الموضوع: حادث تصادم بين سيارتي وسيارة لانوس وسيارة شرطة أوبترا

المشاركة الأصلية كتبت بواسطة fo1fo

والله فكره رائعه الواحد ( بعد الشر عننا وعن السامعين ) يعمل مصيبه بالعربيه ويطلع يحرى يبلغ انها مسروقه . أستغفر الله العظيم من الأفكار الشيطانيه دى ...... شكرا لنقل التجربه وربنا يعوضك خير وما تبقاش تنسى تجدد رخصه العربيه تانى

أعتقد قانونا .... مفيش حاجة أسمها كدا
لازم يثبت حالة و يبلغ عن السيارة المسروقة علشان لو حصل حاجة زي دي .
أنت عارف لو مثلا اللي سايقها خبط بها حد و مات .... غالبا صاحب العربية هايلبس قضية حتى لو كانت مسروقة و معرفش يثبت أن مش هو اللي سايقها .
إنما لو مبلغ عنها و لا حد هايتكلم معاه .

المشاركة الأصلية كتبت بواسطة Ashraf_Ibrahim

تاني يوم روحت بعد صلاة الجمعة عشان اشوف قصة النيابة دي
كلمت صاحب العربية اللي بيقول انها مسروقة عشان يقابلني في النيابة
وكان فيه واحد وقت الحادثة رجع وقال انا شاهد وانا شفت كل حاجة وعاوز أشهد فاتصلت بيه برده
بصراحة الشاهد المهندس عاطف راجل محترم جداااااااااااااااااا وصل قبلي بنصف ساعة وفضل معايا من 1.30 لحد 5 لحد ما دخلنا وخلصنا الموضوع مع وكيل النيابة جزاه الله خيرا وشهد بالحق ولا زاد ولا نقص شيء
جه صاحب العربية المهندس محمد !
قلتله اهلا وسهلا وقعدنا وشربنا قهوة وحاجة ساقعة وبتاع وبدأت أدردش معاه عشان أستبين منه بعض المعلومات اللي تخليني اقرر ان كانت عربيته فعلا مسروقة واللا دا فيلم معمول عليا عشان اتنازل عن المحضر وخلاص !
بدأته السؤال هو حضرتك ساكن فين ؟!
قال في النزهة الجديدة في مصر الجديدة
قلتله اهلا بيك
سألته طيب حضرتك عربيتك مسروقة من امتى ؟!
قال انها مسروقة من يوم الثلاثاء !
سألته طيب اتسرقت منك ازاي؟!
قال بلطجية ثبتوه على الدائري وخدوها منه بالاكراه
تعاطفت معاه الحقيقة !
قلتله طيب حضرتك عملت محضر ؟!
قلي لا معملتش محضر -هنا بدأت أشك -
قلتله طيب معلش هو حضرتك عرفت ازاي ان عربيتك موجودة عندنا في قسم أول مدينة نصر وانت مش عامل محضر وبالتالي مفيش نشرة بعربيتك او حاجة ؟!
قالي المحامي بتاعي هو اللي شافها وبلغني !
قلت في بالي آه انت عبيط والمفروض اني اصدق بقا !
يعني المحامي بتاعك بالصدفة عدا من جنب قسم اول شبرا الخيمة وشاف عربيتك اللي مش باين ليها ملامح وهي مرمية فوق الرصيف وعرفها بالصدفة واتصل بيك خلاك تيجي تعمل محضر في نفس اليوم في قسم شبرا الخيمة ان العربية مسروقة !
لا دا كلام ميدخلش عقلي خالص !
العربية دي مش مسروقة واللي كان سايقها حد قريبك او حد تبعك بس مكانش معاه رخص ليها خالص وانت عشان تطلع نفسك منها وتشيل اي شبهة جنائية او مسؤولية قانونية عليك قلت انها مسروقة !
قلتله تمام تمام
قالي ان البلطجية اتصلوا بيه وكانوا طالبين منه 30000 جنيه عشان يرجعوله عربيته
جه وكيل النيابة فقمنا عشان نطلع
فقبل ما نطلع بقا بيقلي حضرتك تتنازل بقا ونعمل محضر تصالح وكدة
قلتله تحت أمرك طبعا اعملك اللي انت عاوزه بس صلحلي عربيتي الاول وبعدها اعملك اللي انت عاوزه !
قالي يعني هعد ألف وراك عند السمكرية واللا ايه انا مش فاضي !
قلتله لا خالص يا فندم حضرتك هتجيب ونش يرفع العربية يوديها التوكيل ونشوف تكلفة تصليحها قد ايه تدفعه واجي اعملك محضر التصالح اللي انت عاوزه انا تحت أمرك
قلي هو انا اللي خبطك او انا اللي كنت سايقها اصلا؟!
قلتله لا مش حضرتك بس دي عربيتك وبعدين عربيتي دي كانت سبب ان عربيتك المسروقة- على حد ما بتقول وبتكدب يعني- انها ترجعلك وبعدين يا سيدي انت كان مطلوب منك 30000 جنيه عشان يرجعوهالك من البلطجية انا مش بقلك هات فلوس انا بقلك صلحلي عربيتي بس مش طالب منك اكتر من كدة
قالي انا مش هصلح حاجة ومش هدفع حاجة !
قلتله براحتك خالص على فكرة :]
راح قايلي انا اصلا مش عاوز العربية ومش هطلع لوكيل النيابة انا همشي !
قلتله براحتك لو مش عاوز تطلع تقدر تمشي مع السلامة
قالي انا همشي ايوة مش هطلع
قلتله مفيش مشكلة خالص بس خلي بالك ! انا هطلع لوكيل النيابة وهبلغه انك جيت وكنت موجود وانك امتنعت عن الحضور وهعملك محضر ضبط واحضار بقوة القانون وهتيجي غصبن عنك !
وقمت سايبه وقمت طالع لوكيل النيابة
فعلا بلغتهم ولسة هنعمل محضر لقيناه طالع ورانا -طب مكان من الاول واللا لازم الواحد يبان انه هيئذيك يعني -
دخلنا لوكيل النيابة بص في البطايق
استريح يا دكتور قلي اتفضل احكي ايه حصل ؟!
قمت حاكيله اللي حصل بالتفصيل
فسأل التاني انت عملت محضر بسرقة العربية ؟!
قله لا معملتش
قله ازاي يعني معملتش ؟! دا اللي بيتسرق منه موبايل بيعمله ازاي معملتش محضر !؟
قله انا كنت تايه ومش عارف اعمل ايه وكنت قاعد بلف على عربيتي في الشوارع
راح وكيل النيابة باصصله بصه غريبة كدة وقله مفهوم مفهوم
ماشي
سكت شوية وقله يا باشا انا لسة كان عندي محضر سرقة للشقة يوم الثلاثاء ومراتي عندي مشاكل زوجية معاها وانا تعبان وتعبت من النيابات والمحاكم ومش معايا فلوس وبتاع
قلت في بالي هو البلد كلها مفيهاش حد يتسرق غيرك واللا ايه وكله يوم الثلاثاء عربيتك تتسرق يوم الثلاثاء وشقتك تتسرق يوم الثلاثاء دانت فاضي بقا وتروح تعمل محضر للشقة وتنسى تعمل محضر للعربية ؟!
دانت كداب كدب الابل يا اخي !
وكيل النيابة قله ايوة مفهمتش انت عاوز ايه يعني ؟!
فسكت قاله انت خايف متاخدش عربيتك ؟!
لا هديهالك متقلقش وقام قلنا اتفضلوا برا وهبلغك قراري ايه :]
انتظرنا برا وبعد 10 دقايق وكيل النيابة طلبني
قلي بص يا دكتور القرار كالتالي حضرتك هتروح دلوقتي تستلم رخص عربيتك ورخصتك وتستلم العربية فورا من القسم
قلتله طيب مطلوب مني اي غرامات او اي مصاريف !؟
قلي ابدا مش مطلوب منك اي حاجة خالص :]
شكرته وخرجت وطلعت على القسم
رحت استلمت رخصتي فعلا لكن مرضيوش يسلموني العربية او رخصتها !
عشان الرخصة بتاعة العربية منتهية !
قلي هنديلك جواب لمرور مدينة نصر اللي عربيتك تبعه وتجبلنا من هناك شهادة بيانات وتيجي مرور شبرا الخيمة تجيب مهندس يعمل تقرير فني للعربية ويحدد التلفيات قد ايه بالظبط وبعد كدة نبعت رخصة العربية على مرور مدينة نصر ونحررلك مخالفة القيادة برخصة مركبة منتهية وبعد كدة نسلمك العربية بإيصال لحد ما تجدد الرخصة
قلتلهم شكرا قمت واخد رخصتي ومشيت ولسة هكمل الحجات دي بقا :]

معرفتش ايه اللي حصل للراجل التاني ؟ و عربيتك هتتصلح علي حسابه ولا لأ ؟ شكلك محامي علشان تطيق الحوار ده كله

ايه يا عم اشرف الفيلم الهندي اللي انتا وقعت فيه ده اولا حمدلله علي سلامتك ثانيا مقولتلناش عملت ايه مع الراجل الكداب ده اللي المفروض يتحبس ويجيب اللي كان سايقها لانه يعتبر متستر عليه وعربية الشرطة مين اللي اتحمل تكاليف اصلحها فين يا عم كل المعلومات دي

موضوع فعلا غريب جداااااااااا
و
الناس دلوقتي اصبحت اغرب
لا
ضمير ولا اخلاق ولا شجاعة تحمل الاخطاء
و
حمد الله علي السلامة يا دكتور

لاحول ولا قوه إلا بالله .....................