااااي يا جدع..... فهمني دا احنا دافنينه سوا

هههههه
زاوية التصوير

**ehab_mansour** · 23-06-2013 11:25 AM

جامدة جدا يا كيمو !!!!!!!!! مش اي حد ياخد باله من النقطة دي ... و تخيل ان كلنا تقريبا بنوصل للشريحة و نظبطها و معرفش ايه و مفكرناش ابدا انها ممكن تكون من السوسته ... بس لي تعليق و هو ان كل التنظيف و التليين اللي انت حطيته هيروح و يدوب في البنزين و هترجع تنشف تاني .... مافيش حل مثلا نصنفر او نخف قليلا من الاجزاء اللي بتتحرك عليهم الطلمبة بالسوسته ؟؟؟

**mahmoud ghanem** · 23-06-2013 11:38 AM

الله ينور عليك يا كيمو .. موضوع مهم وكلنا بنعانى من المشكلة دى

وفعلا زى المهندس ايهاب ما بيقول " و هو ان كل التنظيف و التليين اللي انت حطيته هيروح و يدوب في البنزين و هترجع تنشف تاني .... مافيش حل مثلا نصنفر او نخف قليلا من الاجزاء اللي بتتحرك عليهم الطلمبة بالسوسته ؟؟؟ "

ممكن ينفع ؟؟

**Karim Ibiza** · 23-06-2013 12:26 PM

المشاركة الأصلية كتبت بواسطة ehab_mansour

جامدة جدا يا كيمو !!!!!!!!! مش اي حد ياخد باله من النقطة دي ... و تخيل ان كلنا تقريبا بنوصل للشريحة و نظبطها و معرفش ايه و مفكرناش ابدا انها ممكن تكون من السوسته ... بس لي تعليق و هو ان كل التنظيف و التليين اللي انت حطيته هيروح و يدوب في البنزين و هترجع تنشف تاني .... مافيش حل مثلا نصنفر او نخف قليلا من الاجزاء اللي بتتحرك عليهم الطلمبة بالسوسته ؟؟؟

الحمد لله ويارب يكون ده الحل النهائى

المشاركة الأصلية كتبت بواسطة mahmoud ghanem

الله ينور عليك يا كيمو .. موضوع مهم وكلنا بنعانى من المشكلة دى

وفعلا زى المهندس ايهاب ما بيقول " و هو ان كل التنظيف و التليين اللي انت حطيته هيروح و يدوب في البنزين و هترجع تنشف تاني .... مافيش حل مثلا نصنفر او نخف قليلا من الاجزاء اللي بتتحرك عليهم الطلمبة بالسوسته ؟؟؟ "

ممكن ينفع ؟؟

وعليك ياحوده
المشكلة ان اللى بيعصلج مش السوستة نفسها
اللى بيعصلج هو احتكاك البلاستيك فى بعضه
ولو اتصنفر يبقى احنا كده شيلنا الطبقة اللى عليه وساعتها هيعصلج اكتر
عموما الموضوع لسه تحت التقييم
تفويلتين كده ونشوف ايه النظام